اتىراۋداعى جارىلىس: اۋرۋحاناعا تۇسكەن ءۇش ناۋقاستىڭ ەكەۋى كوز جۇمدى

جارىلىس 10 قاراشادا تۇنگى ساعات 1:24-تە اتىراۋ قالاسىنىڭ بالاۋسا شاعىن اۋدانىنداعى جەكە ۇيدە بولعان. توتەنشە جاعداي دەپارتامەنتى ءباسپاسوز قىزمەتىنىڭ مالىمەتىنشە, جارىلىس سالدارىنان جالپى كولەمى 120 شارشى مەتر بولاتىن تۇرعىن ءۇي وتقا وراندى.

تۇرعىن ءۇيدىڭ توبە جابىندىسى مەن بولمەلەرى تولىقتاي ورتەنىپ كەتتى. ءورت ساعات 2:15-تە وقشاۋلانىپ, ساعات 2:40-تا وشىرىلگەن ەدى. كەيىن وبلىستىق دەنساۋلىق ساقتاۋ باسقارماسىنىڭ ءباسپاسوز قىزمەتى اۋرۋحاناعا تۇسكەن ءۇش ادامنىڭ جاعدايى اۋىر ەكەنىن حابارلادى.

19 جاستاعى ەكى جىگىت جانساقتاۋ بولىمشەسىنە تۇسكەن. ال, ءۇشىنشىسى – 22 جاستاعى بويجەتكەن. جانساقتاۋ بولىمشەسىندەگى ناۋقاستىڭ ءبىرىنىڭ دەنەسىن 90%, ەكىنشىسىندە 85-90% كۇيىك شالعان. ەكەۋىنىڭ دە جاعدايى وتە اۋىر بولعان. ناۋقاستىڭ ەكەۋى دە جاساندى تىنىس الۋ اپپاراتىنا قوسىلعان. ال, 1999 جىلعى بويجەتكەن 25-30% كۇيىكپەن نەيروتراۆماتولگيا بولىمشەسىنە ءتۇستى. ونىڭ دا جاعدايى اۋىر.

«وبلىستىق اۋرۋحانانىڭ جانساقتاۋ ءبولىمىنىڭ دارىگەرلەرى II جانە III دارەجەلى كۇيىكپەن تۇسكەن 19 جاستاعى ەكى جىگىتكە مەديتسينالىق ەم-دوم شارالارىن جۇرگىزدى. الايدا, 14 قاراشادا دەنەسىنىڭ 85-90%-ىن كۇيىك شالعان 2002 جىلعى جىگىتتىڭ ءبىرى قايتىس بولدى. ال, بۇگىن, 15 قاراشادا 90-95% كۇيىك العان ەكىنشى ناۋقاس – 19 جاستاعى جىگىت كوز جۇمدى», دەپ ءمالىم ەتتى باسقارمانىڭ ءباسپاسوز قىزمەتىنەن.