كەشە سىرتقى ىستەر مينيسترلىگىندە جەڭىستىڭ 65 جىلدىعى قارساڭىندا ۇلى وتان سوعىسى ۋاقىتىندا گەرمانيا مەن اۆستريا اۋماعىندا قازا تاپقان قازاقستاندىقتارعا ارنالعان “ارماندا كەتكەن بوزداقتار” اتتى ەستەلىك كىتاپتىڭ تانىستىرىلىمى بولىپ ءوتتى.
قازاقستان رەسپۋبليكاسىنىڭ گەرمانيا فەدەراتيۆتىك رەسپۋبليكاسىنداعى ەلشىلىگى ساكسوندىق مەموريال بىرلەستىگىنىڭ جانىنداعى قۇجاتتاۋ ورتالىعىمەن بىرلەسە ءجۇرگىزىلگەن ىزدەۋ جۇمىستارىنىڭ ءناتيجەسىندە جارىق كورگەن بۇل كىتاپتا گەرمانيا اۋماعىندا كونتسەنتراتسيالىق لاگەرلەردە قازا تاپقان 6228 ادامنىڭ اتى-جوندەرى بەرىلگەن.
فاشيستەر بيلىك باسىنا كەلگەننەن كەيىن ىلە-شالا لاگەرلەر قۇرىلىسىن باستاپ, العاشىندا “داحاۋ”, “ەستەرۆەگەن”, “ليحتەنبەرگ”, “زاكسەنبۋرگ”, “باد-زۋلتس”, “كولۋمبيا-حاۋز”, “فيۋلسبيۋتتەل” سىندى 6 لاگەرگە ءوز ازاماتتارىن قاماعان فاشيستەر سوعىس اياعىندا ء“ولىم لاگەرلەرىندە” ادامداردى ازاپتاپ, ولارعا حايۋانعا دا جاسامايتىن نەشە ءتۇرلى اياۋسىز ءتاجىريبەلەر ءجۇرگىزىپ, اتىپ, پەشتەردە ورتەپ, گاز كامەرالارىندا تۇنشىقتىرۋمەن جۇيەلى تۇردە اينالىستى. گفر ىشكى ىستەر مينيسترلىگىنىڭ 1967 جىلى بەرگەن دەرەكتەرى بويىنشا فاشيستىك گەرمانيانىڭ جاۋلاپ العان جەرلەرى مەن ءوز جەرىندەگى لاگەرلەردى قوسقاندا 1634 ازاپ لاگەرلەرى بولىپتى. تۋعان جەردىڭ توپىراعى بۇيىرماعانىنىڭ ۇستىنە فاشيست توزاعىندا قازا تاۋىپ, قورلىق كورگەن اتالارىمىزدىڭ ەسىمدەرى, تۋعان جىلدارى, قاي لاگەردە فانيمەن قوشتاسقاندىعى كورسەتىلگەن كىتاپتى قاراپ وتىرىپ, شەيىت بولعان, ارماندا كەتكەن بوزداقتار- اي دەيسىڭ.
تانىستىرىلىمدا جۇرتشىلىق نازارىنا تاعى ءبىر كىتاپ ۇسىنىلدى. ول – قازاقستان رەسپۋبليكاسىنىڭ اۆستريا رەسپۋبليكاسىنداعى ەلشىلىگى مەن بولتسمان اتىنداعى سوعىس زارداپتارىن تەكسەرۋ ينستيتۋتى جانە اۆستريانىڭ قارا كرەسىمەن بىرلەسە وتىرىپ, 980 قازاقستاندىقتاردىڭ جەرلەنگەن جەرى تۋرالى اقپارات بەرەتىن ەستەلىك كىتابى. ونىڭ تۇساۋكەسەرى اۆستريادا ءساۋىردىڭ 27-ءسى كۇنى بولىپ وتكەن ەكەن.
سالتاناتتى تانىستىرىلىم راسىمىندە سىرتقى ىستەر ءمينيسترىنىڭ ورىنباسارى نۇرلان ەرمەكباەۆ, ارداگەرلەر كەڭەسى توراعاسىنىڭ ورىنباسارى بەكبولات مۇقىشەۆ سوعىس ارداگەرلەرىن مەرەكەمەن قۇتتىقتاسا, ارداگەرلەر اتىنان ايدارحان بايكەنوۆ, سەيىلبەك ۋسين ءسوز سويلەدى. شاراعا قورعانىس مينيسترلىگى, سىرتقى ىستەر مينيسترلىگى, شەتەلدىك ديپلوماتيالىق كورپۋستىڭ, سونداي-اق بۇقارالىق اقپارات قۇرالدارىنىڭ وكىلدەرى قاتىستى.
انار تولەۋحانقىزى.