كەشە قاسىم-جومارت توقاەۆتىڭ توراعالىق ەتۋىمەن پارلامەنت سەناتى بيۋروسىنىڭ وتىرىسى بولدى, دەپ حابارلادى سەناتتىڭ ءباسپاسوز قىزمەتى.
تۇراقتى كوميتەتتەردىڭ ءتوراعالارى سەناتورلاردىڭ اقپاننىڭ 5-ءى مەن 15-ءى ارالىعىنداعى ەل ايماقتارىنا ساپارى تۋرالى ەسەپ بەردى. جۇرتشىلىقپەن, ەڭبەك ۇجىمدارىمەن, الەۋمەتتىك سالا قىزمەتكەرلەرىمەن, عىلىم جانە شىعارماشىلىق سالالاردىڭ زيالى قاۋىم وكىلدەرىمەن كەزدەسۋلەر بارىسىندا دەپۋتاتتار پرەزيدەنت نۇرسۇلتان نازارباەۆتىڭ «قازاقستان جولى – 2050: ءبىر ماقسات, ءبىر مۇددە, ءبىر بولاشاق» اتتى حالىققا جولداۋىن ىسكە اسىرۋ ماسەلەلەرىن تالقىلادى. مەملەكەت باسشىسىنىڭ باستامالارىن زاڭنامالىق تۇرعىدا قامتاماسىز ەتۋ جۇمىستارىنىڭ الدىندا حالىقپەن كەزدەسۋلەردىڭ ەرەكشە ماڭىزى بار. دەپۋتاتتار جەرگىلىكتى جەرلەردە شاعىن جانە ورتا بيزنەس كاسىپورىندارىن, اگروونەركاسىپ كەشەنىن دامىتۋ, الەۋمەتتىك باعدارلامالار مەن يندۋستريالاندىرۋ جوبالارىن ىسكە اسىرۋ, سونداي-اق, زاڭنامالىق تۇرعىدا شەشۋدى تالاپ ەتەتىن ماسەلەلەرمەن تانىستى.
بيۋرودا سەنات كوميتەتتەرىنە ماجىلىستە ماقۇلدانعان زاڭ جوبالارى ءبولىنىپ بەرىلدى. بيۋرو مۇشەلەرى, سونداي-اق, سەناتتىڭ 27 اقپاندا بولاتىن وتىرىسىنىڭ كۇن ءتارتىبىن دە قارادى. وتىرىستا «جول ءجۇرىسى تۋرالى» زاڭ جوباسى جانە زاڭناماعا جول ءجۇرىسى ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى ىلەسپە زاڭ جوباسى ەكىنشى وقىلىمدا قارالاتىن بولدى.