سەناتور سەرگەي ەرشوۆ پرەمەر-مينيستر اسقار مامينگە جولداعان دەپۋتاتتىق ساۋالىندا ونەركاسىپ قاۋىپسىزدىگى سالاسىنداعى وزەكتى ماسەلەلەردى قوزعادى. سەناتور ەلىمىزدىڭ كاسىپورىندارىندا اپات تۋىنداۋ قاۋپىنىڭ دەڭگەيى جوعارى ەكەنىن ايتتى, دەپ حابارالايدى Egemen.kz.
ەسكە سالا كەتسەك, 7 قاراشادا «ارسەلورميتتال تەمىرتاۋ» اكتسيونەرلىك قوعامىنىڭ «اباي» شاحتاسىندا اپات بولدى. اپات سالدارىنان 6 كەنشى قازا تاۋىپ, ەكەۋى زارداپ شەكتى.
دەپۋتات كەلتىرگەن دەرەكتەر بويىنشا سوڭعى 10 جىلدا «ارسەلورميتتال تەمىرتاۋ» مەتاللۋرگيالىق كومپانياسىنىڭ بارلىق بولىمشەلەرىندە اپات سانى كوبەيگەنى بايقالدى. وسى ۋاقىت ىشىندە كومپانيانىڭ كومىر شاحتالارىندا 23 اپات بولدى, ودان زارداپ شەككەن 41 ادامنىڭ 19-ى قازا بولدى. بۇل 2006 جانە 2008 جىلدارداعى ەكى ءىرى اپاتتى ەسەپتەمەگەندەگى جاعداي, وندا 71 شاحتەر قازا تاپقان. سەرگەي ەرشوۆ ونەركاسىپتەگى قاۋىپسىزدىكتىڭ جاي-كۇيىن جاقسارتۋ ءۇشىن قازىرگى كەزدە وسى كاسىپورىندا دا, بۇكىل مەملەكەت اۋقىمىندا دا ۇكىمەتتىك دەڭگەيدە شارالار قابىلداۋ ماڭىزدى دەپ سانايدى.
سەناتور ءوز ساۋالىندا كومپانيادا ينۆەستيتسيالىق مىندەتتەمەلەردىڭ ورىندالماۋى, قىزمەتكەرلەردىڭ ءتيىستى الەۋمەتتىك كەپىلدىكتەرىنىڭ بولماۋى, جابدىقتاردى جاڭعىرتۋدىڭ تولىق قارجىلاندىرىلماۋى, بىلىكتى كادرلاردىڭ كەتۋى, سونداي-اق زياندى زاتتار شىعارىندىلارىن ازايتۋ جونىندەگى مىندەتتەمەلەردىڭ ورىندالماۋىنا قاتىستى بىرقاتار وزەكتى ماسەلەلەرگە نازار اۋداردى.
«ۇكىمەتتى قابىلدانعان مىندەتتەمەلەردى مۇلتىكسىز ساقتاۋعا جانە اپات پەن ولىمگە دۋشار ەتەتىن جاراقاتتانۋ سانىنىڭ وسە تۇسۋىنە ىقپال ەتەتىن جاعدايدى بولدىرماۋعا شاقىرا وتىرىپ, وزدەرىنىڭ جەكە وتىرىسىندا سالانىڭ جاعدايىن جانە «ارسەلوردىڭ» جاي-كۇيىن قاراۋدى سۇرايمىز. سونداي-اق قاۋىپتى ءوندىرىس وبەكتىلەرىندە ونەركاسىپ قاۋىپسىزدىگىن قامتاماسىز ەتۋ جونىندەگى ناقتى جانە جۇيەلى شارالار, سونداي-اق قىزمەتكەرلەردىڭ الەۋمەتتىك احۋالى مەن وڭىردەگى ەكولوگيالىق جاعدايدى جاقسارتۋ جونىندە «ارسەلورمەن» ينۆەستيتسيالىق كەلىسىمدى قايتا قاراۋ تۋرالى شارالار ۇسىناتىن بولسىن», دەدى سەرگەي ەرشوۆ دەپۋتاتتىق ساۋالىندا.