ەلىمىزدە ءارتۇرلى كوممۋنيكاتسيا قۇرالدارى ارقىلى (الەۋمەتتىك جەلىلەردى قوسا العاندا ينتەرنەت-حابارلامالار, سمس) كەيبىر بانكتەردىڭ بانكروت بولۋ مۇمكىندىگى تۋرالى اقپارات تاراتىلعانى بەلگىلى بولعان ەدى. وسىعان بايلانىستى الماتى قالالىق پروكۋراتۋراسى تومەندەگى ءجايتتى حاباردار ەتتى.
جوعارىداعى حابارلامالار اتالعان بانكتەردىڭ سالىمشىلارىن دۇرلىكتىرىپ, ولاردى بانكتىك شوتتارداعى قاراجاتتارىن جاپپاي الۋعا يتەرمەلەدى. سونىڭ سالدارىنان بۇل ارەكەتتەر جۇيە قۇراۋشى بانكتەرگە ايتارلىقتاي زيان كەلتىرگەندىكتەن, ءتيىستى بانكتەر قۇقىق قورعاۋ ورگاندارىنا قارجىلىق احۋالى جونىندەگى جالعان اقپارات تاراتقان تۇلعالاردى انىقتاپ, ولاردى ءتيىستى جاۋاپقا تارتۋ تۋرالى ارىزدارىن ءتۇسىردى.
پروكۋرورلىق تەكسەرۋ جانە ۇلتتىق قاۋىپسىزدىك ورگانى تاراپىنان جۇرگىزىلگەن ءىس-شارالاردىڭ ناتيجەسىندە, «Signum» زاڭگەرلىك فيرماسى» جشس-ءنىڭ يەسى ءابىلقايىر ناقىپوۆتىڭ جانە وسى فيرمانىڭ قىزمەتكەرلەرى ۆيكتوريا تروفيموۆيچ پەن ايگەرىم اداسباەۆانىڭ «بانكتسەنتركرەديت» اق-تىڭ قيىن قارجىلىق جاعدايى تۋرالى جالعان ەلەكتروندى حابارلاما تاراتقاندارعا قاتىسى بار ەكەندىگى انىقتالدى. جالعان اقپاراتتى ولار دارحان سابدەنوۆتەن العانى انىقتالدى, ول بۇرىن «بانكتسەنتركرەديتتىڭ» الماتى ايماعى بويىنشا اتقارۋ ءوندىرىسى ءبولىمىنىڭ مامانى قىزمەتىن اتقارعان.
الايدا اتالعان بانكتەردىڭ بانكروت الدىنداعى جاعدايى تۋرالى جالعان اقپاراتتىڭ ەشبىر نەگىزى بولماعان جانە بولۋى دا مۇمكىن ەمەس ەدى.
ءسويتىپ, ناتيجەسىندە د.ءسابدەنوۆتىڭ جانە جوعارىدا اتالعان تۇلعالاردىڭ ءىس-ارەكەتتەرىنىڭ سالدارىنان «بانكتسەنتركرەديت» اق-قا ەلەۋلى زالال كەلتىرىلدى. وسىنىڭ نەگىزىندە ۇستىمىزدەگى جىلدىڭ 21 اقپانى كۇنى الماتى قالاسى پروكۋراتۋراسى تاراپىنان د.سابدەنوۆكە قاتىستى اكىمشىلىك قۇقىق بۇزۋشىلىق تۋرالى كودەكستىڭ الداۋ نەمەسە سەنiمگە قيانات جاساۋ جولىمەن مۇلiكتiك زالال كەلتiرگەنى ءۇشىن جاۋاپكەرشىلىكتى كوزدەيتىن 136-1-بابى بويىنشا اكىمشىلىك ءىس قوزعالدى. سوتتىڭ قاۋلىسىمەن د.سابدەنوۆ جوعارىدا اتالعان اكىمشىلىك قۇقىق بۇزۋشىلىقتى جاساعانى ءۇشىن 20 تاۋلىككە قاماۋعا الىندى.
قوسىمشا ايتا كەتەتىن ءجايت, بۇرىنىراقتا د.سابدەنوۆكە قاتىستى قىلمىستىق كودەكستىڭ 251-بابى 2-بولىمىمەن (قارۋدى, وق-دارiلەردi, جارىلعىش زاتتاردى جانە جارىلعىش قۇرىلعىلاردى زاڭسىز ساتىپ الۋ, بەرۋ, وتكiزۋ, ساقتاۋ, تاسىمالداۋ نەمەسە الىپ ءجۇرۋ) ءىس قوزعالىپ, بىراق وسى ءىس بويىنشا قىلمىستىق قۋدالاۋ زاڭسىز قىسقارتىلعانى انىقتالدى. قازىرگى تاڭدا اتالعان شەشىم قالالىق پروكۋراتۋرا تاراپىنان بۇزىلىپ, ءىس قايتا تەرگەۋ جۇرگىزۋ ءۇشىن قىلمىستىق قۋدالاۋ ورگانىنا جولداندى.
بانكتەردىڭ قارجىلىق احۋالى جونىندەگى جالعان اقپاراتتى تاراتۋعا قاتىسى بار باسقا دا تۇلعالاردى انىقتاۋعا باعىتتالعان ءىس-شارالار جالعاسۋدا. سوندىقتان پروكۋراتۋرا باق وكىلدەرىنەن جانە ازاماتتاردان قارالىپ جاتقان وقيعالاردى جاريا ەتۋ كەزىندە تەك تەكسەرىلگەن دەرەكتەرگە سۇيەنۋگە جانە شىندىققا سايكەس كەلمەيتىن اقپاراتتىڭ جاريالانۋىنا جول بەرمەۋىن سۇرايدى, دەپ حابارلادى الماتى قالالىق پروكۋراتۋراسىنىڭ باسپاسوز قىزمەتى.