بالالارعا كوروناۆيرۋسقا قارسى ۆاكتسينا مەكتەپتەردە جۇرگىزىلەدى. بۇل تۋرالى ۇكىمەت وتىرىسىندا قر دەنساۋلىق ساقتاۋ ءمينيسترى الەكسەي تسوي ايتتى, دەپ حابارلايدى Egemen.kz.
«بالالاردى ۆاكتسيناتسيالاۋ ادەتتە وقۋ ورنىنداعى ەكپە پۋنكتتەرىندە, ياعني ءبىلىم بەرۋ ۇيىمدارىندا جۇرگىزىلىپ كەلدى. كوروناۆيرۋس ينفەكتسياسىنا قارسى ۆاكتسيناتسيا دا جاسوسپىرىمدەردىڭ, كامەلەتكە تولماعانداردىڭ اتا-اناسىنىڭ نەمەسە وزگە دە زاڭدى وكىلدەرىنىڭ اقپاراتتىق كەلىسىمىنەن كەيىن ءبىلىم بەرۋ ۇيىمدارىندا جۇزەگە اسىرىلادى», دەدى مينيستر.
وسى رەتتە الەكسەي تسوي وبلىستاردىڭ, الماتى, نۇر-سۇلتان, شىمكەنت قالالارىنىڭ اكىمدىكتەرى اقپارات جانە قوعامدىق دامۋ, ءبىلىم جانە عىلىم, دەنساۋلىق ساقتاۋ مينيسترلىكتەرىمەن بىرگە كۆي-گە قارسى ۆاكتسيناتسيالاۋ ماسەلەسى بويىنشا جاسوسپىرىمدەردىڭ, كامەلەتكە تولماعانداردىڭ اتا-اناسىن نەمەسە وزگە دە زاڭدى وكىلدەرىن, پەداگوگتەردى اقپاراتتاندىرۋى قاجەتتىگىن ايتتى.
بۇقارالىق اقپارات قۇرالدارىن, الەۋمەتتىك جەلىلەردى تارتا وتىرىپ, كۆي-گە قارسى ۆاكتسيناتسيا ماسەلەسى بويىنشا حالىق اراسىندا كەڭىنەن اقپاراتتىق-ءتۇسىندىرۋ جۇمىستارىن جۇرگىزۋ كەرەكتىگىن اتاپ ءوتتى.
«وبلىستاردىڭ, الماتى, نۇر-سۇلتان, شىمكەنت قالالارىنىڭ اكىمدەرى سانيتارلىق نورمالارعا سايكەس ەكپە پۋنكتتەرىن دايىنداۋى, ۆاكتسينانىڭ ءبىرىنشى توپتاماسى جەتكىزىلگەنگە دەيىن توڭازىتقىشتاردى ورناتۋى, ۆاكتسينانى تاسىمالداۋ, ساقتاۋ جانە قولدانۋ ەرەجەسىن ساقتاۋى, مەديتسينا قىزمەتكەرلەرىن دايىنداۋى ءتيىس», دەدى ول.