بوب ديلان نوبەل سىيلىعىن العاندا جۇرتتىڭ كوبى ونى لايىقسىز دەپ سانادى. نەگە؟ مۇنداي الىپقاشپا ءسوزدى ونىڭ شىعارماشىلىعىنان بەيحابار ادامدار ايتتى دەپ ەسەپتەر ەدىك. 500-گە جۋىق ءان جازىپ, 3000 رەت كونتسەرت بەرگەن تالانت يەسى تەگىن ادام بولماسا كەرەك.
جۇرتتىڭ كەي پىكىرىنە قۇلاق اسپايتىن ول بىردە ءوزىن شەكسپيرمەن سالىستىرادى. ونى ادەتتەگى ساحنالاردا ەمەس, نوبەل سىندى الپاۋىت سىيلىقتىڭ ۇلكەن ساحناسىندا ايتتى. 1962 جىلى العاشقى ءان البومىن شىعارعاننان باستاپ قازىرگە دەيىن ۇزدىكسىز مۋزىكا الەمىندە قىزمەت ەتىپ كەلە جاتقان بوب ديلان سانسىز جۇرەكتەرگە ءۇمىتتىڭ وتىن جاقتى. ونىڭ اندەرى ادامزاتتى ادىلەتتى قوعام قۇرۋعا, ءار ىستە ءادىل بولۋعا, بەيبىتشىلىك پەن تىنىشتىقتىڭ قادىرىن بىلۋگە ۇندەدى. سوسىن ونىڭ ءان سوزدەرىن كادىمگى قۋاتتى پوەزيا دەۋگە حاقىلىمىز. نوبەل ادەبيەت سىيلىعى وعان وسى ءۇشىن بەرىلگەنىن راستاعىمىز كەلەدى. شۆەد اكادەمياسى ديلانعا «امەريكالىق ءان ءداستۇرىنىڭ اياسىندا جاڭا پوەتيكالىق ورنەكتەر جاساعانى ءۇشىن» ۇلكەن سىيلىقتى بەردى. ول جازعان ليريكالىق اندەر كوپ تىڭدالدى, كوپ ايتىلدى. حالىق قارسى الدى, تالانت دەپ تانىدى. «بوب ديلان تەك ەستۋگە تۇرارلىق ۇلى اندەر جازدى. بىراق ونىڭ شىعارمالارىن پوەزيا رەتىندە وقىساڭىز ءتىپتى كەرەمەت», دەدى شۆەتسيا اكادەمياسىنىڭ تۇراقتى حاتشىسى سارا دانيۋس ديلانعا ماراپات تاپسىرىپ جاتقان ساتىندە.
ء«بىر ادام قانشا جول باسۋى كەرەك؟
ازامات دەپ ونى ەل تانىعانىنشا.
كوگەرشىن قانشا تەڭىزدى اسۋى كەرەك؟
ارقاسىن وت قۇم قارىعانىنشا.
اتومدار قانشا رەت اتىلۋى كەرەك؟
ماڭگىلىك تىيىم سالىنعانىنشا.
جاۋابىن بۇنىڭ جەل ايتادى.
ءيا, جەل ايتادى, دوسىم.
تاۋلار قانشا جىل جاساۋى كەرەك؟
دۇلەي تەڭىز شايىپ كەتكەنشە.
ادامدار قانشا جاس جاساۋى كەرەك؟
بوستاندىققا قولى جەتكەنشە.
موينىڭدى قانشا بۇرۋىڭ كەرەك؟
ەلەمەي ونى وتكەنشە.
جاۋابىن بۇنىڭ جەل ايتادى,
ءيا, جەل ايتادى, دوسىم.
كوزىڭدى قانشا تالدىرۋىڭ كەرەك؟
اسپاننىڭ ءجۇزىن كورگەنشە.
ادامدا قانشا قۇلاق بولۋى كەرەك؟
جىلاعانعا دەم بەرگەنشە.
اجالمەن قانشا ايقاسۋىڭ كەرەك؟
سونشاما پەندەنى كومگەنشە.
جاۋابىن بۇنىڭ جەل ايتادى,
ءيا, جەل ايتادى, دوسىم».
مىنە, بۇل ونىڭ «جەلمەن ۇرلەۋ» اتتى ءانى. بۇل ءاننىڭ ءسوزى تەرەڭ فيلوسوفيالىق ويلاردان, پايىمداۋلاردان, ءومىردىڭ وزىنەن تۋىنداعان شىعارما. قوعامداعى ادامنىڭ ومىرگە دەگەن كوزقاراسى اسقاق ءان بولىپ, سانسىز ادامنىڭ مۇڭىن ايتتى. جۇرەكتەن جۇرەككە جەتتى دەگەن وسى بولار.
بۇل ءان قازىرگە دەيىن ايتىلادى. اقش ەلىندە, ءتىپتى دۇنيەجۇزىندە قايتا-قايتا ورىندالىپ جۇرگەن ءاننىڭ ءبىرى. بوب ديلاننىڭ ونەردەگى جولى ەلۋ جىلدان استام ۋاقىتتى قۇرايدى. بىلاي قاراساڭ, ۇزاق تا, قىسقا دا ۋاقىت ەمەس. بىراق ونىڭ ونەرگە بەرگەنى مەن ىقپالى حاقىندا ونەرتانۋشىلار ۇزدىكسىز ايتىپ, جازىپ كەلەدى. وتكىر, قۋاتتى, ولمەس تۋىندىلارى ونىڭ بەدەلىن, ونەردەگى دەڭگەيىن بيىكتەتپەسە, الاسارتقان جوق.
ونىڭ تاعى ءبىر جاقسى ءانى «اسپان ەسىگىن قاعۋ» دەپ اتالادى.
«شەشە,
كەۋدەمدەگى الىڭىز توسبەلگىنى,
ەندى ول ماعان قاجەتسىز, انىق ءبىلدىم.
اينالا قاپ-قارا الەم, كوشكەن نۇرى...
مەن اسپاننىڭ ەسىگىن قاعىپ تۇرمىن.
تىق-تىق, قاقتىم اسپان ەسىگىن...
شەشە,
قارۋىمدى قويىڭىز مەنەن الىپ,
ونى ەندى ەشكىمگە كەزەمەسپىن.
ءتۇسى سۋىق قارا بۇلت كەلەدى اعىپ...
قاقتىم اسپان ەسىگىن,
مەن – ەلەسپىن», – دەيدى.
ءار ادامنىڭ ءوز بولمىسى بار دەسەك, بوب ديلاننىڭ بولمىسى – شىنايى مۋزىكا. ونى بىزگە تانىتقان دا وسى ۇلى ونەر. سىرشىل جۇرەكتەردى ەلىتەتىن ومىرشەڭ اندەر جازعان سازگەر مۋزىكا ارقىلى الەمدى وزگەرتۋگە بولاتىنىن راستادى. ول مۋزىكانى قارۋ ەتىپ, وزىنە ءتيىستى رۋحاني الەم جاسادى. ءبىر سوزبەن ايتقاندا, ونىڭ اندەرىندە مەيىرىمدىلىك, ومىرگە قۇشتارلىق, ءۇمىت پەن قۋانىش بار. ەندىگى جەردە بوب ديلاننىڭ ءانى بار جەردە, ونىڭ اتى ولمەيتىنىنە مىنا تاريح كۋا.