ماڭعىستاۋ وبلىسى توتەنشە جاعدايلار دەپارتامەنتى باستىعىنىڭ ورىنباسارى بەكبولات ابدىقادىروۆ جارىلىستىڭ الدىن الا سەبەبىن ايتتى, دەپ حابارلايدى Egemen.kz.
تۇنگى ساعات 9:25-تە ماڭعىستاۋ وبلىسى توتەنشە جاعدايلار دەپارتامەنتىنىڭ داعدارىس جاعدايلاردى باسقارۋ باسقارماسىنا اقتاۋ قالاسىنىڭ 29-شى شاعىن اۋدانىنداعى «شەرقالا» ەكى قاباتتى كەشەنىنىڭ اۋماعىندا جارىلىس بولعانى تۋرالى تەلەفون حابارلاماسى كەلىپ ءتۇستى. جارىلىس بولعان جەردە جەدەل شتاب قۇرىلدى.
وبلىس اكىمى, ازاماتتىق قورعاۋ قىزمەتىنىڭ باسشىسى, اقتاۋ قالاسى اكىمدىگى وقىس وقيعا بولعان جەردە ءجۇر. اۆاريالىق-قۇتقارۋ جۇمىستارىنا 70 ادام, 11 تەحنيكا, توتەنشە جاعدايلاردى جويۋدىڭ كۇشتەرى مەن قۇرالدارى جۇمىلدىرىلدى. سونداي-اق 150 پوليتسيا قىزمەتكەرى, 20 تەحنيكا, ازاماتتىق قورعاۋ ينجەنەرلىك قىزمەتى جانە ەنەرگەتيكا قىزمەتتەرى تارتىلدى.
كينولوگيالىق قىزمەتتىڭ بارلاۋى بويىنشا, جارىلىس ورنىندا زارداپ شەككەندەر جوق ەكەنى انىقتالدى. مۇنى «شەرقالا» كەشەنى يەسىنىڭ «بارلىق جۇمىسشىلار جۇمىس كۇنى اياقتالىپ, كەشكى ساعات 18-20 شاماسىندا عيماراتتان شىعىپ كەتتى» دەگەن سوزى دە راستايدى.
جارىلىستىڭ الدىن الا سەبەبى گاز-اۋا قوسپاسىنىڭ اعۋىنان بولۋى مۇمكىن. قازىردىڭ وزىندە وقيعا ورنىنان ەكى گاز باللونى شىعارىلدى.
تج وكىلدەرىنىڭ ايتۋىنشا, ۇيىندىلەردىڭ استىندا تاعى ەكى گاز باللونى بار. ولاردىڭ ارقايسىسىنىڭ سىيىمدىلىعى 50 ليتر. تولىعىراق اقپارات وقشاۋلاۋ جانە جويۋدان كەيىن بەرىلەدى.