قازاقستان پارلامەنتى ءماجىلىسىنىڭ دەپۋتاتى, «نۇر وتان» پارتياسى فراكتسياسىنىڭ مۇشەسى قايىربەك سۇلەيمەنوۆتىڭ توراعالىعىمەن جەمقورلىققا قارسى رەسپۋبليكالىق قوعامدىق كەڭەستىڭ وتىرىسى ءوتتى.
وتىرىس بارىسىندا مەملەكەتتىك ورگاندار تاراپىنان كەڭەس ۇسىنىمدارىنىڭ ورىندالۋى تالقىلاندى. ماسەلەن, 2013 جىلى ەلىمىزدىڭ توتەنشە جاعدايلار مينيسترلىگىنە سوت شەشىمدەرى مەن ۇكىمدەرىن ورىنداۋ بويىنشا, سونداي-اق, قوستاناي جانە قاراعاندى وبلىستارىندا جەمقورلىقپەن كۇرەس جونىندەگى «نۇر وتان» پارتياسىنىڭ باعدارلاماسىن ورىنداۋ بويىنشا ۇسىنىمدار بەرىلگەن بولاتىن. ماسەلەن, توتەنشە جاعدايلار مينيسترلىگىنە 2013 جىلدىڭ 25 قاڭتارىندا 12 ءىس-شارانى جۇزەگە اسىرۋ, سونداي-اق, ول شارالاردىڭ ورىندالۋى جونىندە 2013 جىلدىڭ 1 جارتىجىلدىعىندا اقپارات بەرۋ تاپسىرىلسا, باس پروكۋراتۋرا مەن ادىلەت جانە قارجى مينيسترلىكتەرىنىڭ ارقايسىسىنا 1 ۇسىنىمدار بەرىلىپتى.
سونداي-اق, 2013 جىلدىڭ 31 مامىرىندا سوت شەشىمدەرىنىڭ ورىندالۋ ۇدەرىسى كەزىندەگى سىبايلاس جەمقورلىقتىڭ الدىن الۋ باعىتىنداعى ادىلەت جانە ىشكى ىستەر مينيسترلىكتەرىنە – 12, ۇكىمەتكە – 5, باس پروكۋراتۋراعا 1 ۇسىنىم بەرىلىپتى. قوستاناي جانە قاراعاندى وبلىستارى دا مۇنداي ۇسىنىمداردان سىرت قالماپتى. ماسەلەن, 2013 جىلدىڭ 2 ساۋىرىندە قوستاناي وبلىسىندا «نۇر وتان» پارتياسىنىڭ سىبايلاس جەمقورلىقپەن كۇرەس جونىندەگى باعدارلاماسىن ورىنداۋ ماقساتىندا وبلىستىق فيليالدىڭ توراعاسىنا – 10, سونداي-اق, 2013 جىلدىڭ 30 قىركۇيەگىندە وسى باعدارلامانىڭ قاراعاندى وبلىسىندا ورىندالۋىنا قاتىستى اتالعان وڭىردەگى وبلىستىق فيليالدىڭ توراعاسىنا 9 ءىس-شارانى جۇزەگە اسىرۋ تاپسىرىلعان ەكەن.
جيىندا وسى ماسەلەلەر بويىنشا ءسوز العان جقرقك مۇشەسى دۋلات قۇسداۋلەتوۆ كەڭەس ۇسىنىمدارىنىڭ باسىم كوپشىلىگى ۋاقتىلى جانە ساپالى ورىندالىپ جاتقانىن مالىمدەدى. «ۇسىنىمداردى ورىنداۋ ماقساتىندا توتەنشە جاعدايلار مينيسترلىگى جانىنان قوعامدىق كەڭەس قۇرىلعان. ورتالىقتا جانە جەرگىلىكتى ورىندارداعى پارتيانىڭ قوعامدىق قابىلداۋ بولمەلەرىندە ازاماتتاردى قابىلداۋ جۇرگىزىلۋدە. 2013 جىلدىڭ 1 توقسانىندا جەمقورلىققا جول اشاتىن سەبەپتەرگە تالداۋ جۇرگىزىلىپ, جەكە قۇرام اراسىندا ولاردى ازايتۋ جونىندە كەشەندىك شارالار ازىرلەندى, جەمقورلىق زاڭ بۇزۋشىلىق جاساعان لاۋازىمدى تۇلعالار ءۇشىن قىزمەتتەن بوساتۋعا دەيىن تالاپ كۇشەيتىلدى», دەدى دۋلات قۇسداۋلەتوۆ.
ونىڭ كەلتىرگەن مالىمەتىنە سۇيەنسەك, توتەنشە جاعدايلار مينيسترلىگىندە تۇگەندەۋ, تىزىمگە الۋ ءجۇرگىزىلىپ, رۇقسات قۇجاتتارىن بەرۋ ءتارتىبىن رەتتەيتىن نورماتيۆتىك قۇقىقتىق اكتىلەر قايتا قارالعان. ناتيجەسىندە رۇقسات ەتۋ شارالارىنىڭ سانى 86 پايىزعا (177-دەن 26-عا دەيىن), ونىڭ ىشىندە ءورت قاۋىپسىزدىگى سالاسىندا 78 پايىزعا (74-تەن 16-عا دەيىن) قىسقارىپ, 5 شارا بويىنشا ەسكەرتۋ ءتارتىبى بەلگىلەنىپتى. سونداي-اق, توتەنشە جاعدايلار مينيسترلىگى ۇكىمەتتىڭ 4 قاۋلىسىندا زاڭناماعا قاراما-قايشى كەلەتىن نورمالاردى انىقتاپ, بۇگىنگى تاڭدا ونداي كەدەرگىلەردى الىپ تاستاۋ شارالارى قولعا الىنىپ جاتقان كورىنەدى.
جيىنعا قاتىسۋشىلار, سونداي-اق, «جۇمىسپەن قامتۋ-2020» باعدارلاماسىنىڭ دۇرىس جۇزەگە اسىرىلماۋىنا, قارجىلىق ءتارتىپتى بۇزعان جانە بيۋدجەت قارجىسىنىڭ دۇرىس يگەرىلمەۋىنە سەبەپكەر بولعان بىرقاتار ازاماتتاردىڭ تارتىپتىك جاۋاپكەرشىلىككە تارتىلعانىن اتاپ وتە كەلە, بۇل باعىتتاعى شارالاردىڭ بۇدان كەيىن دە جالعاساتىنىنا توقتالدى. ماسەلەن, كەڭەس مۇشەلەرىنىڭ ايتۋىنشا, سىبايلاس جەمقورلىق ارەكەتتەرى ءجيى كەزدەسۋى مۇمكىن دەپ بولجانعان ۇيىمدار مەن مەكەمەلەردە پارتيالىق باقىلاۋدىڭ 18 بولىمشەسى قۇرىلىپتى.
تالقىلاۋلاردىڭ ناتيجەلەرى بويىنشا جەمقورلىققا قارسى رەسپۋبليكالىق قوعامدىق كەڭەستىڭ قاۋلىسى قابىلدانىپ, وندا مەملەكەتتىك ورگاندارعا قاراعاندى, قوستاناي وبلىستارى اكىمدىكتەرىنە ناقتى ۇسىنىمدار, سونداي-اق, جەمقورلىققا قارسى ءىس-قيمىل بويىنشا قولدانىلاتىن شارالاردىڭ ساپاسى مەن تيىمدىلىگىن ارتتىرۋ باعىتىندا «نۇر وتان» پارتياسىنىڭ ايماقتىق فيليالدارى جانىنداعى كەڭەستەرگە تاپسىرمالار بەرىلدى.
ءلايلا ەدىلقىزى,
«ەگەمەن قازاقستان».