بۇگىن, 4 قاراشادا ىستامبۇلدا حالىقارالىق تۇركى اكادەمياسىنىڭ VI عىلىمي كەڭەسى ءوتتى. وتىرىستا «ورتاق تۇركى تاريحى», «تۇركى الەمىنىڭ گەوگرافياسى» جانە «ورتاق تۇركى ادەبيەتى» وقۋلىقتارى بويىنشا ماڭىزدى شەشىمدەر قابىلداندى, دەپ حابارلايدى Egemen.kz.
جيىندا ءسوز العان تۇرىك اكادەمياسىنىڭ پرەزيدەنتى دارحان قىدىرالى دايىندالعان وقۋلىقتار تۋرالى كەڭىنەن ماعلۇمات بەردى. ول «ورتاق تۇركى تاريحى» وقۋلىعىن ازىرلەۋ جۇمىستارى مارەسىنە جەتكەنىن حابارلاپ, «تۇركى الەمىنىڭ گەوگرافياسى» مەن «ورتاق تۇركى ادەبيەتى» وقۋ قۇرالدارىنىڭ دا دايىن ەكەنىن مالىمدەدى.
سونىمەن قاتار, اكادەميا پرەزيدەنتى ورتاق وقۋلىقتار ازىرلەۋ جۇمىستارىنا بەلسەنە قاتىسىپ, قولداۋ كورسەتكەن تاراپتارعا العىس ءبىلدىردى.
تۇركيا رەسپۋبليكاسىنىڭ ۇلتتىق ءبىلىم ءمينيسترى ماحمۋت وزەر «ورتاق تۇركى تاريحى» ءپانىنىڭ مازمۇنى ماڭىزدى سانالعاندىقتان جوعارعى سىنىپ دەڭگەيىنە دەيىن قابىلدانعانىن ايتتى. بۇعان قوسا, مينيستر ماحمۋت وزەر 2022-2023 وقۋ جىلىنان باستاپ 9, 10 جانە 11-سىنىپتاردا «تۇركى الەمىنىڭ گەوگرافياسى» جانە «ورتاق تۇركى ادەبيەتى» وقۋلىقتارىنىڭ تاڭداۋ ءپانى رەتىندە ەنگىزىلەتىنىن ايتتى.
قازاقستان رەسپۋبليكاسىنىڭ ءبىلىم جانە عىلىم ءمينيسترى اسحات ايماعامبەتوۆ قازاقستان مەكتەپتەرىندە «ورتاق تۇركى تاريحى» ءپانى ءساتتى وقىتىلىپ جاتقانىن اتاپ ءوتتى.
ازەربايجاننىڭ ءبىلىم ءمينيسترى ەمين امرۋللاەۆ «ورتاق تۇركى تاريحى» اۋقىمدى جوبا ەكەنىن ايتىپ, اكادەميانىڭ وسى تۇرعىداعى جۇمىسىن جوعارى باعالادى.
قىرعىزستاننىڭ ءبىلىم جانە عىلىم ءمينيسترى بولوتبەك كۋپەشەۆ ورتاق وقۋلىقتار ەنگىزۋدى قولدايتىنىن ءبىلدىرىپ, اتالعان باعىتتاعى ماسەلەلەردى زەرتتەيتىن بىرلەسكەن كوميسسيا قۇرۋدى ۇسىندى.
وسى ورايدا تۇركيا تاراپى ءوزىنىڭ توراعالىعى اياسىندا ورتاق وقۋلىقتار بويىنشا ارنايى جيىن ۇيىمداستىرۋدى ۇسىندى.
قاراستىرىلىپ وتىرعان ۇسىنىستاردىڭ ماڭىزدىلىعىنا توقتالعان تۇركى اكادەمياسىنىڭ پرەزيدەنتى مۇنداي ماڭىزدى قادامداردىڭ پروتسەستى جەدەلدەتە تۇسەتىنىنە سەنىم ءبىلدىردى.