پاۆلودارلىق پوليتسەيلەر 590 كگ زاڭسىز اۋلانعان بالىقتى تاركىلەدى, دەپ حابارلايدى Egemen.kz Polisia.kz-كە سىلتەمە جاساپ.
پاۆلودار وبلىسىندا «براكونەر» جەدەل الدىن الۋ شاراسى جالعاسۋدا. پوليتسيا قىزمەتكەرلەرى براكونەرلىك, بيولوگيالىق رەسۋرستار وبەكتىلەرىنىڭ زاڭسىز اينالىمى فاكتىلەرىن انىقتاۋعا جانە جولىن كەسۋگە باعىتتالعان رەيدتىك ءىس-شارالار جۇرگىزۋدە. تۇرعىندار پايدا ىزدەپ, قىتايلىق جەلىلەرمەن بالىق اۋلاپ, سومكەلەرمەن, كوپ مولشەردە بالىق اۋلاپ نەمەسە رۇقساتسىز جانە جولداماسىز اڭ اۋلاپ جۇرگەن كەزدە كوپتەگەن فاكتىلەر انىقتالدى. كەيبىرەۋلەر اڭشىلىق قارۋدى تاسىمالداۋ جانە ساقتاۋ ەرەجەلەرىن ساقتامايدى, بۇل قايعىلى سالدارعا اكەلۋى مۇمكىن.
«12 كۇن ىشىندە تابيعاتتى قورعاۋ پوليتسەيلەرى 69 زاڭ بۇزۋشىلىقتى, ونىڭ ىشىندە 33 زاڭسىز اڭ اۋلاۋ فاكتىسىن, 30 بالىق اۋلاۋ ەرەجەلەرىن بۇزۋدى انىقتادى. پوليتسيا قىزمەتكەرلەرى 590 كگ زاڭسىز اۋلانعان بالىقتى, 6 قۇقىق بۇزۋشىلىق جاساۋ قۇرالىن, 650 مەتر قىتايلىق ءوندىرىس جەلىسىن تاركىلەدى», دەپ حابارلادى پاۆلودار وبلىسى پوليتسيا دەپارتامەنتىنىڭ ءباسپاسوز قىزمەتى.