اتىراۋ وبلىسىنداعى ساعىز اۋىلىنىڭ ماڭىندا بولعان اتىستان كەيىن تۇرعىندار تەرگەۋدىڭ ءادىل جۇرگىزىلۋىن, كىنالىلەردىڭ جازالانۋىن تالاپ ەتتى, دەپ حابارلايدى Egemen.kz.
بۇدان بۇرىن اتىراۋ وبلىسىندا اۋىل جاستارى اراسىندا اتىس بولىپ, 6 ادام جاراقات العانىن جازعان ەدىك. وبلىستىق پوليتسيا دەپارتامەنتى ءباسپاسوز قىزمەتىنىڭ اقپاراتىنا سۇيەنسەك, 30 قازاندا ساعات 19:30-دا «اتىراۋ-اقتوبە» تاس جولىنىڭ 331-شاقىرىمىنداعى ساعىز اۋىلىنىڭ ماڭىندا جاستار ءبىر-بىرىنە وق اتقان.
وقيعا ورنىندا 6 ادام جاراقات الىپ, ساعىز اۋىلدىق دارىگەرلىك امبۋلاتورياسىنا جەتكىزىلگەن. كەيىن اتىستان 5 ادام وق جاراقاتىن, 1 ادام دەنە جاراقاتىن العانى انىقتالدى.
جاراقات العانداردىڭ ءبىرى – 1985 جىلى تۋعان ازامات اۋرۋحانادا قايتىس بولعان. اتىراۋ وبلىستىق دەنساۋلىق ساقتاۋ باسقارماسىنىڭ ءباسپاسوز قىزمەتى وق ءتيىپ, جاراقات العانداردىڭ جاعدايى تۋرالى اقپارات تاراتتى. جاراقات العانداردىڭ بىرەۋى ۇيىنە جىبەرىلگەن. ءبىر ەر ادام ماقات اۋداندىق اۋرۋحاناسىنا جەتكىزىلگەن. ءۇش ادام ءتۇرلى جاراقاتپەن وبلىستىق اۋرۋحاناعا جاتقىزىلعان. قىزىلقوعا اۋدانىنداعى اتىستان كەيىن پوليتسيا قىزمەتكەرلەرى ساعىز اۋىلىندا كۇشەيتىلگەن رەجيمدە جۇمىس ىستەۋگە جۇمىلدىرىلدى.
وبلىستىق پوليتسيا دەپارتامەنتىنىڭ باستىعى, پوليتسيا پولكوۆنيگى قامزا ۇمبەتقاليەۆتىڭ ايتۋىنشا, ءتارتىپ ساقشىلارى ساعىز اۋىلىن تاۋلىك بويى پاترۋلدەپ, كۇشەيتىلگەن رەجيمدە جۇمىسىن جالعاستىرىپ جاتىر.
وقيعا ورنىندا اتىراۋ وبلىستىق پوليتسيا دەپارتامەنتىنىڭ جەدەل-تەرگەۋ توبى جۇمىس ىستەۋدە.
اتالعان دەرەككە قاتىستى قر قىلمىستىق كودەكسىنىڭ 99-بابىنىڭ 2-بولىگىمەن (ادام ءولتىرۋ) تەرگەۋ باستالدى. ءبىر كۇننەن سوڭ وبلىستىق اۋرۋحاناعا تۇسكەن ءۇش ادامنىڭ جاعدايى ورتاشا اۋىر جانە اۋىر دەپ باعالانعانىن حابارلاعان بولاتىنبىز.
وبلىستىق اۋرۋحاناعا 1985 جىلى تۋعان ءۇش ەر ادام تۇسكەن. ەكى ناۋقاس نەيروحيرۋرگيا بولىمشەسىندە, ءۇشىنشى ناۋقاس حيرۋرگيا بولىمىندە ەم-دوم قابىلداپ جاتىر. ال, كەشە, 2 قاراشادا ساعىز اۋىلىنداعى پوليتسيا بولىمشەسىنە 25 ايەل ادام كەلىپ, 30 قازاندا ورىن العان وقيعاعا قاتىستى ءادىل تەرگەۋ جۇرگىزىلىپ, كىنالىلەردىڭ جازالانۋىن سۇراعان.
«قازىر وبلىستىق پوليتسيا دەپارتامەنتىنەن كەلگەن ارنايى جەدەل توپ تەرگەۋ جۇرگىزىپ جاتىر. تەرگەۋ ءىسى ءادىل وتەدى. اتىراۋ وبلىستىق پوليتسيا دەپارتامەنتى باسشىسى قامزا ۇمبەتقاليەۆ تەرگەۋ ءىسىن تىكەلەي باقىلاۋىندا ۇستاپ وتىر. اتىراۋ وبلىسىنىڭ اكىمى ماحامبەت دوسمۇحامبەتوۆ ءبىر ادام قايتىس بولعان قاندى وقيعانى باقىلاۋىنا الدى. سوتقا دەيىنگى تەرگەپ-تەكسەرۋ دەرەكتەرى جاريا ەتۋگە جاتپايدى», دەپ ءمالىم ەتتى قىزىلقوعا اۋدانى اكىمى نۇرسۇلتان بيسەمبيەۆ.