Facebook Meta Platforms الەۋمەتتىك جەلىسىنىڭ يەلەرى قازاقستان ۇكىمەتىنىڭ كۇنى كەشە جاساعان مالىمدەمەسىن جوققا شىعاردى, دەپ حابارلايدى Egemen.kz.
1 قاراشادا اقپارات جانە قوعامدىق دامۋ مينيسترلىگى جەلىدەگى ماتەريالداردى شەكتەۋگە جانە جويۋعا ەكسكليۋزيۆتى مۇمكىندىك الدىق دەپ مالىمدەگەن بولاتىن.
«قازاقستان رەسپۋبليكاسى اقپارات جانە قوعامدىق دامۋ مينيسترلىگى مەن Facebook ينتەرنەتتەگى بالالاردىڭ قۇقىقتارىن قورعاۋعا باسا نازار اۋدارا وتىرىپ, زياندى كونتەنتكە قارسى ءىس-قيمىل ماسەلەلەرى بويىنشا تىعىز ىنتىماقتاستىق تۋرالى كەلىسىمگە كەلدى.قازاقستان رەسپۋبليكاسىنىڭ ۇكىمەتىنە اقپاراتتىق كەڭىستىكتىڭ قاۋىپسىزدىگىن ارتتىرۋ ماسەلەسىن شەشۋگە كومەك كورسەتۋ ماقساتىندا Facebook قازاقستانعا ىشكى «كونتەنتتى حابارلاۋ جۇيەسىنە» («Content Reporting System» (CRS)) تىكەلەي ەكسكليۋزيۆتى قولجەتىمدىلىك بەردى. CRS مينيسترلىككە Facebook جاھاندىق كونتەنتتىك ساياساتىنىڭ دا, قازاقستان رەسپۋبليكاسىنىڭ ۇلتتىق زاڭناماسىنىڭ دا بۇزۋشىلىقتارى بار كونتەنت تۋرالى جەدەل حابارلاۋعا مۇمكىندىك بەرەدى», دەلىنگەن مينيسترلىك تاراتقان اقپاراتتا.
الايدا, Facebook يەلەرى اقپارات مينيسترلىگىنىڭ تاراتقان اقپاراتى تولىقتاي شىندىققا جاناسپايدى دەگەندى ايتتى.
«بىرىنشىدەن, ءبىز قازاقستان ۇكىمەتىمەن بىرلەسىپ مالىمدەمە جاساعان جوقپىز, ونىڭ ورنىنا قازاقستان ۇكىمەتى تالقىلانىپ جاتقان ماسەلەنى وزدىگىمەن جاريالادى. ءبىز ولارعا جەرگىلىكتى زاڭنامانى بۇزاتىن كونتەنتتى وشىرۋگە قاتىستى ۇكىمەتتەردىڭ وتىنىمدەرىن جاھاندىق قاراۋ ماسەلەسىن تالقىلاپ جاتىرمىز», دەلىنگەن Meta Platforms كومپانياسىنىڭ ازيا-تىنىق مۇحيتى اۋماعىنداعى ساياسي بايلانىس جونىندەگى ديرەكتورى بەن ماككوناگيدىڭ Reuters اگەنتتىگىنە بەرگەن جاۋابىندا.
ونىڭ سوزىنشە, بۇل پروتسەسس قازاقستان ءۇشىن ەكسكليۋزيۆتى ەمەس, مۇنداي جۇمىس باسقا دا ەلدەردىڭ ۇكىمەتتەرىمەن جۇرگىزىلىپ جاتىر.