نۇرسۇلتان نازارباەۆ: ۇستىمىزدەگى جىلى ءبىز ۇلى وتان سوعىسىنداعى جەڭىستىڭ 65 جىلدىعىن اتاپ وتەمىز. بۇل ءبىزدىڭ ورتاق تاريحىمىزداعى ماڭىزدى داتا. (قازاقستان حالقىنا جولداۋىنان).
مەملەكەت باسشىسى – قارۋلى كۇشتەردىڭ جوعارعى باس قولباسشىسى نۇرسۇلتان نازارباەۆ كەشە وتان قورعاۋشىلار كۇنى مەن ۇلى جەڭىستىڭ 65 جىلدىعى قارساڭىندا يلينكا كەنتىندەگى اسكەري قالاشىق پەن استانالىق №44813 اسكەري بولىمدە بولدى.
وسىنداعى كوتتەدج ۇلگىسىندە سالىنعان تۇرعىن ءۇي كەشەنى ورنالاسقان اسكەري قالاشىق الدى ابىر-سابىر. ساپقا تۇرعىزىلعان اسكەريلەر, ويناعان وركەستر ەلباسىن لايىقتى قارسى الۋ ءۇشىن دايىندىق ۇستىندە. اسكەريلەردىڭ جۇزدەرىندەگى ەرەكشە جىلىلىق ولاردىڭ ەلگە, ەلباسىنا دەگەن رياسىز كوڭىلدەرىن پاش ەتىپ تۇرعانداي. كىرەبەرىس قاقپانىڭ ماڭدايشاسىنا “پرەزيدەنتىمىزگە, حالقىمىزعا مىڭ دا ءبىر راحمەت!” دەپ جازىلىپتى. ەلباسى – جوعارعى باس قولباسشى كەلگەن كەزدە اسكەري وركەستر ويناپ, اسكەري ساپ تىك تۇزەلىپ تۇردى.
الدىمەن نۇرسۇلتان ءابىش ۇلى اسكەري قالاشىقتىڭ جوباسىمەن تانىسىپ, اسكەري قىزمەتشىلەر وتباسىلارىنىڭ ورنالاسۋىن سۇراپ ءبىلدى. سودان كەيىن اسكەري قىزمەتشىلەرگە تۇرعىن ۇيلەردىڭ كىلتتەرىن سالتاناتتى جاعدايدا تابىس ەتتى. بارلىق كوتتەدج ءىشىنارا جيھازدارمەن قامتاماسىز ەتىلگەن, كولىك قوياتىن ورنى بار اۋلاسى 10 سوتىق الاڭدى قۇرايدى. اسكەريلەردىڭ الدى جەلتوقسان ايىنان باستاپ وسىندا قونىستانىپتى. سول ۋاقىتتان بەرى پايدالانۋعا جان-جاقتى ءازىرلەنگەن 11 باسپانا كىلتى كاسىبي مەرەكەگە وراي يەلەرىن تاپتى. سونداي قۋانىش يەلەرىنىڭ ءبىرى اسكەري-اۋە كۇشتەرىنىڭ پولكوۆنيگى سەرىك ءابدىرايىموۆ بۇقارالىق اقپارات قۇرالدارى وكىلدەرىنە بىلاي دەدى: “سوڭعى كەزدەرى ۇشاقتارىمىز بەن تىكۇشاقتارىمىز كۇردەلى جوندەۋلەردەن ءوتىپ, ۇشۋ ساعاتتارى ارتا باستادى. ۇلى جەڭىستىڭ 65 جىلدىعى قارساڭىندا جانە وتان قورعاۋشىلار مەرەكەسىنە وراي پاتەرگە يە بولىپ, ۇلكەن قۋانىشقا كەنەلىپ تۇرمىز. مۇنىڭ بارلىعى ەلباسىنىڭ, ەلىمىزدىڭ وتان قورعاۋشىلارعا دەگەن ۇلكەن قامقورلىعىنىڭ ارقاسى دەپ تۇسىنەمىز”.
اۋماعى 40 گەكتاردى قۇرايتىن قالاشىقتا 200 كوتتەدج بولسا, سونىڭ 129-ى قورعانىس مينيسترلىگىنە ءبولىنىپتى. تاعى ءبىر بەلگىلى بولعانىنداي, اۋماعى 10 گەكتار تەلىمگە اكىمشىلىك كورپۋسى, جاتاقحاناسى, اسحاناسى جانە تۇرمىسقا قاجەتتىنىڭ بارلىعى بار كەشەن سالۋ كوزدەلىپ وتىر ەكەن. ءبىر نەمەسە ەكى اسكەري وتباسىنا ارنالعان كوتتەدجدەر 176 اسكەري وتباسىنا ەسەپتەلىنىپتى. ازىرگە 88 اسكەري وتباسى باسپانالارىنا كىرىپ ۇلگەرگەن كورىنەدى. ەندى قالعانى شىلدە ايىنا دەيىن, ياعني جوندەۋ جۇمىستارى بىتكەن سوڭ قونىستانادى دەپ كۇتىلۋدە ەكەن.
جالپى, تۇرعىن ۇيلەر ءۇش جانە ودان دا كوپ بالاسى بار اسكەري قىزمەتشىلەرگە بەرىلگەنى ءمالىم بولدى. مۇندا قىستاپ شىققان تۇرعىندار قاقاعان ايازدا دا ءوز باسپانالارىنىڭ جىلى بولعاندىعىن ايتىپ جاتتى. تۇرعىن ءۇي ازىرگە اۆتونومدى پەش ارقىلى جىلىتىلادى. شاعىن دا وڭتايلى پەشكە وتىن رەتىندە كومىر پايدالانىلادى ەكەن. بولاشاقتا اسكەري قالاشىق استانانىڭ ورتالىقتانعان جىلۋ جۇيەسىنە قوسىلادى دەپ جوسپارلانىپتى.
جالپى, ەلباسى قارۋلى كۇشتەردىڭ دامۋىنا جانە اسكەري قىزمەتشىلەردىڭ تۇرمىستىق جاعدايىنا ۇنەمى ەرەكشە نازار اۋدارىپ كەلەدى. جاقىن ماڭداعى ءبىر-ەكى كوتتەدجدىڭ ىشىنە ارنايى كىرىپ, ونداعى اسكەريلەردىڭ تۇرمىس-جاعدايىمەن جاقىن تانىسۋعا ىقىلاس تانىتۋىنىڭ ءوزى وسى ءسوزىمىزدىڭ دالەلى بولسا كەرەك.
بۇدان كەيىن مەملەكەت باسشىسى – قارۋلى كۇشتەردىڭ جوعارعى باس قولباسشىسى نۇرسۇلتان نازارباەۆ, جوعارىدا اتاپ كورسەتىلگەنىندەي, ەلوردانىڭ اۋە قورعانىسىن قامتاماسىز ەتەتىن №44813 اسكەري بولىمىنە اتباسىن بۇردى.
بۇل – جەڭىستىڭ 65 جىلدىعى مەن وتان قورعاۋشىلار كۇنى قارساڭىنا ورايلاستىرىلعاندىقتان, ەلباسى ءبىرىنشى كەزەكتە اتالعان اسكەري ءبولىمنىڭ جاۋىنگەرلىك دايىندىعىنىڭ دەڭگەيىمەن تانىستى. ماسەلەن, №44813 اسكەري بولىمىندە نۇرسۇلتان ءابىش ۇلى زەنيتتىك-زىمىراندىق ديۆيزيوننىڭ شارتتى اۋە نىسانىن جويۋ ۇدەرىستەرىن تاماشالادى. قارۋلى كۇشتەردىڭ اۋە قورعانىسى كۇشتەرى باس قولباسشىسىنىڭ ورىنباسارى, گەنەرال-مايور وقاس ساپاروۆ ەلوردانىڭ اۋە كۇشتەرى قورعانىس جۇيەسىنىڭ ارتىقشىلىعى مەن ەرەكشەلىگى جونىندە ايتتى. ول, سونداي-اق, اسكەري بولىمدەگى زەنيتتىك-زىمىراندىق ديۆيزيوننىڭ شارتتى اۋە نىسانىن جويۋ ءىس-قيمىلدارىنا قاتىستى جان-جاقتى مالىمەت بەردى. ال قارۋلى كۇشتەردىڭ اۋە قورعانىسى كۇشتەرىنىڭ باس قولباسشىسى, گەنەرال-مايور الەكساندر سوروكين ەلوردانىڭ اۋە قورعانىسىن قامتاماسىز ەتەتىن زەنيتتىك-زىمىراندىق كەشەننىڭ تاجىريبەلىك تۇرعىداعى ءىس-قيمىلى جونىندە اڭگىمەلەدى.
سونىمەن قاتار, ەلباسىنا اۋە قارسىلاسىنىڭ ءتۇرلى دەڭگەيدەگى سوققىسىنا تويتارىس بەرەتىن كوپماقساتتاعى زىمىراندى كەشەن جاۋىنگەرلىك ەسەپ توبىنىڭ ءىس-قيمىلدارى دا جان-جاقتى تانىستىرىلدى.
مەملەكەت باسشىسى – قارۋلى كۇشتەردىڭ جوعارعى باس قولباسشىسى اۆياتسيانىڭ ارنايى جاۋىنگەرلىك تاپسىرمالاردان كەيىنگى ۇشىپ كەلۋ شارالارىن باعالادى. ماسەلەن, اۋە شەرۋىندە ارميالىق اۆياتسيانىڭ مي-17 تىكۇشاعى, ەكىنشى بۋىنداعى قوس سۋ-27 ۇشاعى, سونداي-اق, ەكى ميگ-31 جويعىش ۇشاعى ساپ تۇزەدى.
ەلباسى اۋە قورعاۋشىلارىنىڭ ءتاجىريبەلىك ساباقتارى اياقتالىسىمەن جاۋىنگەرلەردىڭ ارنايى تىگىلگەن شاتىرلى قالاشىعىندا اسكەري ءبولىمنىڭ جەكە قۇرامىمەن كەزدەسىپ, ولاردىڭ تىنىس-تىرشىلىگىمەن تانىستى, دالا اسحاناسىنان ءدام تاتتى.
اسقار تۇراپباي ۇلى, ءلايلا ەدىلقىزى.