مەملەكەت باسشىسى نۇرسۇلتان نازارباەۆ قازاقستان رەسپۋبليكاسى كاسىپوداقتارى فەدەراتسياسىنىڭ توراعاسى سيازبەك مۇقاشەۆتى قابىلدادى, دەپ حابارلادى قازاقستان رەسپۋبليكاسى پرەزيدەنتىنىڭ ءباسپاسوز قىزمەتى.
س.مۇقاشەۆ پرەزيدەنتتى رەسپۋبليكالىق قوعامدىق ۇيىمنىڭ اعىمداعى جۇمىسى, قازاقستانداعى جاڭا ەڭبەك قاتىناستارىنىڭ ورنىعۋ ۇدەرىسى, بيىلعى جىلى جازعا جوسپارلانعان كاسىپوداقتار فەدەراتسياسىنىڭ كەزەكتى سەزىنە جانە ەسەپ بەرۋ جينالىسىنا دايىندىق جاساۋ بارىسى تۋرالى حاباردار ەتتى.
اڭگىمەلەسۋ بارىسىندا اعىمداعى جىلى قكف-نىڭ قۇرىلعانىنا 20 جىل تولاتىنى اتاپ ءوتىلدى. وسى ۋاقىت ارالىعىندا كاسىپوداقتارعا مەملەكەت جانە پرەزيدەنت تاراپىنان قولداۋ كورسەتىلىپ كەلدى. مىسالى, 2008 جىلى جەزقازعاندا وتكەن بيزنەستىڭ الەۋمەتتىك جاۋاپكەرشىلىگى جونىندەگى رەسپۋبليكالىق فورۋمدا مەملەكەت باسشىسى “ۇجىمدىق شارت جاساساڭىزدار!” اتتى جالپىرەسپۋبليكالىق اكتسيا تۋرالى باستاما كوتەردى. وسىنىڭ ارقاسىندا 2009 جىلى مەملەكەتتىك ورگانداردىڭ قاتىسۋىمەن جۇمىس بەرۋشىلەر مەن كاسىپوداقتار اراسىندا 8 مىڭنان استام مەموراندۋمعا قول قويىلدى. سونىڭ ناتيجەسىندە, جۇمىس ورىندارىن قىسقارتۋعا جانە جۇمىسشىلاردىڭ ەڭبەكاقىلارىن ازايتۋعا جول بەرىلگەن جوق.
– پرەزيدەنت قازاقستاندا كاسىپوداقتار قوزعالىسىن دامىتۋدىڭ نەگىزگى باعىتتارىن ماقۇلدادى. مەملەكەت باسشىسىنىڭ قولداۋىنىڭ ارقاسىندا ءبىز قازاقستانداعى الەۋمەتتىك ارىپتەستىك ماسەلەسىن شەشتىك, – دەدى س.مۇقاشەۆ.
* * *
مەملەكەت باسشىسى نۇرسۇلتان نازارباەۆ قازاقستاننىڭ يۋنەسكو جانىنداعى تۇراقتى وكىلى ولجاس سۇلەيمەنوۆتى قابىلدادى, دەپ حابارلادى قازاقستان رەسپۋبليكاسى پرەزيدەنتىنىڭ ءباسپاسوز قىزمەتى.
اڭگىمەلەسۋ بارىسىندا قازاقستان مەن يۋنەسكو ىنتىماقتاستىعىن دامىتۋ ماسەلەلەرى, سونداي-اق بيىلعى جىلى ساۋىردە ۆاشينگتوندا وتكەن يادرولىق قاۋىپسىزدىك جونىندەگى جاھاندىق ءسامميتتىڭ جۇمىسىنىڭ قورىتىندىلارى تالقىلاندى.