سەناتتىڭ كونستيتۋتسيالىق زاڭناما, سوت جۇيەسى جانە قۇقىق قورعاۋ ورگاندارى كوميتەتىنىڭ دەپۋتاتتارى جوعارعى سوت باسشىلىعىمەن بىرگە ەلورداداعى اۋداندىق سوتتارعا ارنالعان جاڭا عيماراتتا بولدى, دەپ حابارلايدى Egemen.kz.
كەزدەسۋدى جوعارعى سوت توراعاسى جاقىپ اسانوۆ اشىپ, سوت تورەلىگى جانە جالپى ءسوت ىسىن جۇرگىزۋ ساپاسىن جاقسارتۋدى كوزدەيتىن جاڭالىقتار تۋرالى ايتتى.
سەناتورلار سوت وزگەرىستەرىنىڭ اۋقىمى مەن وسكەلەڭدىگىن جوعارى باعالادى. سەنات كوميتەتىنىڭ توراعاسى ۆلاديمير ۆولكوۆ قازاقستاندىق قۇقىقتىق جۇيە ءبىر ورىندا قالىپ قويماعانىن جانە شەتەلدىك وزىق تاجىريبە اركەز ەنگىزىلىپ كەلە جاتقانىن اتاپ ءوتتى. ول سونداي-اق بۇگىنگى تاڭدا پارلامەنتتە سوت جۇيەسىنىڭ جۇمىسىن جاقسارتۋعا ىقپال ەتەتىن 4 زاڭ جوباسى بار ەكەنىن اتاپ ءوتتى.
«زاڭ جوبالارى سوت جۇيەسىن قارجىلاندىرۋدىڭ, سۋديالاردى ىرىكتەۋدىڭ جاڭا ۇلگىسىن, قىلمىستىق ىستەر بويىنشا كاسساتسياعا قول جەتكىزۋدى ۇلعايتۋدى جانە داۋلاردى سوتقا دەيىن رەتتەۋدەن تىس تەتىكتەردى كەڭىنەن پايدالانۋدى كوزدەيدى, سونداي-اق باسقا دا بىرقاتار جاڭالىقتار بار. سونىمەن قاتار پارلامەنت دەپۋتاتتارى, ونىڭ ىشىندە سەناتورلار قاناتبەك سافينوۆ پەن ءلاززات سۇلەيمەن وسى زاڭ جوبالارىنىڭ ەكەۋىنە باستاماشى بولدى», دەپ اتاپ ءوتتى ۆلاديمير ۆولكوۆ.
جوعارعى سوتتىڭ اكىمشىلىك ىستەر جونىندەگى القا توراعاسى قانات مۋسين سەناتورلارعا جاڭا اكىمشىلىك سوت جۇمىسىنىڭ العاشقى قورىتىندىلارى مەن سوت ءىسىن جۇرگىزۋ پروبلەمالارى تۋرالى ايتىپ بەردى. جوعارعى سوتتىڭ سۋدياسى اسلان تۇكيەۆ ءوز كەزەگىندە دەپۋتاتتارعا سوت جۇيەسىن ودان ءارى جاڭعىرتۋ مەن سوت ءىسىن جۇرگىزۋدى جەتىلدىرۋ جونىندەگى ويلارىن ورتاعا سالدى.
كەزدەسۋدى قورىتىندىلاي كەلىپ, سوت جۇيەسىنە دەگەن سەنىم دەڭگەيىن ارتتىرۋ ءۇشىن زاڭ ۇستەمدىگىن قامتاماسىز ەتۋ قاجەتتىگى اتالىپ ءوتىلدى.