قر ءبىلىم جانە عىلىم مينيسترلىگى بالالاردىڭ قۇقىقتارىن قورعاۋ كوميتەتى الماتىدا 11-قاباتتان سەكىرىپ كەتكەن وقۋشىعا قاتىستى وقيعاعا تۇسىنىك بەردى, دەپ حابارلايدى Egemen.kz.
«الماتى قالاسىنداعى نازارباەۆ زياتكەرلىك مەكتەبىندە قايعىلى جاعدايدا قازا تاپقان 8-سىنىپ وقۋشىسىنىڭ اتا-انالارى مەن جاقىندارىنا قايعىلارىنا ورتاقتاسىپ, كوڭىل ايتامىز. قازىرگى ۋاقىتتا الەۋمەتتىك جەلىلەردە وقۋشىنىڭ قايتىس بولۋىنا بايلانىستى قاراما-قايشى اقپارات تاراپ جاتىر. قر بعم بالالاردىڭ قۇقىقتارىن قورعاۋ كوميتەتىنىڭ وكىلدەرى قازا تاپقان وقۋشىنىڭ اتا-اناسىمەن بايلانىستا. قۇقىق قورعاۋ ورگاندارىنىڭ قىزمەتكەرلەرى تەرگەۋ ءىس-شارالارىن جۇرگىزۋدە. تەرگەۋ مۇددەسى ءۇشىن جاعدايدىڭ ەگجەي-تەگجەيى جاريا ەتىلمەيدى», دەلىنگەن كوميتەت حابارلاماسىندا.
ءمالىم ەتىلگەندەي, تەرگەۋ ناتيجەلەرى بويىنشا قاجەتتى شارالار قابىلداناتىن بولادى. تەرگەۋ امالدارىنان كەيىنگى رەسمي قورىتىندىنى كۇتۋ قاجەت.
«اتا-انالاردى, مۇعالىمدەر مەن مەكتەپ باسشىلارىن بالالارمەن قارىم-قاتىناستا اسقان مەيىرىمدىلىك تانىتۋعا شاقىرامىز. ويتكەنى بالالارىمىزدىڭ ءومىرى مەن دەنساۋلىعى قوعامنىڭ باستى قۇندىلىعى بولىپ تابىلادى», دەدى قر بعم بالالاردىڭ قۇقىقتارىن قورعاۋ كوميتەتىنەن.