مەملەكەتتىك الەۋمەتتىك ساقتاندىرۋ قورىنان جۇمىسىنان ايىرىلعان 88,8 مىڭ ادامعا جاردەماقى تولەندى. بيىل 65,5 مىڭ ادامعا اتالعان تولەم العاش رەت تاعايىندالدى, دەپ حابارلايدى Egemen.kz.
قولدانىستاعى زاڭناماعا سايكەس, جۇمىستان بوساتىلعان جۇمىسكەرلەر مىندەتتى الەۋمەتتىك ساقتاندىرۋ جۇيەسىنە قاتىسۋ وتىلىنە جانە سوڭعى 24 ايداعى تابىسىنا بايلانىستى 1 ايدان 6 ايعا دەيىن جۇمىسىنان ايىرىلۋى بويىنشا الەۋمەتتىك تولەم الادى. تولەم جوعالعان كىرىستىڭ 40%-ىنا دەيىنگى مولشەردە ماسق قاراجاتى ەسەبىنەن جۇزەگە اسىرىلادى.
تولەم تاعايىنداۋ ءۇشىن جۇمىستان بوساتىلعان جۇمىسكەرگە:
eGov.kz پورتالىندا اۆتوريزاتسيالانۋ; «جۇمىسقا ورنالاستىرۋ جانە جۇمىسپەن قامتۋ» بولىمىندە «جۇمىس ىزدەۋشى ادامداردى تىركەۋ» قىزمەتىن تاڭداۋ; ونلاين-قىزمەتكە تاپسىرىس بەرىپ, بارلىق جولداردى تولتىرۋ جانە وعان ەتسق-مەن قول قويىپ, ءوتىنىمدى جىبەرۋ قاجەت; ءبىر كۇن ىشىندە تۇرعىلىقتى جەرىڭىزدەگى حالىقتى جۇمىسپەن قامتۋ ورتالىعى بوس جۇمىس ورىندارىن ۇسىنادى; ەگەر جۇمىس تابىلماسا, 3 جۇمىس كۇنى ىشىندە قاشىقتىقتان جۇمىسسىز مارتەبەسى بەرىلەدى (قاجەت بولعان جاعدايدا سىزگە حجقو قىزمەتكەرى قوسىمشا اقپارات جيناۋ ءۇشىن حابارلاسادى); بۇل قىزمەتتى ونلاين رەجيمدە ەلەكتروندى ەڭبەك بيرجاسى (enbek.kz) ارقىلى دا الۋعا بولادى.جۇمىسسىز رەتىندە تىركەلۋ تۋرالى مالىمەتتەر دايىن بولعان كەزدە ەڭبەك مينيسترلىگىنىڭ اقپاراتتىق جۇيەسى پرواكتيۆتى فورماتتا ماسق-تان تولەمدى تاعايىنداۋ بويىنشا قىزمەت كورسەتۋگە كەلىسۋ ءۇشىن ءموبيلدى تەلەفونعا SMS-حابارلاما جىبەرەدى. كەلىسكەن جاعدايدا SMS-حابارلاماعا جاۋاپ بەرۋ قاجەت. تولەم اۆتوماتتى تۇردە تاعايىندالادى.
ەسكە سالا كەتسەك, ماسق قاراجاتى ەسەبىنەن جۇمىستان ايىرىلعان جاعدايدا تولەنەتىن الەۋمەتتىك تولەم جۇمىستان شىعۋ سەبەپتەرىنە قاراماستان جۇزەگە اسىرىلادى.
قر ەڭبەك جانە حالىقتى الەۋمەتتىك قورعاۋ مينيسترلىگى ەلەكتروندى ەڭبەك بيرجاسى ارقىلى حالىقتى جۇمىسپەن قامتۋ ورتالىقتارىنىڭ قاشىقتىقتان قىزمەت كورسەتۋ فۋنكتسيونالىن ىسكە قوستى. بۇل جۇمىسسىزداردى تىركەۋ جانە ازاماتتاردىڭ جۇمىسپەن قامتۋدى قولداۋ بويىنشا مەملەكەتتىك قىزمەتتەردى, ونىڭ ىشىندە جۇمىسىنان ايىرىلۋ بويىنشا الەۋمەتتىك تولەمدەردى الۋ راسىمدەرىن جەڭىلدەتۋگە مۇمكىندىك بەردى. ەندى بارلىعىن ينتەرنەت, كومپيۋتەر جانە ەلەكتروندىق تسيفرلىق قولتاڭبا ارقىلى جاساۋعا دا بولادى.