ەلورداعا ىرگەلەس جىبەك جولى اۋىلىنداعى حالقىمىزدىڭ ارداقتى پەرزەنتى, ءانشى-كومپوزيتور ءيمانجۇسىپ قۇتپان ۇلى اتىنداعى ورتا مەكتەپتە تۇعىرلى تۇلعاعا ارنالعان شاعىن مۋزەي جۇمىس ىستەيدى. وعان ءيمانجۇسىپ اتامىزدىڭ نەمەرەسى, بەلگىلى عالىم راۋشان كوشەنوۆا باس-كوز بولىپ وتىر. وسىندا اردا ازاماتقا قاتىستى ءبىراز جادىگەر ساقتالعان. سونىڭ ىشىنەن ءيمانجۇسىپتىڭ بالاسى نۇرحانعا سىيلاعان ەرتوقىمى تۋرالى ايتساق دەيمىز.
بۇل جادىگەر جايىندا بىزگە نۇرحان قاريانىڭ قىزى راۋشان اڭگىمەلەپ بەردى.
– اكەم ماعان كوزى تىرىسىندە ەكى امانات جۇكتەدى, – دەپ باستادى ءسوزىن ول كىسى. − ءبىرىنشىسى – ءيمانجۇسىپ اتامنىڭ سۇيەگى جاتقان جەردى انىقتاۋ, ەكىنشىسى – سۋرەتىن تابۋ. بۇگىندە اكەمنىڭ ەكى اماناتى ورىندالدى. اتامنىڭ ءۇش ۇلى, جەتى قىزى بولعان. ءوزى اتىلعاننان كەيىن ۇرپاقتارى دا كوپ قۋعىن كورگەن. اكەم ءوز اكەسىنەن ون جاسىندا جەتىم قالدى. سودان باس ساۋعالاپ وزبەكستانعا بارادى, سول جاقتان مايدانعا الىنىپ, سوعىس اياقتالعاننان كەيىن, ياعني 1946 جىلى عانا ەلگە ورالىپ, تۋىستارىن ىزدەپ, تاۋىپ العان.
ءيمانجۇسىپ اتام الپىستان اسقاندا اكەم ومىرگە كەلىپتى. سوندا ول كىسى اعايىنداردى جيناپ, توي جاساعان. ءبىر شەبەرگە «بالاما سىيىم» دەپ بار جابدىعىمەن ايشىقتى ەرتوقىم جاساتقان. بۇل ەرتوقىم سول. كەيىن «بالاپان باسىنا, تۇرىمتاي تۇسىنا» دەيتىن قيىن ۋاقىت تۋدى. سول جىلدارى ەرتوقىمدى اكەمنىڭ تۋعان اعاسى سەيىتحان كوكەم ساقتاپ قالىپ, كەيىن باۋىرى ەلگە امان-ەسەن ورالعاسىن وزىنە بەرگەن. اكەم 1996 جىلى دۇنيەدەن وزدى. كەيىن ءىنىم سەيىتبەك ەرتوقىمدى, جۇگەنى, جابۋىمەن بىرگە «اتام اتىنداعى مەكتەپتە تۇرسىن» دەپ مۋزەيگە تاپسىردى, – دەدى تەكتىنىڭ تۇياعى.