تاراز قالاسىنىڭ تۇرعىنى كوپقاباتتى ءۇيدىڭ ءتورتىنشى قاباتىنا ورمەلەپ شىعىپ, بالكونعا قامالىپ قالعان ءبۇلدىرشىندى قۇتقاردى, دەپ حابارلايدى Egemen.kz
تارازدا كامەلەتكە تولماعان قىز پاتەردىڭ بالكونىنا شىققان كەزدە ەسىك جابىلىپ, قايتىپ كىرە الماعان. سول كەزدە ءوتىپ بارا جاتقان جاس جىگىت جىلاعان ءبۇلدىرشىندى كورىپ, 4-ءشى قاباتتاعى ءۇيدىڭ بالكونىنا ورمەلەپ شىعىپ, ەسىكتى اشىپ بەرگەن. جىگىت دۇكەنگە كەتكەن قىزدىڭ اناسى قايتىپ كەلگەنگە دەيىن ونىڭ جانىندا بولعان.
«كامەلەتكە تولماعاندار ءىسى جونىندەگى ۋچاسكەلىك پوليتسيا ينسپەكتورلارى قىزدىڭ اتا-اناسىمەن پروفيلاكتيكالىق اڭگىمە جۇرگىزدى. قازىرگى ۋاقىتتا تاراز قالاسىنىڭ پوليتسيا باسقارماسى 1-ءشى پوليتسيا ءبولىمىنىڭ باسشىلىعى جاس جىگىتتى ماراپاتتاۋ تۋرالى ماسەلەنى قاراستىرۋدا», دەيدى وبلىستىق پوليتسيا دەپارتامەنتىنىڭ وكىلى.