ءبىر اكتىلى بالەت كەشى

«وتكەنگە ساياحات» («A Journey of a Memory») – كورەرمەندى بەيسانا الەمىنە جەتەلەيتىن بىرەگەي قويى­لىم. بۇل ءبىر اكتىلى بالەتتىڭ يدەياسى اتاۋىنان-اق كورىنەدى. جاس نەمىس بالەت­مەيستەرى رايموندو رەبەكتىڭ ونەر­گە دەگەن كوزقاراسى بولەك, ول − ادام جا­دىنىڭ ەلەسكە تولى كۇيىن قالاي سەز­دىرۋ كەرەگىن وزىنشە توپشىلايدى.

تالاي عاسىرلىق تاريحى بار كونە التىن جاقتاۋلار مەن ەسكى شىراعداننىڭ يميتاتسياسى قولدانىلعان اسەرلى ستسەنوگرافيا جانە فرەدەريك شوپەن, ەتسيو بوسسو, فيليپپ گلاسس پەن فازىل سايدىڭ رومانتيكالىق اۋەندەرىنە قويىلعان زاماناۋي پلاستيكا – وتكەن شاق, وسى شاق پەن بولاشاق جايلى وي قوزعايدى.

«بالەت كەيىپكەرى وسى شاق پەن وت­كەن شاقتىڭ ەكى ورتاسىندا قالعانداي كۇي كەشەدى. ايناعا قاراپ ءوزىن عانا ەمەس, ءوزىن مازالاعان ويلارىن دا كور­گەندەي بولادى. ءومىرىنىڭ جارقىن شاقتارى ءتۇرلى كينوفيلمدەردىڭ كادر­لارى ىسپەتتى جارق ەتىپ, جادىندا جاڭ­عىرادى», دەيدى حورەوگراف رايموندو رەبەك.

حورەوگراف ريكاردو امارانتەنىڭ ارگەنتينالىق ۇلى كومپوزيتورلار استور پياتستسوللا مەن پابلو تسيگلەر­دىڭ مۋزىكاسىنا ساحنالاعان «A Fuego Lento» («باياۋ جالىن») نەوكلاسسيكالىق بالەتى – بالەتمەيستەردىڭ ماحاببات, ىنتىق سەزىم مەن قۇشتارلىق جايلى ەركىن رومان­تيكالىق فانتازياسى. ىشكى قۋاتى مەن حاريزماسىنىڭ ارقاسىندا بۇل سپەك­تاكلدى ارتىستەر دە, كورەرمەن دە ۇناتادى. سەبەبى وندا ورىنداۋ تەحنيكاسى مەن تانگونىڭ عاجايىپ ءيىرىمى شەبەر ورىلگەن.