يندۋستريا جانە ينفراقۇرىلىمدىق دامۋ ءمينيسترى بۇيرىعىمەن جولاۋشىلار مەن جۇكتى تاسىمالداۋ ەرەجەلەرىنە وزگەرىس ەنگىزىلدى. وعان سايكەس, قالاارالىق اۆتوبۋستاردا ەلەكتروندى بيلەت ەنگىزىلەدى, دەپ حابارلايدى Egemen.kz.
ەلەكتروندى بيلەتتى قاعاز بيلەتتەرمەن قاتار قولدانۋعا بولادى. بۇيرىقتا ەلەكتروندى قۇجاتتى پايدالانۋ ءتارتىبى دە جازىلعان.
«ەگەر جولاۋشى ەلەكتروندى جول ءجۇرۋ قۇجاتىن (بيلەت) ساتىپ السا, وندا اۆتوبۋسقا مىنگەندە ەلەكتروندى بيلەت نەمەسە جەكە باستى كۋالاندىراتىن قۇجاتتى كورسەتۋ كەرەك. جەكە كۋالىكتى تسيفرلىق قۇجاتتار قىزمەتى ارقىلى كورسەتۋگە دە بولادى. ال ەلەكتروندى جول ءجۇرۋ قۇجاتى بولسا, قاعاز بيلەت بەرىلمەيدى», دەلىنگەن بۇيرىقتا.
حالىقارالىق, قالاارالىق جانە وبلىسارالىق رەيستەرگە جاڭا ۇلگىدەگى بيلەتتى اۆتوۆوكزال, اۆتوستانتسيا, جولاۋشىلارعا قىزمەت كورسەتۋ پۋنكتتەرى نەمەسە ەلەكتروندى بيلەت ساتۋ جۇيەلەرى ارقىلى ساتىپ الۋعا بولادى. جۇكتى تاسىمالداۋ اقىسى دا سولاي تولەنەدى. بيلەت العاندا جەكە كۋالىكتىڭ تۇپنۇسقاسىن نەمەسە تسيفرلىق قۇجاتتار قىزمەتىندەگى ەلەكتروندى نۇسقاسىن كورسەتۋ كەرەك. اۆتوبۋسقا مىنگەندە باقىلاۋشىلار بارلىق قۇجاتتى تەكسەرەدى.
بۇدان بولەك, بۇيرىقتا اۆتوبۋس پەن تاكسي جۇرگىزۋشىلەرىنە قاتىستى وزگەرىستەر بار. اتاپ ايتقاندا, قالاارالىق اۆتوبۋستاردىڭ جۇرگىزۋشىلەرى رەيس الدىندا جانە ودان كەيىن مەديتسينالىق تەكسەرىستەن ءوتۋ كەرەك. ال ونىڭ مەرزىمى رەيسكە دەيىن جانە رەيستەن كەيىن جارتى ساعاتتان اسپاۋعا ءتيىس. تاكسي جۇرگىزۋشىلەرىنە دە تۋرا سونداي تالاپ قويىلىپ وتىر.