الماتىدا دوستىق ۇيىندە مەملەكەتتىك حاتشى قىرىمبەك كوشەرباەۆ قازاقستاننىڭ حالىق ءارتىسى, ەكى مارتە مەملەكەتتىك سىيلىقتىڭ يەگەرى دوسحان جولجاقسىنوۆقا «وتان» وردەنىن تابىس ەتتى, دەپ حابارلايدى Egemen.kz.
مەرەيلى مەرەيتوي قارساڭىندا پرەزيدەنت جارلىعىمەن ۇلتتىق مادەنيەتتى, كينەماتوگرافيانى جانە تەاتر ونەرىن دامىتۋعا قوسقان ايرىقشا ەڭبەگى ءۇشىن تانىمال اكتەر جانە رەجيسسەر دوسحان جولجاقسىنوۆ «وتان» وردەنىمەن ماراپاتتالعان بولاتىن.
ونەر قايراتكەرىنىڭ مەرەيتوي قۇرمەتىنە وراي مەملەكەتتىك حاتشى قىرىمبەك كوشەرباەۆ تۇڭعىش پرەزيدەنت – ەلباسى ن.نازارباەۆتىڭ جانە پرەزيدەنت ق.توقاەۆتىڭ قۇتتىقتاۋىن وقىپ, ەلىمىزدىڭ مادەنيەتى مەن ونەرىنە قوسقان زور ۇلەسىن, سان قىرلى شىعارماشىلىعى جولى تۋرالى ايتىپ ءوتتى.
ءوز كەزەگىندە مادەنيەت جانە سپورت ءمينيسترى اقتوتى رايىمقۇلوۆا ونەر مايتالمانىن قۇتتىقتاپ, كينو, تەاتر ونەرىندەگى ەڭبەگى تۋرالى ايتىپ ءوتتتى. جيىن ارى قاراي الماتى قالاسى اكىمىنىڭ ورىنباسارى ەرجان باباقۇماروۆ, «ۇلتتىق كينونى قولداۋ مەملەكەتتىك ورتالىعىنىڭ باسقارما توراعاسى ەسەتجان قوسۋباەۆ, قازاقستاننىڭ ەڭبەك سىڭىرگەن ارتىستەرى ليديا كادەنوۆا, ايدوس بەكتەمىروۆ, كومپوزيتور تولەگەن مۇحامەدجانوۆ, تاعى دا باسقا قوعام جانە ونەر قايراتكەرلەرى قۇتتىقتادى.
جاستايىنان ونەر سالاسىندا جۇرگەن دوسحان جولجاقسىنوۆ تەاتر مەن كينودا شوقتىعى بيىك كەيىپكەرلەردى سومداعانىنا حالقى ءتانتى. حالىق اندەرى مەن قازىرگى قازاق كومپوزيتورلارى اندەرىن شەبەر ورىنداۋشى رەتىندە كەڭىنەن تانىلعان د.جولجاقسىنوۆ ۇلتتىق كينو ونەرىنىڭ دامۋىنا ءوز ۇلەسىن قوسىپ, «گاۋھارتاس», «دالاداعى قۋعىن», «التىن كۇز», «ومپا», «اق بارىستىڭ ۇرپاقتارى», «كوشپەندىلەر», «قۇنانباي», ء«بىرجان سال» جانە باسقا دا فيلمدەرگە ءتۇسىپ, تەاتر جانە كينو سالاسىندا ەكى جۇزدەن استام رولدەردى سومدادى.