اتىراۋ قالاسىنداعى نازارباەۆ زياتكەرلىك مەكتەبىندە كۇننەن ەلەكتر قۋاتىن جينايتىن ستانسا ىسكە قوسىلدى. «نازارباەۆ زياتكەرلىك مەكتەپتەرى» دەربەس ءبىلىم بەرۋ ۇيىمىنىڭ باسقارما ءتورايىمى كۇلاش ءشامشيدينوۆانىڭ ايتۋىنشا, كۇن ەلەكتر ستانساسى ارقىلى وقۋشىلاردى بالامالى ەنەرگيا سالاسىندا عىلىمي-زەرتتەۋ جۇمىستارىن جۇرگىزۋگە باۋلۋ جوسپارلانىپ وتىر.
– بۇدان ءۇش جىل بۇرىن استانا ەكونوميكالىق فورۋمى اياسىندا Shell كومپانياسىمەن «كۇن ەنەرگياسى – مەكتەپتەرگە» پيلوتتىق جوباسىن ىسكە اسىرۋ ماقساتىندا مەموراندۋمعا قول قويىلعان ەدى. اتالعان پيلوتتىق جوبا «جاسىل» ەكونوميكاعا بىرتىندەپ كوشۋ, پارنيكتىك گازداردى قىسقارتۋ, جاڭارتىلاتىن ەنەرگيا كوزدەرىن دامىتۋ سىندى بىرنەشە ماقساتتى ىسكە اسىرۋدى كوزدەيدى. سونداي-اق وقۋشىلاردىڭ ناقتى عىلىمداردى (STEM) زەرتتەۋگە قىزىعۋشىلىعىن وياتىپ, ەكولوگيالىق مادەنيەتىن قالىپتاستىرۋدى ماقسات ەتتىك, – دەدى ك.ءشامشيدينوۆا.
قازىر Shell كومپانياسىنىڭ دەمەۋشىلىگىمەن ىسكە قوسىلعان كۇن ەلەكتر ستانسالارى نۇر-سۇلتان, اقتاۋ جانە ورال قالالارىنداعى نازارباەۆ زياتكەرلىك مەكتەپتەرىندە جۇمىس ىستەپ تۇر. ال بيىلعى مامىردا اتىراۋداعى ءبىلىم ورداسىندا كۇن پانەلدەرىنىڭ قۇرىلىسى باستالعان بولاتىن. بۇل ستانسا مەكتەپتىڭ جىلدىق ەنەرگيا شىعىنىن 30 پايىزعا ۇنەمدەۋگە مۇمكىندىك بەرەدى. مەكتەپ وقۋشىلارى كۇن ەلەكتر ستانساسىنىڭ كومەگىمەن عىلىمي جوبالار مەن زەرتحانالىق جۇمىستاردى جۇرگىزۋدى قولعا الماق.
– ەڭ باستىسى, شاكىرتتەرىمىز ماماندىق تاڭداۋ, جۇمىسقا ورنالاسۋ كەزىندە الەمدە ەكولوگيا ماسەلەسىنىڭ ماڭىزدى ەكەنىن تۇسىنەتىن بولادى. سول سەبەپتەن, مۇنداي يننوۆاتسيالىق جوبالاردى مەكتەپتەرگە ەنگىزۋدى قولعا الدىق, – دەيدى ك.ءشامشيدينوۆا.
كۇن ەلەكتر ستانساسى مەكتەپتىڭ ستاديونىنا ورناتىلدى. ونىڭ ۇزىندىعى – 73, بيىكتىگى 4 مەترگە جەتەدى. كۇن باتارەياسىنىڭ تىرەكتەرى 13 بلوكقا ءبولىنىپتى. مۇندا سپورتتىق ءىس-شارالار كەزىندە كورەرمەندەر ءۇشىن ەكى ساتىلى ورىندىق قويىلعان. ەندى مۇنداي كۇن ەلەكتر ستانساسىنىڭ قۇرىلىسىن تۇركىستان قالاسىنداعى نازارباەۆ زياتكەرلىك مەكتەبىندە جۇرگىزۋ جوسپارلانىپ وتىر.
اتىراۋ وبلىسى