ۇكىمەت باسشىسى ستراتەگيالىق جوسپارلاۋ مەن بيۋدجەتتىك باعدارلامالارعا قاتىستى قارجىنى ءتيىمدى جۇمساۋ قاجەتتىگىن ەسكەرتتى
كەشەگى وتكەن ۇكىمەت وتىرىسىن اشقان بەتتە ۇكىمەت باسشىسى كارىم ءماسىموۆ ءتيىستى مەملەكەتتىك ورگاندارعا تاپسىرما بەردى.
پرەمەر-مينيستر مەكسيكا تۇبەگىندە “بريتيش پەترولەۋم” كومپانياسىنىڭ قالقىمالى قوندىرعىسىنىڭ اپاتقا ۇشىراۋىنا بايلانىستى ۇلكەن قايعىلى وقيعانىڭ ورىن العاندىعىن, مۇنىڭ ءوزى امەريكا قۇراما شتاتتارى سەكىلدى ءىرى ەلگە زارداپتارىن تيگىزگەندىگىن, ال ول وسى كومپانيانىڭ جۇمىسىنا قاتىستى كوپ سۇراقتار تۋىنداتاتىندىعىن ايتا كەلە مۇناي جانە گاز, قورشاعان ورتانى قورعاۋ مينيسترلەرى ساۋات مىڭباەۆ پەن نۇرعالي اشىموۆكە جەدەل جۇمىس توبىن قۇرىپ, كاسپيدەگى مۇناي ءوندىرۋ جايىنا تەكسەرۋ ءجۇرگىزۋدى تاپسىردى. “وسى كوميسسيانى قۇرۋعا بايلانىستى ۇسىنىستى بۇگىن كەشكە دەيىن ازىرلەپ, ماعان بايانداڭدار” دەدى.
سونىمەن قاتار پرەمەر-مينيستر ءوزىنىڭ ءبىرىنشى ورىنباسارى ومىرزاق شوكەەۆكە ازىق-ءتۇلىك باعالارىنىڭ وسۋىنە جول بەرمەۋ ءماسەلەلەرىمەن اينالىساتىن جۇمىس توبىن جەدەل قۇرۋدى تاپسىردى. “وكىنىشكە وراي, جەكەلەگەن ءونىمدەر باعالارىنىڭ وسۋگە قاراي بەت العاندىعى بايقالىپ وتىر. سوندىقتان ەكونوميكالىق دامۋ جانە ساۋدا, اۋىل شارۋاشىلىعى مينيسترلىگىن تارتا وتىرىپ, وسى ماسەلەنى تەز ارادا تالقىلاڭىزدار. كەلەسى سەيسەنبىدە وسى ماسەلەگە ارناپ بىرلەسكەن وتىرىس وتكىزەتىن بولامىز” دەدى ۇكىمەت باسشىسى.
پرەمەر-ءمينيستردىڭ تاپسىرمالارى باسەكەلەستىكتى قورعاۋ اگەنتتىگىنىڭ باسشىسى ءماجيت ەسەنباەۆقا دا قاتىستى بولدى. حالىق جەدەل سەزىنەتىن ازىق-ت ۇلىك, جانار-جاعارماي باعالارى باقىلاۋدا ۇستالۋى قاجەتتىگى باسا ايتىلدى.
مۇنان كەيىن ۇكىمەت وتىرىسىندا قارالعان ستراتەگيالىق جوسپارلاۋ, بيۋدجەتتىك باعدارلامالاردى ورىنداۋ ماسەلەسىنە قاتىستى پرەمەر-مينيستر كەڭسەسىنىڭ باسشىسى عابيدوللا ءابدىراحمانوۆتىڭ, ەكونوميكالىق دامۋ جانە ساۋدا ءمينيسترى جانار ايتجانوۆانىڭ باياندامالارى تىڭدالدى. عابيدوللا ءابدىراحمانوۆ ءوز سوزىندە مەملەكەتتىك ورتالىق جانە جەرگىلىكتى ورگانداردىڭ ستراتەگيالىق جوسپارلار مەن بيۋدجەتتىك باعدارلامالاردى ورىنداۋ بارىسىندا كەيبىر قايشىلىقتارعا جول بەرگەندىگىن, بۇل ماسەلەلەردە ورتاق ءبىر تۇسىنىكتىڭ قالىپتاسپاي كەلە جاتقانداعىن اتاپ كورسەتسە, جانار ايتجانوۆا ستراتەگيالىق جوسپارلاۋ قاعيداتتارىن ەنگىزۋ مەملەكەتتىك ورگانداردىڭ جۇمىسىندا ناقتى ناتيجەلەرگە قول جەتكىزۋگە ءمۇمكىندىك بەرەتىندىگىنە توقتالدى. اتالعان ماسەلەدە بەلگىلى ءبىر ءناتيجەلەرگە جەتۋ ءۇشىن, بىرىنشىدەن, ستراتەگيالىق, ەكونوميكالىق جانە بيۋدجەتتى جوسپارلاۋدىڭ ءوزارا بايلانىسىن قامتاماسىز ەتۋ, ەكىنشىدەن, مەملەكەتتىك ورگانداردىڭ قىزمەتىن ستراتەگيالىق ماقساتتارعا قاراي باعىتتاۋ, ۇشىنشىدەن, مەملەكەتتىك ورگاندار قىزمەتىنە ءتيىستى باعالاۋ ولشەمدەرىن ەنگىزۋ قاجەت.
ۇكىمەت باسشىسى كارىم ءماسىموۆ اتالعان ماسەلەنى قورىتىندىلاي كەلە بىرقاتار تاپسىرمالار بەردى. پرەمەر-مينيستر بيۋدجەتتىك ۇدەرىستىڭ تۇراقتىلىعى ءبىرىنشى ورىندا تۇرۋ كەرەكتىگىن باسا ايتتى. ء“بىز قازىر داعدارىستان شىعىپ كەلەمىز, مەملەكەت باسشىسى بەلگىلەپ بەرگەن باعىتقا سايكەس ىلگەرى جىلجۋ ۇستىندەمىز, مۇنداي كەزدە بيۋدجەتتىك ۇدەرىستىڭ تۇراقتىلىعىنىڭ ماڭىزى وتە زور” دەي كەلە ەلىمىزدىڭ قازىناسىنىڭ كىرىسى قانشالىقتى بولسا, شىعىنى دا سونشالىقتى بولۋى قاجەتتىگىن ەسكەرتتى. بۇعان ءاربىر مينيسترلىك پەن ۆەدومستۆو وزدەرىنە تاپسىرىلعان قىزمەتتى دۇرىس ۇيىمداستىرا العاندا عانا قول جەتكىزە الاتىندىعىن ايتتى.
پرەمەر-مينيستر كۇن ءتارتىبىنە قويىلىپ وتىرعان ماسەلەگە قاتىستى باسقا دا بىرقاتار تاپسىرمالار بەردى.
سۇڭعات ءالىپباي.