قر پارلامەنتى سەناتىنىڭ توراعاسى ماۋلەن اشىمباەۆ الەمدىك جانە ءداستۇرلى دىندەر كوشباسشىلارىن اۋعانستانداعى تۇراقتىلىققا قول جەتكىزۋ ءۇشىن كۇش بىرىكتىرۋگە شاقىردى, دەپ حابارلايدى Egemen.kz.
«ازاماتتاردىڭ قۇقىقتارىن قورعاۋ, اۋعانستانداعى ءدىندارلاردىڭ قۇقىقتارىن قورعاۋ ماسەلەلەرى, اسىرەسە جاقىن ورنالاسقان ەلدەر ءۇشىن وتە ماڭىزدى. ءبىز - ورتالىق ازيا ەلدەرى - اۋعانستانمەن شەكارالاسپىز. سوندىقتان بۇگىن بۇل ماسەلە تالقىلانۋدا. ءبىز اۋعانستانداعى تۇراقتىلىق پەن قاۋىپسىزدىكتى قامتاماسىز ەتۋ ءۇشىن كورشىلەرىمىزبەن, حالىقارالىق ۇيىمدارمەن جۇمىس ىستەيمىز. سونداي-اق ەلدەگى ىقتيمال گۋمانيتارلىق داعدارىستىڭ الدىن الۋ ءۇشىن. بۇل وتە كۇردەلى ءارى وتكىر ماسەلە, سوندىقتان بۇل جەردە كۇش-جىگەردى بىرىكتىرۋ قاجەت», دەدى ماۋلەن اشىمباەۆ سەزد حاتشىلىعىنىڭ XIX وتىرىسىندا.
ول قازاقستاننىڭ وسى ماسەلەدە بارلىق مۇددەلى ەلدەرمەن جەمىستى جانە ءونىمدى ىنتىماقتاستىققا دايىن ەكەنىن اتاپ ءوتتى.
«قازاقستان حالىقارالىق ۇيىمدارمەن, دىنارالىق ۇيىمدارمەن جانە باسقا ەلدەرمەن كۇش-جىگەرىن بىرىكتىرۋگە مۇددەلى. ەرتە مە, كەش پە اۋعانستان تەرروريزمنەن, ەكسترەميزمنەن, ەسىرتكىدەن ازات تاۋەلسىز ەلگە اينالۋى ءۇشىن بەلسەندى جۇمىس ىستەۋ كەرەك», دەپ اتاپ ءوتتى سەنات توراعاسى.
بۇعان دەيىن قازاقستان پرەزيدەنتى قاسىم-جومارت توقاەۆ ۇقشۇ ەلدەرىنە اۋعانستاننىڭ جاڭا بيلىكتەرىمەن بەيرەسمي ديالوگتى باستاۋدى ۇسىنعان بولاتىن. مەملەكەت باسشىسىنىڭ ايتۋىنشا, جاقىن ارادا ەلىمىز وتكىر ازىق-ت ۇلىك داعدارىسىنا تاپ بولۋى مۇمكىن جانە بۇل حالىقتىڭ ءماجبۇرلى كوشىپ كەتۋىنە بايلانىستى جاھاندىق اۋقىمعا يە بولادى.
ەسكە سالا كەتسەك, نۇر-سۇلتاندا الەمدىك جانە ءداستۇرلى دىندەر ليدەرلەرى سەزى حاتشىلىعىنىڭ XIX وتىرىسى وتۋدە. قازاقستان ەلورداسىنا ءتۇرلى ەلدەردەن حالىقارالىق جانە ءدىني ۇيىمداردىڭ وكىلدەرى كەلدى. وتىرىستا 2022 جىلى وتەتىن الەمدىك جانە ءداستۇرلى دىندەر كوشباسشىلارىنىڭ VII سەزىنە دايىندىق تالقىلانۋدا.