تاۋەلسىزدىكتىڭ وتىز جىلدىعى مەن ۇستازدار كۇنىنە وراي باس قالاداعى №83 ورتا مەكتەپتىڭ الدىنا ۇلى اعارتۋشى ىبىراي التىنسارينگە ەسكەرتكىش-بيۋست قويىلدى.
سالتاناتتى ءىس-شارانىڭ اشىلۋىندا ءسوز العان نۇر-سۇلتان قالاسى اكىمىنىڭ ورىنباسارى اسحات ورالوۆ ەل تاريحىنداعى ايتۋلى تۇلعالاردى ۇلىقتاۋ – ءبىزدىڭ پارىزىمىز دەي كەلىپ: «بۇگىن ءبىز سانالى عۇمىرىن اعارتۋ ىسىنە ارناعان ۇلى تۇلعامىزدىڭ ءبيۋستىن اشۋعا جينالىپ وتىرمىز. بۇل اعارتۋشىنىڭ 180 جىلدىق مەرەيتويىنا ارنالعان ايتۋلى شارا دەپ سانايمىن. الداعى تاڭدا ءدال وسى №83 ورتا مەكتەبىنە ىبىراي ءالتىنساريننىڭ ەسىمى بەرىلەدى دەپ جوسپارلاپ وتىرمىز» دەسە, اقىن, مەملەكەتتىك سىيلىقتىڭ لاۋرەاتى نەسىپبەك ايت ۇلى: ء«بىر اللاعا سيىنىپ, كەل بالالار وقىلىق», دەپ جىرلاپ, تورعاي دالاسىندا العاش رەت قازاق مەكتەبىنىڭ قوڭىراۋىن سىڭعىرلاتقان ىبىراي اتامىزدىڭ ءمۇسىنىنىڭ ەلوردانىڭ تورىنەن بوي كوتەرۋى − قازاق ءۇشىن ۇلكەن ماقتانىش!», دەپ تولعاندى.
ال ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتىنىڭ رەكتورى ەرلان سىدىقوۆ بۇگىندە ەلىمىز ۇلى ۇستاز ارمانداعان زامانعا قول جەتكىزگەنىن ايتىپ, كەيىنگى جىلدارداعى ءبىلىم سالاسىندا جۇزەگە اسقان جەمىستى جۇمىستارعا توقتالدى.
− جاقىندا ەل پرەزيدەنتى قاسىم-جومارت توقاەۆ 1000 مەكتەپ سالۋ باعدارلاماسىن العا قويدى. ەلوردامىزدا تاياۋ جىلدارى 50-گە تارتا مەكتەپ سالىنباقشى. قازىردىڭ وزىندە ءۇش اۋىسىمداعى مەكتەپتەر جوق. وسىنىڭ ءبارى ءبىلىم جانە عىلىم سالاسىندا جۇرگىزىلىپ جاتقان رەفورمالاردىڭ ارقاسى دەپ بىلەمىن. مۇعالىمدەردىڭ مارتەبەسىن كوتەرۋ باعىتىندا دا جاڭاشا شەشىمدەر قابىلداندى. ۇستاز بولام دەگەن ستۋدەنتتەردىڭ شاكىرتاقىسى كوتەرىلدى. مىنە, مۇنىڭ ءبارى پەداگوگتەردىڭ دارەجەسى مەن ابىرويىنىڭ كوتەرىلۋىنە سەپتىگىن تيگىزەدى» دەدى بەلگىلى عالىم.
ايتا كەتەيىك, باس قالانىڭ تورىنە كەلىپ ورىن تەپكەن ىبىراي التىنسارين ءبيۋستىنىڭ بيىكتىگى, تۇعىرىمەن قوسا العاندا ءتورت مەتردەن اسادى. تۋىندى اۆتورى – نۇربول قاليەۆ.