شەنەۋنىكتەردىڭ شەتەلدىك بانكتەردەگى شوتى قانشا؟

مەملەكەتتىك كىرىستەر كوميتەتى توراعاسىنىڭ ورىنباسارى جايدار ىڭكارباەۆتىڭ ايتۋىنشا, ەلباسى نۇرسۇلتان نازارباەۆتىڭ بەس ينس­تيتۋتسيونالدىق رەفورمانى ىسكە اسى­رۋ جونىندەگى 100 ناقتى قادام – ۇلت جوسپارىنىڭ 42-قادامىن جانە قازاقستان رەسپۋبليكاسىنىڭ سىبايلاس جەمقورلىققا قارسى ستراتەگياسىن ورىنداۋ ءۇشىن 2021 جىلدىڭ 1 قاڭتارىنان باستاپ, جالپىعا بىر­دەي دەكلاراتسيالاۋ كەزەڭ-كەزەڭى­م­ەن ەنگىزىلىپ جاتىر. «جەكە تۇل­عا­لار ءبىرىنشى جىلى اكتيۆتەر مەن مىن­دەت­تە­مەلەر تۋرالى كىرىس دەكلاراتسياسىن تاپسىرادى, كەيىن نەگىزدەمە بولسا, جىل سايىن كىرىستەرى مەن مۇلكى تۋرالى دەكلاراتسيانى ۇسىنادى. الدىمەن مەم­لەكەتتىك قىزمەتشىلەر مەن ولارعا تەڭەستىرىلگەن ادامدار مەن جۇبايلارى دەكلاراتسيا تاپسىردى, سەبەبى بۇل قىز­مەتكەرلەر وعان دايىن بولدى» دەيدى ول.

مەملەكەتتىك قىزمەتكەرلەردەن كەيىن 2023 جىلدىڭ 1 قاڭتارىنان باستاپ مەملەكەتتىك مەكەمەلەر مەن كۆازيمەملەكەتتىك سەكتور قىز­مەت­كەر­لەرى مەن ولاردىڭ جۇ­باي­لا­رى اكتيۆتەرى مەن مىندەتتەمەلەرى تۋرالى كىرىس دەكلاراتسياسىن ۇسىنادى. ودان كەيىن 2024 جىلدىڭ 1 قاڭتارىنان بيزنەس وكىلدەرى, ياعني زاڭدى تۇلعالار مەن جەكە كاسىپكەرلەردىڭ باسشىلارى, قۇرىلتايشىلارى جۇبايلارىمەن تاپسىرادى. سوڭعىسى – 2025 جىلدىڭ 1 قاڭتارىندا وتەدى. وندا باسىندا باسپاناسى, مۇلكى بار بارلىق ازامات دەكلاراتسيالاۋدان وتەدى. ءسويتىپ, باس-اياعى 13 ميلليون ادام دەكلاراتسيالاۋ جۇيەسىنە قاتىسادى.

دەكلاراتسيادا ازاماتتار مىناداي مالىمەتتەردى كورسەتۋى ءتيىس: شەت مەملەكەتتە تىركەلگەن نە تىر­كەۋ­گە جاتاتىن جىلجىمايتىن مۇ­لىك, كولىك قۇرالدارى; شەتەلدىك بانك شوتتارىنداعى ايلىق ەسەپتىك كورسەتكىشتەن 1000 ەسە اساتىن قارا­جات; تۇرعىن ءۇي قۇرىلىسىنا ۇلەس­تىك قاتىسۋ تۋرالى شارت بويىنشا سومالار; قازاقستان رەسپۋبليكاسىنان تىس جەردە قۇرىلعان زاڭدى تۇلعانىڭ جارعىلىق كاپيتالىنا قاتىسۋ ۇلەسى; با­عالى قاعازدار, تۋىندى قارجى قۇ­رال­دارى; ينۆەستيتسيالىق التىن; زيات­كەرلىك مەنشىك, اۆتورلىق قۇقىق وبەكتىلەرى; 10 000 ايلىق ەسەپ­تىك كورسەتكىش شەگىندەگى سومادا كورسە­تى­لە­تىن قولما-قول اقشا;

اكتيۆتەر مەن مىندەتتەمەلەر تۋرالى دەكلاراتسيا تۇرعىلىقتى جەرى بويىنشا, ياعني جەكە تۇلعا تىركەلگەن سالىق ورگانىنا ۇسىنىلادى.

دەكلاراتسيانى ەلەكتروندى تۇردە سالىق تولەۋشىنىڭ كابينەتى Cabinet.salyk.kz, «ەلەكتروندى ۇكىمەت» پورتالى egov.kz ارقىلى, سونداي-اق e-Salyq Azamat جانە eGov mobile ءموبيلدى قوسىمشالارى ارقىلى تاپسىرۋعا بولادى.

تابىس ەتۋ مەرزىمىنىڭ اياقتالۋىنا قاراي, ياعني 2021 جىلعى 15 قىركۇيەككە قوسا العاندا, دەكلاراتسيانى 497 مىڭ ادام تاپسىرعان.

قابىلدانعان 512 مىڭ دەكلا­راتسيانىڭ ىشىندە ەڭ كوپ تارالعان ءوتىنىم بەرۋ ءتاسىلى بولىپ e-Salyq Azamat موبيلدىك قوسىمشاسى انىق­تالعان, ونىڭ كومەگىمەن دەكلا­را­تسيالاردىڭ 54%-ى ۇسىنىلعان. «سالىق تولەۋشىنىڭ كابينەتى» جانە سونو ارقىلى – 40%, «ەلەكتروندى ۇكىمەت» پورتالى ارقىلى – 5%.

دەكلاراتسيانى قاعاز تۇرىندە ۇسىن­عان­دار جالپى دەكلاراتسيا تاپ­سى­رۋشىلاردىڭ 0,1%-ىن قۇراعان.

جالپىعا بىردەي دەكلاراتسيالاۋ كەزىندە مەملەكەتتىك قىزمەتكەرلەردىڭ شەتەلدە قانشا بانكتىك شوتتارى, جىلجىمايتىن م ۇلىكتەرى مەن كو­لىك­تەرى بارى ەسەپتەلگەن. ج.ىڭكار­باەۆتىڭ ما­لىمدەۋىنشە, دەكلاراتسيانى ۇسىن­عان 497 مىڭ جەكە تۇلعانىڭ 440-ىندا شەتەلدىك بانكتەردە جەكە شوتى بار. تسيفرلارعا سەنسەك, قازاقستاندىق شەنەۋنىكتەر اقشاسىن رەسەي فەدەراتسياسىندا, امەريكا قۇراما شتاتتارىندا, شۆەيتساريا بانكتەرىندە ساقتاعاندى ءتاۋىر كورەدى.

سونداي-اق 494 جەكە تۇلعا 26 ەلدەگى 666 جىلجىمايتىن م ۇلىك وبەكتىسىن دەكلاراتسيالاعان, ونىڭ ىشىندە 436 وبەكتى – رەسەيدە, 44-ءى – بىرىككەن اراب امىرلىكتەرىندە, 38-ءى تۇركيادا جانە ت.ب

1 030 جەكە تۇلعا 49 شەت مەملەكەتتە تىركەلگەن 1 198 كولىك قۇ­رالىن قۇ­جاتتا كورسەتكەن. ول كولىك­تەر­دىڭ 292-ءسى – رەسەيدە, 235-ءى – ار­مە­نيا­دا, 221-ءى – جاپونيادا, 162-ءسى – گەر­ما­نيا­دا بولىپ شىقتى. باسقا دا ەل­دەر­­دە تىركەلگەن كولىكتەر بار. بىراق ەڭ كوپ كولىك تىركەلگەن ەلدەر وسى اتال­­عاندار.

دەكلاراتسيا تاپسىرعان 47 ازا­ماتتىڭ ءبىزدىڭ ەلدەن تىس 57 زاڭدى تۇلعاعا قاتىسۋ ۇلەسى بار. بۇل رەسەي, كيپر, اراب امىرلىكتەرى سىندى ەلدەر­دە­گى كاسىپورىنداردىڭ, مەكە­مە­لەر­دىڭ اك­تسيونەرى, قۇرىل­تاي­شى­لاردىڭ ءبىرى دەگەن ءسوز.

1585 جەكە تۇلعا 11 ەلدە 1 603 جىل­جىمايتىن م ۇلىك وبەكتىسىنىڭ قۇ­رىلىسىنا قاتىسۋ ۇلەسىنىڭ بار ەكەنىن كورسەتتى. بۇعان قوسا, 116 ادام ينۆەستيتسيالىق التىندى جاريالادى; 25 ەلدە 918 ادام باعالى قاعازدارى بارىن ۇسىندى; 635 ينۆەستيتسيالىق پاي قورلارىندا 608 ادامنىڭ پايى بار; 212 ادامنىڭ 218 زياتكەرلىك مەنشىك, اۆتورلىق قۇقىق وبەكتىسى بار; 355 ادامنىڭ دەبيتورلىق, 578 ادامنىڭ كرەديتورلىق بەرەشەگى بار. 1 704 جەكە تۇلعا 2 327 نىساندى سەنىمدى باسقارۋعا بەرگەن.

بۇگىندە جالپىعا بىردەي دەكلاراتسيالاۋ ەرەجەلەرىن ءتۇسىندىرۋ ءۇشىن بىرىڭعاي بايلانىس ورتالىعى ىسكە قوسىلعان. جالپى جەكە تۇلعالاردىڭ كىرىستەرى مەن مۇلكىن جالپىعا بىردەي دەكلاراتسيالاۋعا قاتىستى تولىق اقپاراتتى قازاقستان رەسپۋبليكاسى قارجى مينيسترلىگى مەملەكەتتىك كىرىستەر كوميتەتىنىڭ رەسمي سايتىنىڭ Kgd.gov.kz «جالپىعا بىردەي دەكلاراتسيالاۋ» بولىمىنەن الۋعا بولادى. اپتا سايىن سارسەنبى كۇندەرى مەملەكەتتىك كىرىستەر دەپارتامەنتتەرى Zoom ارقىلى «سۇراق-جاۋاپ» فورماتىندا ءتۇسىندىرۋ جۇرگىزىلەتىنىن دە ەستەرىڭىزگە سالامىز.