ۆاكتسينا الماعان ستۋدەنتتەردىڭ ساباققا كەلۋىنە تىيىم سالىندى

قانىش ساتباەۆ اتىنداعى قازاق ۇلتتىق عىلىمي-تەحنيكالىق ۋنيۆەرسيتەتى - Satbayev University كوروناۆيرۋسقا قارسى ۆاكتسينا الماعان ستۋدەنتتەرگە كۇندىزگى وقۋ تۇرىنە قاتىسۋعا تىيىم سالدى. بۇيرىق 1 قازاننان باستاپ كۇشىنە ەنەدى.

بۇل تۋرالى ۋنيۆەرسيتەت ستۋدەنتتەرى informburo.kz اگەنتتىگىنە حابارلاعان. 

Satbayev University وسىنداي بۇيرىق شىعارعانىن راستادى.

«بۇل ءبىزدىڭ ۋنيۆەرسيتەتتىڭ ستۋدەنتتەرى مەن وقىتۋشىلارىنىڭ اراسىندا ۇجىمدىق يممۋنيتەت قالىپتاستىرۋ ءۇشىن جاسالىپ وتىر. وكىنىشكە قاراي, بىزدە كوروناۆيرۋس جۇقتىرۋ فاكتىلەرى تىركەلدى. بۇگىنگى كۇنگە دەيىن 12 جاعداي انىقتالعان, ولار ەمدەلىپ ۇلگەردى.  جاڭا دەرەك جوق», دەدى ۋنيۆەرسيتەتتىڭ الەۋمەتتىك-مادەني دامۋ جونىندەگى پرورەكتورى مانسۋر ءالىمحانوۆ.

پرورەكتور ۋنيۆەرسيتەتتىڭ ستۋدەنتتەرى مەن وقىتۋشىلارىنىڭ قاۋىپسىزدىگى ءۇشىن بارلىعى جاسالىپ جاتقانىن اتاپ ءوتتى. ۋنيۆەرسيتەتتە 10 مىڭنان استام ستۋدەنت بار, ونىڭ ىشىندە 5500-دەن استامى ۆاكتسينا العان, بۇل ەكپە الۋعا ءتيىس قۇرامنىڭ 62%-ن قۇرايدى. 3600-گە جۋىق ستۋدەنت ۆاكتسينا المادى. 2000 ستۋدەنت ەكپەدەن بوساتىلعان. ونىڭ 1142-ىندە مەديتسينالىق سەبەپ بار, 174-ءى كوروناۆيرۋسپەن اۋىرىپ جازىلعان, 1781-ءى كامەلەتكە تولماعان. پروفەسسورلىق-وقىتۋشىلىق قۇرامنىڭ 80%-عا جۋىعى ۆاكتسينا سالدىرعان, شامامەن 18%-ى مەديتسينالىق سەبەپپەن بوساتىلعان.

ء«بىزدىڭ باستى مىندەتىمىز - باسقا ستۋدەنتتەردىڭ قاۋىپسىزدىگى. ستۋدەنتتەر ادام قۇقىقتارىنىڭ بۇزىلۋى جانە ت.ب. تۋرالى ايتادى, تۇسىنەمىن. الايدا ادام قۇقىعى باسقا ادامداردىڭ قۇقىعى بۇزىلعان جەردە اياقتالادى. ەگەر ءسىز ەكپە الماعان بولساڭىز, اۋىرىپ قالساڭىز, شەكتەۋ شارالارىن تاعى دا قاتاڭداتاۋعا ءماجبۇر بولامىز. قۇداي ساقتاسىن, ارينە. ءبىز تىيىم سالىپ جاتقان جوقپىز, الدىن الۋ جۇمىستارىن جۇرگىزىپ جاتىرمىز», دەدى ول.

پرورەكتور ەكپە الماعان ستۋدەنتتەردىڭ ونلاين ءبىلىم الۋعا كوشەتىنىن ايتتى.