ءماجىلىس توراعاسى نۇرلان نىعماتۋلين قازاقستانعا رەسمي ساپارمەن كەلگەن تۇركيا ۇلى ۇلتتىق جينالىسىنىڭ توراعاسى مۇستافا شەنتوپپەن كەزدەستى, دەپ جازادى Egemen.kz.
ءماجىلىس سپيكەرى تۇركيانىڭ قازاقستان تاۋەلسىزدىگىن ءبىرىنشى بولىپ مويىنداعان ەل ەكەنىن ايتا كەلە, قر تۇڭعىش پرەزيدەنتى-ەلباسى نۇرسۇلتان نازارباەۆتىڭ باۋىرلاس ەلمەن قارىم-قاتىناستى ىلگەرىلەتۋگە ەرەكشە نازار اۋدارعانىن اتاپ ءوتتى. نۇرلان نىعماتۋليننىڭ ايتۋىنشا, بۇگىندە مەملەكەت باسشىسى قاسىم-جومارت توقاەۆ تا نۇر-سۇلتان مەن انكارا اراسىنداعى سەرىكتەستىكتى نىعايتۋ جۇمىسىن جالعاستىرىپ جاتىر.
بۇل رەتتە ءماجىلىس توراعاسى قازاقستان تاۋەلسىزدىگىنىڭ 30 جىلدىعى قارساڭىندا تۇركيا پارلامەنتى توراعاسىنىڭ رەسمي ساپارى باۋىرلاس ەلدەر اراسىنداعى شىنايى دوستىق پەن سىيلاستىقتىڭ جارقىن كورسەتكىشى ەكەنىن اتاپ ءوتتى.
«قازاقستان - تۇركيا ءۇشىن ەرەكشە مەملەكەت. ەكى ەل اراسىنداعى قارىم-قاتىناستىڭ قالىپتاسۋى مەن دامۋىندا ماڭىزدى ءرول قازاقستاننىڭ تۇڭعىش پرەزيدەنتى-ەلباسىعا تيەسىلى. ال ءبىزدىڭ باۋىرلاس حالىقتار اراسىنداعى رۋحاني بايلانىس قارىم-قاتىناسىمىزدى نىعايتۋدا ۇلكەن ءرول اتقارادى», دەدى شەنتوپ.
سونىمەن قاتار تاراپتار قازاقستان مەن تۇركيا اراسىنداعى ساۋدا-ەكونوميكالىق جانە مادەني-گۋمانيتارلىق ءوزارا ءىس-قيمىل ماسەلەلەرىن تالقىلادى.
بۇل رەتتە تۇرىك كاسىپكەرلەرىنىڭ قارجى, كولىك جانە لوگيستيكا سالالارىن, اۋىل شارۋاشىلىعى مەن ءتۋريزمدى دامىتۋعا ارنالعان ينۆەستيتسيالىق جوبالارعا قاتىسۋ مۇمكىندىگى ءسوز بولدى. نۇرلان نىعماتۋلين ءماجىلىس دەپۋتاتتارى پىسىقتاپ جاتقان «ونەركاسىپتىك ساياسات تۋرالى» زاڭ جوباسى شەتەلدىك ينۆەستورلارعا, ونىڭ ىشىندە تۇرىك كومپانيالارىنا جاڭا مۇمكىندىك اشاتىنىن العا تارتتى.
مۇستافا شەنتوپ 28 قىركۇيەكتە تۇركىستان قالاسىندا وتەتىن تۇركىتىلدەس مەملەكەتتەر پارلامەنتتىك اسسامبلەياسىنىڭ X پلەنارلىق وتىرىسىنا قاتىسادى.