«ۇزدىك پەداگوگ» اتاعىنىڭ يەگەرلەرى توسبەلگى مەن 3 ملن تەڭگە كولەمىندە اقشالاي سىياقى الادى, دەپ جازادى Egemen.kz قر ءبىلىم جانە عىلىم مينيسترلىگىنىڭ ءباسپاسوز قىزمەتىنە سىلتەمە جاساپ.
بايقاۋعا قاتىسۋشىلار اراسىندا 132 مەكتەپكە دەيىنگى جانە ورتا ءبىلىم بەرۋ, 41 تەحنيكالىق جانە كاسىپتىك ءبىلىم بەرۋ ۇيىمىنىڭ پەداگوگى بار. ولاردىڭ بارلىعى اۋداندىق, قالالىق جانە وبلىستىق كەزەڭنىڭ قورىتىندىسى بويىنشا ۇسىنىلدى.
«وتكەن جىلدان باستاپ كونكۋرسقا قاتىسۋ ءۇشىن وتىنىمدەر, ماتەريالدار ەلەكتروندىق فورماتتا قابىلدانادى. «ۇزدىك پەداگوگ» اتاعىنا ءبىلىم بەرۋ ۇيىمدارىندا جۇمىس ىستەيتىن جانە كەمىندە بەس جىل ۇزدىكسىز پەداگوگيكالىق ءوتىلى بار مۇعالىمدەر ۇمىتكەر بولا الادى. كونكۋرس شەڭبەرىندە پەداگوگتىڭ ءبىلىم بەرۋدى دامىتۋعا قوسقان ۇلەسى, پەداگوگ قىزمەتىنىڭ ناتيجەلىلىگى جانە ونىڭ كاسىبي شەبەرلىگى ەسكەرىلەتىن بولادى», دەپ اتاپ ءوتتى قر ءبىلىم جانە عىلىم مينيسترلىگى مەكتەپكە دەيىنگى جانە ورتا ءبىلىم كوميتەتىنىڭ ءتورايىمى گۇلميرا كارىموۆا.
رەسپۋبليكالىق كونكۋرستىق كوميسسيانىڭ قازىلار القاسىنىڭ قۇرامىنا قوعامدىق بىرلەستىكتەردىڭ, ۇكىمەتتىك ەمەس ۇيىمداردىڭ, اتا-انالار قاۋىمداستىعىنىڭ, «اتامەكەن» ۇكپ وكىلدەرى, جۋرناليستەر, بەلسەندى پەداگوگتەر, قازاقستاندىق سالالىق ءبىلىم جانە عىلىم قىزمەتكەرلەرى كاسىپوداعىنىڭ وكىلدەرى جانە تاعى باسقالار كىردى.
ايتا كەتەيىك, «ۇزدىك پەداگوگ» رەسپۋبليكالىق بايقاۋى 2012 جىلدان بەرى وتكىزىلىپ كەلەدى. وسى ۋاقىت ىشىندە كونكۋرس اياسىندا 500-گە جۋىق مەكتەپكە دەيىنگى جانە ورتا, تەحنيكالىق جانە كاسىپتىك ءبىلىم بەرۋ ۇيىمىنىڭ پەداگوگى ماراپاتتالدى.
«ۇزدىك پەداگوگ» اتاعىنىڭ يەگەرلەرى توسبەلگى مەن 3 ملن تەڭگە (1000 اەك) كولەمىندە اقشالاي سىياقى الادى.
رەسپۋبليكالىق ماراپاتتان باسقا, «پەداگوگ مارتەبەسى تۋرالى» زاڭ شەڭبەرىندە اكىمدىكتەر بىرجولعى اقشالاي تولەمدەرى بار جەرگىلىكتى ناگرادالاردى تاعايىندادى.
مىسالى, پاۆلودار وبلىسىندا وبلىستىق بايقاۋدىڭ جەڭىمپازدارى 300 اەك مولشەرىندەگى سىياقىعا يە بولدى. شىعىس قازاقستان وبلىسىندا جەرگىلىكتى بيۋدجەت قاراجاتىنان 800 مىڭ تەڭگەدەن استام سىياقى تابىس ەتىلدى. باسقا دا وڭىرلەردە ۇزدىك مۇعالىمدەر 300 اەك كولەمىندە بىرجولعى اقشالاي سىياقى الدى.