ونىڭ سۋرەتتەرىنىڭ ءبارى – ءتىرى. ءتىپتى, سىزگە ءتىل قاتىپ تۇرعانداي, الدەبىر ويدىڭ اۋەنىن ەسكە سالادى. بوياۋدى كەنەپكە توگەردە ايقىن ءھام شىنايى. سودان با زاماناۋي تۋىندىلاردىڭ بىرىندەي كورىنەدى. ايتسە دە ول – XIX عاسىردىڭ ادامى. الۋان تۇستەردىڭ ارپالىسىنان ءلاززات الىپ, كوركەم ونەردىڭ كەرۋەنىنە ىلەسكەن كلود مونە. بۇل – داڭقتى سۋرەتشىنىڭ «جولى».
كارتينانىڭ قۇپياسى دا سول, قولمەن ۇستاعانداي سول ءساتتى كوزبەن كورگەندەي ەتىپ ورىندالۋىندا. التىن كۇننىڭ جارقىراعان ساۋلەسىنە شومىلعان كۇزگى ورمان كورىنىسى. سۋرەتشى ءۇشىن مەيىرىمدى مەزگىل, مەرەيلى مەزەت. ءارتۇرلى فورمادا جەرگە كىلەمدەي جايىلعان جۇمساق جاپىراقتار مەرەكەلىك كوڭىل كۇي سىيلايدى. ازداپ ساعىنىش تا بار. جازدان قالعان ەستەلىكتەر قوڭىز كۇزدىڭ اسپانىندا قالىقتايدى. سۇلۋلىق ءھام تىنىشتىقپەن تىنىستاعان تابيعاتتىڭ تاڭعاجايىپ كەيپى جاعىمسىز ويدان تازارۋعا جول اشىپ تۇرعانداي.
تۇستەردىڭ مۇڭدى جانە جۇمساق رەڭكتەرى قىزىقتى كومبيناتسيا تۇزگەن. سۋرەتشى جۇمساق سارعىشتىقپەن سۇيىلتىلعان جىلى قوڭىر ءھام جاسىل رەڭكتەردى قولدانادى. كەسكىندەمەدە وڭ جاق بۇرىشىندا پەيزاجعا ءتان بالعىندىق بار. ونى ۋىلجىعان جاسىل تۇستەر ايشىقتاپ تۇر. اسپاندا سۇر رەڭكتەر باسىم بولعانىنا قاراماستان, مۇندا جىلۋ مەن مەيىرىم, ساعىنىش پەن سۇيىسپەنشىلىك ۇيالاعان. سۋرەت جازدىڭ وتكەنىن حابارلاپ تۇرعانداي. كۇزدىڭ قارا سۋىعى كەلسە دە ءاربىر مەزگىلدەن جانىڭىزعا راحات ىزدەۋگە شاقىرادى.
بۇل كەسكىندەمە «تابيعات اياسىنداعى تاڭعى اس» رەپرودۋكتسياسى نەگىزىندە جازىلعان. وقىرماندى ەلىكتىرىپ اكەتەتىن دەتالدارعا تولى. اشىق اسپان اياسىندا كۇزدىڭ سۇلۋ بەينەسىنە كوز قاداپ, تامسانۋعا ەشكىم كەدەرگى جاسامايدى. ۋ دا شۋ قالانىڭ قاربالاسىنان قاشىپ, تىنىشتىققا بويسۇنۋ. كەسكىندەمەگە قاراپ, ءوز ويلارىڭىزبەن سەرۋەندەپ, جاسىرىن تىلەكتەرىڭىزدى ءۇنسىز تابيعاتقا جايىپ سالۋىڭىزعا بولادى. فرانتسۋز سۋرەتشىسى كلود مونە وسىنى ايتقىسى كەلگەندەي.
بۇل – كۇز بەن سۋرەتشىنىڭ ءبىر-بىرىنە دەگەن ءمولدىر ماحابباتى.