يران يسلام رەسپۋبليكاسىنان 53 قانداسىمىز نۇر-سۇلتان قالاسىنا كەلىپ جەتتى. اتاجۇرتقا ورالعان قانداستارىمىزدى اقپارات جانە قوعامدىق دامۋ مينيسترلىگى, دۇنيەجۇزى قازاقتارىنىڭ قاۋىمداستىعى مەن «وتانداستار قورى» كەاق وكىلدەرى كۇتىپ الدى.
قانداستارىمىز ءۇشىن كۇتىپ الۋ ءىس-شاراسى ۇيىمداستىرىلىپ, نۇر-سۇلتان قالاسىنىڭ كورىكتى جەرلەرىنە ەكسكۋرسيا وتكىزىلىپ, ارنايى اس بەرىلدى.
ەندى يراننان كەلگەن قانداستار مەملەكەت ۇسىناتىن وڭىرلىك كۆوتا اياسىندا سولتۇستىك قازاقستان وبلىسىنا قونىستانادى.
ەسكە سالا كەتەيىك, بۇعان دەيىن 14 قىركۇيەكتە قازاقستانعا قونىس اۋدارۋشىلاردىڭ كەزەكتى لەگى كەلگەن ەدى. بارلىعى 13 ادامدى (3 وتباسى) «وتانداستار قورى» كەاق وكىلدەرى كۇتىپ الىپ, سولتۇستىك قازاقستان وبلىسىنا شىعارىپ سالدى.
اتالعان كوش قازاقستان سىرتقى ىستەر مينيسترلىگى, ەلىمىزدىڭ يرانداعى ەلشىلىگى مەن گورگان قالاسىنداعى باس كونسۋلدىعى جانە دۇنيەجۇزى قازاقتارىنىڭ قاۋىمداستىعى مەن «وتانداستار قورى» كەاق-تىڭ ۇيىمداستىرۋىمەن, ماڭعىستاۋ جانە سولتۇستىك قازاقستان وبلىستارى اكىمدىكتەرىنىڭ قولداۋىمەن جۇزەگە اسىرىلۋدا.
«ەگەمەن-اقپارات»