قازاقستاندىقتار اۋماقتىق دەپارتامەنت باسشىلارىنا ءبىلىم بەرۋ سالاسىنداعى قانداي دا ءبىر پروبلەمالار تۋرالى تىكەلەي حابارلاي الادى. بۇل تۋرالى ءبىلىم جانە عىلىم مينيسترلىگى حابارلادى, دەپ جازادى Egemen.kz.
«ونىڭ قاتارىندا مەكتەپتە اقشا جيناۋ, مۇعالىمدەردى وزىنە ءتان ەمەس جۇمىسقا تارتۋ, پەداگوگيكالىق ەتيكانى بۇزۋ, ءبىلىم بەرۋ ۇيىمدارىندا قاۋىپسىزدىك جۇيەلەرى ەلەمەنتتەرىنىڭ بولماۋى نەمەسە جۇمىس ىستەمەۋىنە (بەينەباقىلاۋ كامەرالارى, دابىل باتىرمالارى) قاتىستى جانە ت.ب. ماسەلەلەر بولۋى مۇمكىن», دەپ جازادى بعم ءباسپاسوز قىزمەتى.
بۇعان دەيىن قر بعم ءبىلىم جانە عىلىم سالاسىندا ساپانى قامتاماسىز ەتۋ كوميتەتى ازاماتتاردىڭ ءوتىنىشى ءۇشىن جەدەل جەلى تەلەفونىن قوسقان بولاتىن. وتكەن دەمالىس كۇندەرى كوميتەتكە 300-گە جۋىق قوڭىراۋ شالىنىپ, حابارلاما تۇسكەن.
ەستەرىڭىزگە سالا كەتسەك, وقۋ جىلىنىڭ باسىندا قر ءبىلىم جانە عىلىم ءمينيسترى ازاماتتاردىڭ ءوتىنىشىن, شاعىمى مەن ۇسىنىسىن جەرگىلىكتى اتقارۋشى ورگانداردىڭ (اكىمدىكتەردىڭ) قاراماعىنداعى ءبىلىم باسقارماسى باسشىلارىنا جەدەل قاراستىرۋدى تاپسىرعان بولاتىن. ولار مەكتەپتەرگە, سونىمەن بىرگە بۇكىل وقۋ پروتسەسىن ۇيىمداستىرۋعا بايلانىستى ماسەلەلەرمەن اينالىسادى.
«ازاماتتار جاۋاپتى تۇلعالارعا تىكەلەي حابارلاسىپ, كەرى بايلانىس پەن قابىلدانعان شارالار تۋرالى اقپاراتتى ۋاقىتىلى الا الادى», دەپ جازىلعان حابارلامادا.
دەپارتامەنت باسشىلارىنىڭ بايلانىس نومەرىن بعم-نىڭ الەۋمەتتىك جەلىلەردەگى پاراقشاسىنان كورۋگە بولادى.