الدىن الا مالىمەتتەر بويىنشا, قازىرگى پرەمەر-مينيستر دجاستين تريۋدو باسقاراتىن ليبەرالدىق پارتيا كانادادا مەرزىمىنەن بۇرىن وتكەن پارلامەنتتىك سايلاۋدا جەڭىسكە جەتتى, دەپ حابارلايدى Egemen.kz.
قازىرگى مالىمەت بويىنشا تريۋدو پارتياسى 32,2% جيناپ, 338 سايلاۋ وكرۋگىنىڭ 158-دە جەڭىسكە جەتكەن.
تريۋدو كانادالىقتارعا قولداۋ كورسەتكەنى ءۇشىن العىس ايتىپ ۇلگەردى.
«راحمەت, كانادا! ليبەرالدى كومانداعا سەنىم ارتىپ, جارقىن بولاشاقتى تاڭداعانىڭىز ءۇشىن بارىڭىزگە راحمەت. ءبىز COVID-پەن كۇرەستى اياقتايمىز. ءبىز كانادانى العا جىلجىتامىز», دەپ جازدى ول تۆيتتەردە.
كاناداداعى قاۋىمدار پالاتاسى 338 مۇشەدەن تۇرادى, ولاردىڭ ارقايسىسى ءبىر-ءبىر وكرۋگتىڭ اتىنان سايلانادى. دەپۋتاتتار ءتورت جىلعا (نەمەسە ودان دا از) سايلاناتىن بولادى.
ايتا كەتەيىك, تريۋدو 2015 جىلدان بەرى كانادا پرەمەر-ءمينيسترى قىزمەتىن اتقارىپ كەلەدى.