الماتى وبلىسىنىڭ پوليتسياسىندا قازاقستاندىق اۋىراتلەت البەرت ليندەردىڭ ولىمىنە قاتىستى قىلمىستىق ءىس قوزعالدى, دەپ حابارلايدى Egemen.kz.
«الماتى وبلىسىنىڭ پوليتسيا دەپارتامەنتى دەرەك بويىنشا قر قك-نىڭ 105-بابى ء«وزىن-ءوزى ولتىرۋگە دەيىن جەتكىزۋ» بويىنشا سوتالدى تەرگەۋ باستالعانىن حابارلايدى. سوت-مەديتسينالىق ساراپتاما تاعايىندالدى», دەدى الماتى وبلىسى پوليتسيا دەپارتامەنتىنىڭ ءباسپاسوز قىزمەتى وكىلدەرى.
ەسكە سالايىق, بۇعان دەيىن اۋىر اتلەتيكا فەدەراتسياسى سپورتشى قايتىس بولعانىن حابارلاعان بولاتىن. دەرەككوز مالىمەتىنشە, البەرت ليندەر ءوز-وزىنە قول سالعان. باسقا دەرەكتەر ءالى بەلگىسىز.
البەرت ليندەر 25 جاستا, تالدىقورعان قالاسىنىڭ تۋماسى. ول جاستار چەمپيونى, ازيا چەمپيونى, ۋنيۆەرسيادانىڭ جەڭىمپازى جانە رەكوردشىسى, قازاقستاننىڭ بىرنەشە دۇركىن چەمپيونى بولعان.