قر مەملەكەتتىك حاتشىسى قىرىمبەك كوشەرباەۆ XVII ەۋرازيالىق مەديا فورۋمنىڭ اشىلۋىندا ءسوز سويلەدى, دەپ حابارلايدى, Egemen.kz.
مەملەكەتتىك حاتشى ءوز سوزىندە ءداستۇرلى فورۋمدا كوپتەگەن وزەكتى ماسەلەلەر تالقىلاناتىنىن اتاپ ءوتتى.
«وتكەن كەزەڭدە ءبىز اۋقىمدى وقيعالاردىڭ كۋاسى بولدىق. الەم وزگەردى. پاندەميا, جاھاندىق ەكونوميكالىق قۇلدىراۋ, مەملەكەتتەر اراسىنداعى سەنىمسىزدىك, الەمنىڭ جەتەكشى دەرجاۆالارى اراسىنداعى تەحنولوگيالىق سوعىس, ەتيكالىق نورمالاردىڭ وزگەرۋى جانە تاعى باسقالارى ادامداردى بىرىكتىرىپ قانا قويماي, الۋان ءتۇرلى كوزقاراستارعا دا ءبولدى. ءتۇرلى پىكىرلەردى تالقىلاپ, كونسەنسۋس ىزدەيتىن حالىقارالىق پلاتفورماعا اينالعان ەۋرازيالىق مەديافورۋمنىڭ ميسسياسى دا وسىنىسىمەن ماڭىزدى. ءبىز جاڭا ەلوردا – نۇر-سۇلتاندا تاۋەلسىزدىگىمىزدىڭ 30 جىلدىعىنا وراي قۇرمەتتى ارىپتەستەر مەن دوستاردى قارسى الۋدامىز», دەدى قىرىمبەك كوشەرباەۆ ەۋرازيالىق مەديافورۋمنىڭ اشىلۋى كەزىندە.
مەملەكەتتىك حاتشى فورۋمنىڭ تابىستى جۇمىسىنا ەلدەگى كوشباسشىلار ەرەكشە ءمان بەرەتىنىن اتاپ ءوتتى جانە فورۋم قاتىسۋشىلارىنا تابىس پەن سىندارلى ديالوگ تىلەدى.