ۇلكەن ونەر دە, ۇلى شىعارمالار دا كوپ وقىعان, كوپ ىزدەنگەن, كوپتى كورگەن ادامداردان شىعادى ەكەن. كەشە الماتىداعى قازاقتىڭ مەملەكەتتىك م.اۋەزوۆ اتىنداعى اكادەميالىق دراما تەاترىندا قازاقستاننىڭ حالىق ءارتىسى, مەملەكەتتىك سىيلىقتىڭ لاۋرەاتى ءسابيت ورازباەۆتىڭ «ءومىردىڭ ءوزى – تەاتر» اتتى كىتابىنىڭ تۇساۋى كەسىلىپ, مادەني شاراعا الماتىنىڭ يگى جاقسىلارى ورتاقتاسىپ, ۇلتىمىزدىڭ تالاي ۇلىلارى ۇلىقتالدى.
ۇلكەن ونەر دە, ۇلى شىعارمالار دا كوپ وقىعان, كوپ ىزدەنگەن, كوپتى كورگەن ادامداردان شىعادى ەكەن. كەشە الماتىداعى قازاقتىڭ مەملەكەتتىك م.اۋەزوۆ اتىنداعى اكادەميالىق دراما تەاترىندا قازاقستاننىڭ حالىق ءارتىسى, مەملەكەتتىك سىيلىقتىڭ لاۋرەاتى ءسابيت ورازباەۆتىڭ «ءومىردىڭ ءوزى – تەاتر» اتتى كىتابىنىڭ تۇساۋى كەسىلىپ, مادەني شاراعا الماتىنىڭ يگى جاقسىلارى ورتاقتاسىپ, ۇلتىمىزدىڭ تالاي ۇلىلارى ۇلىقتالدى.
قاي جاعىنان الساڭ دا تاعىلىمدى وتكەن زيالىلار توعىسۋىندا بەلگىلى قوعام جانە ونەر قايراتكەرلەرى, اقىن-جازۋشىلار, اكتەردىڭ ساحنالاس ارىپتەستەرى مەن تۋعان-تۋىسقاندارى تابىلدى. تۇساۋكەسەر راسىمىنە جاستار كوپتەپ جينالعانى قۋانتتى.
كيەلى دە كىرپياز ونەردىڭ قىرى مەن سىرىن تۇگەل مەڭگەرگەن بيىك تە تەرەڭ ينتەللەكت يەسى رەتىندە مويىندالعان ءسابيت اعامىزدىڭ قولعا تيگەن جاڭا كىتابى قاي ولشەمگە سالساڭ دا سۇبەلى دۇنيە – سىرساندىقتىڭ اۋزى اشىلعانداي سالماقتى ەكەنىن زامانداستارى تىلگە تيەك ەتتى.
وسىلايشا, جانسارايى جارىق اكتەر كەيىنگىلەرگە ونەگە جولىن كورسەتىپ, ونەرتانۋ عىلىمىنىڭ قورجىنىنا ولشەۋسىز ەستەلىكتەرىن قوستى. كىتاپتىڭ تۇساۋكەسەر ءراسىمىن جۇرگىزگەن اشىربەك سىعاي ايتقانداي, اقيقاتىندا بۇل كىتاپتا قىرشۋ مەن قىتىمىرلانۋ, قاباق ءتۇيىسۋ جوق. تارلان تالانت يەسى وزىنە ءتان جۇمساق يۋمور, ادەمى ازىلىمەن كوز كورگەن جايتتاردى جازادى. ءومىردى عاجاپ جاعىنا قاراي وزگەرتكەن ونەر مەن ونەر ادامدارى جايلى جالىقتىرماس عيبراتتى كەزەڭدەر تۋرالى باياندايدى.
تۇساۋكەسەردەگى ەستەلىكتەر تيەگىن كامال ورمانتاەۆ سىندى التىن قولدى دارىگەر باستاپ بەردى.
– ۇلى ونەر وعان دەگەن ۇلى ماحابباتتىڭ, ونى سۇيگەن, قاسيەتىن كيەپەتتەگەن ادامداردىڭ, ۇلكەن جۇرەكتىڭ ارقاسىندا عانا ولمەي كەلە جاتىر, – دەيدى دۋلات يسابەكوۆتەي جازۋشى. دۋلات اعامىز جاستاردىڭ جەتەسىنە ءسابيت ورازباەۆتىڭ تەرەڭ تالانتقا اينالۋىنا كىتاپتى كوپ وقىعانى, الەم ادەبيەتى مەن قازاق ادەبيەتىن ءبىلىپ قانا قويماي, سالىستىرىپ, بەزبەندەي الاتىن قاسيەتى جەتەلەدى دەگەندى جەتكىزدى.
قازاقتىڭ تۇلعالى اكتەرى اسانالى ءاشىموۆ اعامىز تەاتر تابالدىرىعىن بىرگە اتتاعان ءارىپتەسىمەن ساحناداعى العاشقى ءرولدەرى, وقىلاتىن كىتاپتار مەن وقىلمايتىن كىتاپتار بار ەكەندىگى تۋرالى سىر شەرتە كەلە:
– ءسابيتتىڭ كورگەن-تۇيگەنىن اقتارىپ, كىتاپ شىعارىپ, جاستارعا قازىر ەستەلىكتەر ايتىپ وتىرۋىنىڭ ءوزى دە بۇگىن – ۇلگى, ەرتەڭ – تاريح, – دەدى.
كىتاپتىڭ تۇساۋكەسەرىندە جينالعانداردى ءتانتى ەتىپ, تاڭ-عالدىرعان ءساتتىڭ ءبىرى – بيبىگۇل تولەگەنوۆا اپامىزدىڭ دراما تەاترى, ونەر تۋرالى جاساندىلىقتان ادا پايىمدارى مەن دايىندىقسىز, ميكروفونسىز ءان شىرقاۋى ەدى. عاجايىپ داۋىس يەسى 85 جاسىندا دا سۇلۋلىعىنان ءبىر تانباي, شىن دارىندار قانداي ەكەنىن پاش ەتتى دەسەك اسىرە ءسوز بولىپ شىقپاس.
قوعام قايراتكەرى ءشامشا بەركىمباەۆا اپامىز كىتاپتىڭ سالماقتى دا قىزىقتى بولىپ شىعۋى ءسابيت اعامىزدىڭ انا ءتىلىنىڭ ۋىزىنا جارىپ وسكەندىگىنەن دە دەگەنىمەن كوپشىلىك كەلىسىپ, قوشەمەتىن ءبىلدىردى. كەشتە اقىندار اتىنان تەمىرحان مەدەتبەك ءسوز الدى.
«الماتى اقشامى» كىتاپحاناسى سەرياسىمەن جارىق كورگەن بۇل كىتاپقا – ەسسەلەر, ەستەلىكتەر, وي-تولعامدار ەنگەن. جوبانىڭ جەتەكشىسى – قالي سارسەنباي. اۆتوردىڭ كىتابىن قۇراعان شىعارمالار جىلدار بويى اتالمىش گازەتتە ۇزدىكسىز جاريالانىپ, وقىرماندار ىقىلاسىنا بولەنگەن.
ايناش ەسالي,
«ەگەمەن قازاقستان».
الماتى.
––––––––––
سۋرەتتى تۇسىرگەن
سامات قۇسايىنوۆ.