قىزىلوردا وبلىسىندا جالپى ءبىلىم بەرەتىن مەكتەپتەردەگى 22180 مۇعالىمنىڭ 95%-ى كوروناۆيرۋسقا قارسى ۆاكتسينا سالدىردى, دەپ حابارلايدى Egemen.kz.
2020-2021 وقۋ جىلىندا مۇعالىمدەر اراسىندا كوروناۆيرۋس ينفەكتسياسىنىڭ زەرتحانالىق راستالعان 108 جاعدايى تىركەلدى. ونىڭ 40%-ى – وففلاين فورماتتا ساباق بەرگەن پەداگوگتار.
«ال جاڭا وقۋ جىلىنىڭ باسىنان بۇگىنگى كۇنگە دەيىن 22 مۇعالىم ۆيرۋس جۇقتىردى. دەگەنمەن ولاردىڭ 17-ىسى مەكتەپپەن بايلانىستى ەمەس. سەبەبى, ەڭبەك جانە بالا كۇتىمىنە بايلانىستى دەمالىسى كەزىندە ءۇي وشاعىنداعى قارىم-قاتىناستار ارقىلى جۇقتىرعان. ولار ءبىلىم بەرۋ ۇيىمىنا بارماعان. ال 5 جاعداي جاڭا وقۋ جىلىن وففلاين فورماتتا باستاعان وقىتۋشىلار اراسىندا انىقتالدى», دەدى وبلىستىق سانيتاريالىق-ەپيدەميولوگيالىق باقىلاۋ دەپارتامەنتىنىڭ ءبولىم باسشىسى الماش شۋاقباەۆا.
اۋرۋ وشاقتارىندا ەپيدەمياعا قارسى بارلىق شارالار ورىندالدى. ەسكە سالساق, قىزىلوردادا جاڭا وقۋ جىلىندا 102 وقۋشى كوروناۆيرۋس جۇقتىردى.