ءماجىلىس سپيكەرى نۇرلان نىعماتۋليننىڭ توراعالىعىمەن ءماجىلىس بيۋروسىنىڭ وتىرىسى ءوتىپ, وندا دەپۋتاتتاردىڭ الداعى جالپى وتىرىسىنىڭ كۇن ءتارتىبىنىڭ جوباسى ازىرلەندى, دەپ حابارلايدى Egemen.kz.
ءبىرىنشى وقىلىمدا بالا قۇقىقتارىن قورعاۋ ماسەلەلەرى بويىنشا زاڭنامالىق تۇزەتۋلەر تالقىلانادى.
اتاپ ايتقاندا, «قازاقستان رەسپۋبليكاسىنداعى بالانىڭ قۇقىقتارى تۋرالى» زاڭعا بالانى كەمسىتۋدىڭ بارلىق نىساندارىنان قورعاۋدى قامتاماسىز ەتۋ, بالالاردىڭ تۇرعىن ۇيگە قۇقىقتارىن قامتاماسىز ەتۋ, اتا-انالاردىڭ بالالاردى تاربيەلەۋ جونىندەگى مىندەتتەرىن كەڭەيتۋ بولىگىندە تۇزەتۋلەر ەنگىزۋ ۇسىنىلادى.
سونداي-اق, زاڭ جوباسىندا اقبتك-گە كامەلەتكە تولماعانداردىڭ دەنساۋلىعىنا جەڭىل زيان كەلتىرگەنى جانە ۇرىپ-سوققانى ءۇشىن اكىمشىلىك جاۋاپكەرشىلىك ەنگىزۋ بولىگىندە وزگەرىستەر كوزدەلەدى.
ەكىنشى وقىلىمدا دەپۋتاتتارعا مەملەكەتتىك باسقارۋ دەڭگەيلەرى اراسىندا وكىلەتتىكتەردى قايتا بولۋگە قاتىستى زاڭنامالىق جاڭالىقتاردى قاراۋ ۇسىنىلادى.