كەشە قاسىم-جومارت توقاەۆتىڭ توراعالىق ەتۋىمەن پارلامەنت سەناتى بيۋروسىنىڭ وتىرىسى بولدى, دەپ حابارلادى وسى پالاتانىڭ ءباسپاسوز قىزمەتى.
كەشە قاسىم-جومارت توقاەۆتىڭ توراعالىق ەتۋىمەن پارلامەنت سەناتى بيۋروسىنىڭ وتىرىسى بولدى, دەپ حابارلادى وسى پالاتانىڭ ءباسپاسوز قىزمەتى.
بيۋرو قازاقستان پرەزيدەنتىنىڭ «قازاقستان جولى – 2050: ءبىر ماقسات, ءبىر مۇددە, ءبىر بولاشاق» جولداۋىن ىسكە اسىرۋ جونىندەگى سەناتتىڭ ءىس-شارالار جوسپارىن بەكىتتى. جوسپاردا مەملەكەت باسشىسىنىڭ جولداۋىن زاڭنامالىق تۇرعىدا قامتاماسىز ەتۋ, سونداي-اق, وسى قۇجاتتىڭ نەگىزگى ەرەجەلەرىن ءتۇسىندىرۋ مەن ناسيحاتتاۋ جونىندەگى شارالار قاراستىرىلعان.
اتاپ ايتقاندا, «جاسىل ەكونوميكانى» دامىتۋ تاقىرىبى جونىندەگى پارلامەنتتىك تىڭداۋ جانە ەكسپو-2017 كورمەسىنە ازىرلىك, مادەنيەتتى دامىتۋ مەن اكىمشىلىك زاڭنامانى رەفورمالاۋ, كوميتەتتەردىڭ كوشپەلى وتىرىستارى مەن مەملەكەتتىك ورگانداردىڭ باسشىلارىمەن كەزدەسۋلەر وتكىزۋ جوسپارلانعان. جوسپاردا, سونداي-اق جولداۋدا مازمۇندالعان سىرتقى ساياسي مىندەتتەردى شەشۋگە باعىتتالعان شارالار دا كوزدەلگەن.
وسىعان بايلانىستى بيۋرو مۇشەلەرى دەپۋتاتتاردىڭ رەسپۋبليكالىق جانە ايماقتىق بۇقارالىق اقپارات قۇرالدارىنا ماقالالارى مەن سۇحباتتارىن جاريالاۋدى قاراستىراتىن سەناتتىڭ مەديا-جوسپارىن قارادى.
بيۋرودا سەناتتىڭ تۇراقتى كوميتەتتەرىنە ءماجىلىس ماقۇلداعان زاڭ جوبالارى ءبولىنىپ بەرىلدى.
بيۋرو مۇشەلەرى كەلەسى كەزەكتە سەناتتىڭ 30 قاڭتاردا بولاتىن وتىرىسىنىڭ كۇن ءتارتىبىن دە قارادى.
بيۋرو وتىرىسىندا «ءوڭىر» دەپۋتاتتىق توبىنىڭ قىزمەتى دە قارالدى. دەپۋتاتتىق توپ ۇسىنىمدار ازىرلەۋ, زاڭناماعا مونيتورينگ ەنگىزۋ مەن ونى جەتىلدىرتۋ, سونداي-اق, ءماسليحات دەپۋتاتتارىمەن ءوزارا ءىس-قيمىلى ارقىلى ايماقتاردى ءتيىمدى دامىتۋعا جاردەمدەسۋ مىندەتىن العا قويىپ وتىر. «ءوڭىر» توبى شاعىن جانە ورتا بيزنەستى دامىتۋدى مەملەكەتتىك قولداۋ جونىندەگى دوڭگەلەك ۇستەل, عىلىمي نەگىزدەلگەن ەكونوميكانى قالىپتاستىرۋعا ارنالعان جانە اگروونەركاسىپ كەشەنىنە يننوۆاتسيالىق تەحنولوگيالاردى ەنگىزۋ ماسەلەلەرى بويىنشا وتىرىستار وتكىزۋدى جوسپارلادى.