حقو-لاردا تولقۇجات پەن جەكە كۋالىكتى رەسىمدەگەن كليەنتتەر مەملەكەتتىك باجدى QR كودتىڭ كومەگىمەن تولەي الادى. ازاماتتارعا ارنالعان ۇكىمەت قر ءىىم-مەن بىرلەسىپ, كوشى-قون قىزمەتى وپەراتورىندا وتىرىپ-اق, تولەم جاساۋ مۇمكىندىگىن ىسكە اسىردى, دەپ جازادى, Egemen.kz.
بۇگىنگى تاڭدا پيلوتتىق رەجيمدە بۇل مۇمكىندىكتى نۇر-سۇلتان جانە الماتى قالالارىنىڭ تۇرعىندارى پايدالانا الادى. كليەنت تولقۇجات پەن جەكە كۋالىكتى رەسىمدەۋگە وتىنىشتەر قابىلدايتىن كوشى-قون قىزمەتى وپەراتورىنا جۇگىنگەن ساتتە, كاسساعا بارماي-اق بىردەن Homebank نەمەسە Kaspi بانك قوسىمشالارىنىڭ QR تولەم جاساۋ جۇيەسى ارقىلى باج الىمىن تولەي الادى.
«ساناۋلى سەكۋند ىشىندە تولەۋ – ءاربىر ەكىنشى قازاقستاندىققا قولجەتىمدى تسيفرلىق مۇمكىندىك. مەگاپوليستەردەگى QR تولەمدەر بارلىق ساۋدا, مادەنيەت نىساندى مەن ويىن-ساۋىق مەكەمەسىندە قولدانىلىپ ءجۇر. مەملەكەتتىك قىزمەت كورسەتۋ سالاسىنا دا ءبىز وسىنداي جاڭا تسيفرلىق مۇمكىندىكتەردى ەنگىزۋگە تىرىسىپ جاتىرمىز. بۇدان بۇرىن QR كودپەن جەر ۋچاسكەلەرىنە اكتىلەردى دايىنداۋ جانە بەرۋ, جىلجىمايتىن م ۇلىككە قۇقىقتاردى تىركەۋ, كوندومينيۋم وبەكتىلەرى بويىنشا قىزمەتتەردى جانە جەر قاتىناستارى سالاسىنداعى باسقا دا مەملەكەتتىك قىزمەتتەردى تولەۋگە بولاتىن. ەندى كاسساعا كەزەككە تۇرماي-اق قۇجاتتاندىرۋ قىزمەتىنىڭ الىمدارىن دا تولەۋ مۇمكىندىگى بار», دەدى «ازاماتتارعا ارنالعان ۇكىمەت» مەملەكەتتىك كورپوراتسياسىنىڭ باسقارما توراعاسى ءادىل قوجىقوۆ.
جەتى ايدىڭ ىشىندە قازاقستاندىقتارعا پاسپورت پەن جەكە كۋالىك بەرۋ بويىنشا 1 577 مىڭ مەملەكەتتىك قىزمەت كورسەتىلدى. جەكە كۋالىك ءۇشىن مەملەكەتتىك باج مولشەرى – 584 تگ, پاسپورت ءۇشىن 23 336 تگ قۇرايدى.
ازاماتتارعا ارنالعان ۇكىمەت QR ارقىلى تولەم جاساۋ مۇمكىندىگىن 2020 جىلدىڭ قاراشا ايىندا ەنگىزدى. بۇگىندە كليەنتتەر 146 مەملەكەتتىك قىزمەت ءتۇرىن وسى ءتاسىل ارقىلى تولەي الادى.
ايتا كەتەيىك, مەملەكەتتىك تىزىلىمدەگى 690 قىزمەتتىڭ 662 قىزمەت ءتۇرى كورپوراتسيا ارقىلى كورسەتىلەدى.