دۇنيە جۇزىندە ەپيدەميالىق احۋال ءالى دە ەڭسەرىلەر ەمەس. ۆيرۋس جۇقتىرعاندار سانى ازايماي تۇر. وسىعان بايلانىستى كوپتەگەن ەل ۆاكتسينا سالۋدى جەدەلدەتۋگە تالپىنىپ, تىرىسىپ جاتىر.
گەرمانيا دەنساۋلىق ساقتاۋ ءمينيسترى حالىقتى جاپپاي ۆاكتسينا سالدىرۋعا شاقىردى. ونىڭ ايتۋىنشا, ەكپە الۋ كورسەتكىشى جاقسارماسا, جىل سوڭىنا دەيىن ەلدەگى اۋرۋحانالار ناۋقاستارعا تولۋى مۇمكىن. ازىرگە گەرمانيا تۇرعىندارىنىڭ تەك 61 پايىزى كوروناۆيرۋسقا قارسى ۆاكتسينانىڭ ەكى دوزاسىن العان. بۇل ەۋروپا ەلدەرىمەن سالىستىرعاندا تومەن. وكىنىشكە قاراي, اتالعان ەلدە ۆاكتسينا سالعىزعاندار سانى بىرنەشە اپتادان بەرى تومەندەپ كەلەدى.
ۇلىبريتانيا بيلىگى كەلەسى اپتادا 12-15 جاستاعى جاسوسپىرىمدەرگە كوروناۆيرۋسقا قارسى ۆاكتسينا سالۋعا دايىن. بۇل تۋرالى انگليانىڭ باس سانيتارلىق دارىگەرى كريس ۋيتتي مالىمدەدى. ايتسە دە, ازىرگە بيلىك وكىلدەرى ۆاكتسينا سالدىرۋ-سالدىرماۋ قۇقىعىن اتا-انالارعا بەرمەك. پرەمەر-مينيستر بوريس دجونسون الداعى ۋاقىتتا وسىعان بايلانىستى پارلامەنتتە وتەتىن تالقىلاۋعا قاتىسادى.
باحرەين دە ەكپەگە ەرەكشە ەكپىن بەرىپ وتىر. ەل بيلىگى Sputnik V ۆاكتسيناسىن تولىقتاي العاندارعا كۇشەيتكىش دوزا قولدانۋعا رۇقسات ەتتى. وسىلايشا, ەكى دوزا العاندار تاعى دا ءبىر مارتە اتالعان پرەپاراتتى سالدىرا الادى.
يندونەزيادا ۆاكتسينادان داۋ تۋدى. تاياۋدا پرەزيدەنتتىڭ كوروناۆيرۋسقا قارسى ۆاكتسينا العانى جونىندەگى سەرتيفيكات جاريالانىپ كەتكەن. سودان كەيىن تۇرعىنداردىڭ جەكە مەديتسينالىق مالىمەتتەرىنىڭ قاۋىپسىزدىگىنە الاڭداعاندار سانى كوبەيدى. ويتكەنى مۇنداي اقپارات بىلايعى جۇرتقا جاريا ەتىلمەۋى ءتيىس. ساراپشىلار ەكپەگە ارنالعان باعدارلاما بۇزىلۋى مۇمكىن ەكەنىن العا تارتادى.
تۇركيا 6 قىركۇيەكتەن باستاپ كوروناۆيرۋسپەن كۇرەسۋدىڭ جاڭا شارالارىن ەنگىزدى. ولاردىڭ اراسىندا قالاارالىق اۆتوبۋستاردا, پويىزداردا جانە باسقا دا قوعامدىق كولىكتە ۆاكتسينا الماعان جولاۋشىلار پتر-تەست انىقتاماسىن كورسەتۋى قاجەت. بۇل ەرەجەلەر كونتسەرتتەرگە, كينوتەاترلارعا جانە تەاترلارعا بارۋ كەزىندە دە قولدانىلادى.
فرانتسيا ەڭبەك ءمينيسترى ەليزابەت بورن ەلدە ۆاكتسينا تولقۇجاتىنا قويىلاتىن شەكتەۋلەر جەڭىلدەۋى مۇمكىن ەكەنىن مالىمدەدى. ول ءۇشىن ناۋقاستار سانى ازايىپ, ۆيرۋس اۋىزدىقتالۋى كەرەك.
«دەنساۋلىق جاعدايى جاقسارىپ كەلەدى. ەگەر بۇل راستالسا, ءبىز ەرەجەلەردى جەڭىلدەتە الامىز. جاقىن كۇندەرى بۇعان دا جەتۋىمىز مۇمكىن», دەدى فرانس ينتەر راديوسىنا بەرگەن سۇحباتىندا ە.بورن.
پولشا AstvaZeneca ۆاكتسيناسىنىڭ 400,000 دوزاسىن تايۆانعا بەرەدى. سىرتقى ىستەر مينيسترلىگىنىڭ حابارلاۋىنشا, بۇل قادام تايۆانداعى ۆاكتسيناتسيا دەڭگەيىن جوعارىلاتۋ ماقساتىندا جاسالىپ وتىر.
توكيودا توتەنشە جاعداي رەجىمى قىركۇيەكتىڭ سوڭعى اپتاسىنا دەيىن ۇزارتىلادى. ايتسە دە, جاپونيانىڭ قالعان بولىگىندە كارانتيندىك شارالار جەڭىلدەتىلدى. وتكەن ايدا ۇكىمەت قابىلداعان, جاپونيا حالقىنىڭ شامامەن 80 پايىزىنا اسەر ەتكەن توتەنشە شارالار 12 قىركۇيەكتە اياقتالۋى كەرەك ەدى. بىراق توكيو مەن وعان جاقىن ماڭداعى ايماقتاردا ناۋقاستاردىڭ كوبەيۋىنە بايلانىستى توتەنشە جاعداي رەجىمىن الىپ تاستاۋ كەيىنگە شەگەرىلدى.
سلوۆاكيادا «دەلتا» شتاممى تەز تارالىپ كەلەدى. دەنساۋلىق ساقتاۋ مينيسترلىگىنىڭ مالىمەتىنە سۇيەنسەك, ەلدە انىقتالعان ينفەكتسيالار اراسىندا ونىڭ ۇلەسى 99 پايىزدان اسادى. ساراپشىلاردىڭ ايتۋىنشا, سلوۆاكيادا COVID-19 ەپيدەمياسىنىڭ ءۇشىنشى تولقىنى باستالدى.
رەسەيدە تاۋلىگىنە 19 مىڭعا جۋىق ادام ينفەكتسيا جۇقتىرعان. جالپى, پاندەميا باستالعالى 6 933 954 تۇرعىن كوروناۆيرۋس ينفەكتسياسىنا ىلىككەن. 186 407 ادام قايتىس بولدى.
تۋريزم سالاسى ەكىنشى جىل قاتارىنان COVID-19 پاندەمياسىنان زارداپ شەگىپ وتىر. اتالعان سالا 2020 جىلى اۋە قاتىناسى توقتاتىلعان كەزدە ايتارلىقتاي شىعىنعا ۇشىرادى. بۇكىل الەمدە حالىقارالىق تۋريستەر سانى 73 پايىزعا ازايدى.
2020 جىلى الەمدىك تۋريزم يندۋسترياسىنا ينۆەستيتسيالار جىلدىق ەسەپپەن 29,3 پايىزعا ازايعان. ال تۋريزمگە بايلانىستى قوناقۇي مەن تاماقتانۋ ورىندارىنىڭ كىرىسى 2019 جىلمەن سالىستىرعاندا 46,3 پايىزعا تومەندەگەن.