اقمولا وبلىسىنداعى قۇس فابريكاسىندا تاۋىقتار جاپپاي قىرىلۋدا. قىزمەتكەرلەردىڭ ايتۋىنشا, قۇستار ىندەتتەن ەمەس, اشتىقتان قىرىلىپ جاتقان كورىنەدى, دەپ حابارلايدى Egemen.kz كتك تەلەارناسىنا سىلتەمە جاساپ.
فابريكادا كۇنىنە ءۇش مىڭعا جۋىق تاۋىق ولەدى ەكەن.
«تاۋىقتار اشتىقتان قىرىلىپ جاتىر. بۇل قۇستارعا كورسەتىلەتىن ناعىز قاتىگەزدىك», دەيدى جۇمىسشىلار.
جۇمىسشىلاردىڭ وزدەرى دە ازىقسىز قالۋدان قورقادى. مۇنداعى جۇمىسشىلاردىڭ ورتاشا جالاقىسى 50 مىڭنان از, بىراق ولار بۇل اقشانى ەكى ايدان بەرى قولدارىنا الماعان.
«جالاقىمىزدى بەس جىلدان بەرى ۋاقىتىلى المايمىز. اقشانى ۇنەمى سۇراۋىمىز كەرەك. «كۇتە تۇرىڭىز, فابريكادا جەم جەتكىلىكسىز» دەگەن سوزدەرى ءاردايىم ەستيمىز. بىزگە ءتىپتى زەينەتاقى, مەديتسينالىق ساقتاندىرۋ, ەشتەڭە اۋدارمايدى», دەيدى قۇس فابريكاسىنىڭ قىزمەتكەرلەرى.
ءىرى قۇس فابريكاسى ايماقتى جۇمىرتقا مەن ەتپەن قامتاماسىز ەتۋدى الدەقاشان توقتاتقان, دەيدى تەلەارنا ءجۋرناليسى. باسشىلىقتىڭ ايتۋىنشا, كۇردەلى ماسەلەلەر قىستا باستالدى. قۇس ەتى تىم قىمباتتاپ, نارىققا باسەكەلەستەر كەلدى. قازىر كاسىپورىن بانكروتتىق الدىندا تۇر.
«باستاپقىدا مايلى داقىل, كۇنجارا, كۇنباعىس مايى بولماعان. پرەزيدەنت ەكسپورتقا تىيىم سالعان كەزدە, اتالعاندار بىزدە پايدا بولدى, بىراق ءدال سول كەزدە ولاردىڭ باعاسى قىمباتتادى, ال بىزدە قاراجات بولمادى», دەدى «اگرو-ينۆەست» جشس باسقارۋشى ديرەكتورى اسقار اقىلبەكوۆ.
كاسىپورىن باسشىلارى ءتىرى قالعان قۇستاردى ساتىلىمعا شىعارۋدى جوسپارلاپ وتىر. ال سول اقشا جۇمىسشىلار الدىنداعى قارىزدى وتەۋ ءۇشىن جۇمسالماق. زاۋىتتىڭ ءوزى ءۇش ايعا جابىلۋعا شەشىم قابىلداعان.