دۇنيەجۇزى قازاقتارى قاۋىمداستىعى 8 كىتاپتى جارىققا شىعاردى
ءبىز وسىعان دەيىن دە شەتەلدەردەگى قانداستارىمىزدىڭ شەكارا اسىپ كەلگەن شىعارمالارى اتاجۇرتتا كەزەگىمەن كىتاپ بولىپ باسىلىپ جۇرگەندىگى تۋرالى تالاي قالام تەربەگەنبىز. بۇل كۇندە بارشا قازاقتىڭ باسىن ءبىر جەرگە توعىستىرۋدا تىنباي تىرلىك اتقارىپ كەلە جاتقان قاۋىمداستىقتىڭ كىتاپحاناسى قوماقتىلانىپ كەلەدى.
دۇنيەجۇزى قازاقتارى قاۋىمداستىعى 8 كىتاپتى جارىققا شىعاردى
ءبىز وسىعان دەيىن دە شەتەلدەردەگى قانداستارىمىزدىڭ شەكارا اسىپ كەلگەن شىعارمالارى اتاجۇرتتا كەزەگىمەن كىتاپ بولىپ باسىلىپ جۇرگەندىگى تۋرالى تالاي قالام تەربەگەنبىز. بۇل كۇندە بارشا قازاقتىڭ باسىن ءبىر جەرگە توعىستىرۋدا تىنباي تىرلىك اتقارىپ كەلە جاتقان قاۋىمداستىقتىڭ كىتاپحاناسى قوماقتىلانىپ كەلەدى.
سونىمەن سارسەنبىنىڭ ساتىندە دۇنيەجۇزى قازاقتارىنىڭ قاۋىمداستىعى تۇساۋىن كەسكەن تۋىندىلار قر مادەنيەت جانە اقپارات مينيسترلىگى اقپارات جانە مۇراعات كوميتەتىنىڭ «ادەبيەتتىڭ الەۋمەتتىك ماڭىزدى تۇرلەرىن باسىپ شىعارۋ» باعدارلاماسى بويىنشا جارىق كورىپ وتىر. «اتاجۇرت» باسپا ورتالىعىنان جارىققا شىققان كىتاپتاردىڭ تۇساۋكەسەر راسىمىنە كىتاپ اۆتورلارى مەن ەلدەگى زيالى قاۋىمنىڭ كورنەكتى وكىلدەرى قاتىسىپ, بىتكەن ىسكە باياندىلىق تىلەپ, پىكىرلەرىن ورتاعا سالدى.
جىل سايىن جۇزەگە اسىرىلاتىن ءداستۇرلى شارادا الىس-جاقىن شەتەلدەردەگى قازاقتاردىڭ پوەزيا, پروزا جانرىنداعى كوركەم شىعارمالارى مەن ءار ەلدەگى قازاقتاردىڭ تاريحى تۋرالى عىلىمي-تانىمدىق سيپاتتاعى تاريحي زەرتتەۋلەر شىعارىلادى. بيىل دا قاۋىمداستىق بۇل يگى داستۇردەن جاڭىلماي, «شەتەلدەگى قازاقتار» سەرياسىمەن قىتاي مەن موڭعوليا قازاقتارىنىڭ ادەبي جيناقتارىن جانە موڭعوليا مەن رەسەي قازاقتارى تۋرالى جاڭا كىتاپتاردى جارىققا شىعارىپ وتىر.
بۇل شىعارمالاردىڭ بىرقاتارى قالىڭ قازاق نازارىنا العاش رەت ۇسىنىلىپ وتىر. شەتەلدەگى قازاقتار اراسىندا ەسىمدەرى ءبىرشاما ايگىلى بۇل ازاماتتاردىڭ كەيبىرى وزدەرى تۇرىپ جاتقان مەملەكەتتەردىڭ قۇزىرلى ورگاندارى تاراپىنان مويىندالىپ, شىعارمالارى ءبىلىم بەرۋ باعدارلامالارىنداعى وقۋلىقتارعا دا ەنگىزىلگەن كورىنەدى. سونىڭ ءبىرى – قاۋسىلحان قوزىباي ۇلى. ءارتۇرلى جانردا قالام تەربەگەن ونىڭ «ءىسلامنىڭ قۇرداسى» اتتى اڭگىمەسى جانە «شاعىلعان توسەك» اتتى پەساسى قىتايداعى قازاق مەكتەپتەرىنىڭ ادەبيەت ءپانى وقۋلىقتارىنا كىرگەن. قالامگەردىڭ تاڭدامالى شىعارمالار جيناعى مەللات رامەتتىڭ قۇراستىرۋىمەن شىعارىلىپ وتىر. وندا جوعارىدا اتالعان 2 تۋىندىسىنان بولەك, «جاڭا جايلاۋ» پوۆەسى مەن 6 اڭگىمەسى, 1 پەساسى جانە 30-عا جۋىق ولەڭدەرى توپتاستىرىلعان. ال بوتاگوز ۋاتقاننىڭ «اتاجۇرتقا جەتكەن كوش» كىتابىندا حح عاسىردىڭ 90-جىلدارىنىڭ باسىندا موڭعوليادا اتاجۇرتقا بەت العان العاشقى كوش ءسوز بولادى. جالپى, 20 جىلدان استام ۋاقىتتىڭ ىشىندە بۇل ەلدەن 100 مىڭداي قازاق ەلگە ورالعان بولاتىن.
بۇدان بولەك ارعىنباي جۇماجان ۇلىنىڭ «بالاپان قاز», ارعىنبەك اپاشباي ۇلىنىڭ «جىر-عۇمىر» ولەڭدەر جيناقتارى, ابدانباي باجاەۆتىڭ «كۇن ءوز كەۋدەڭنەن تۋادى» جانە ونەرحان وگىزباي ۇلىنىڭ «تاعدىر تالقىسىندا» پوۆەستەر مەن اڭگىمەلەر جيناقتارى شىعىپ وتىر. سونداي-اق, موڭعول قازاقتارىنىڭ ازاپقا تولى كوشى تۋرالى سۇلتان تاۋكەيدىڭ «ارىستاردىڭ ارمانى» دەرەكتى رومانى مەن سەرىكقالي بايمەنشەنىڭ رەسەي قازاقتارى تۋرالى «دانەكەر» ەسسە-اڭگىمەلەر كىتابى بار.
ايناش ەسالي,
«ەگەمەن قازاقستان».
الماتى.