ۇلى جەڭىستىڭ 65 جىلدىعىنا وراي استاناداعى ۇلى وتان سوعىسى مۇگەدەكتەرىنىڭ كلينيكالىق اۋرۋحاناسىندا سوعىس ارداگەرلەرىنە قۇرمەت كورسەتىلدى.
سوعىس ارداگەرلەرى ەمدەلەتىن اۋرۋحاناعا جينالعان كوپشىلىك الدىندا ءسوز سويلەگەن قر ارداگەرلەر كەڭەسىنىڭ توراعاسى قايىربەك سۇلەيمەنوۆ ۇلى جەڭىستىڭ ءمان-ماعىناسىنا توقتالا كەلىپ, ارامىزدا جۇرگەن ارداگەرلەرگە تاعزىم ەتە, ولارعا “ ۇلى وتان سوعىسى جەڭىسىنە 65 جىل” مەدالىن تابىس ەتسە, حالىق قاھارمانى, گەنەرال لەيتەنانت باقىتجان ەرتاەۆ سوعىس ارداگەرلەرىن ۇلى مەرەكەمەن قۇتتىقتاپ, اۋرۋحاناعا ابىلايحان, بوگەنباي, قابانباي سياقتى ۇلى تۇلعالار بەينەلەنگەن سۋرەتتى سىيعا تارتتى.
بۇدان كەيىن جۇرتشىلىق “ەرلىك – ەلگە مۇرا, ۇرپاققا ۇران” اتتى مايدانگەر قالامگەرلەر شىعارمالارى مەن سوعىس تاقىرىبىنا جازىلعان تۋىندىلارعا ارنالعان كورمەنى تاماشالادى. ال استانا مەملەكەتتىك مۇراعاتىنان اكەلىنگەن “ەرى ەلگە سەنگەن, ەلى ەرگە سەنگەن” اتتى كورمەگە سوعىس جىلدارى جارىق كورگەن گازەت-جۋرنالدار مەن سول كەزدەردەگى اسكەري ومىردەن سىر شەرتەر ءىس-قاعازدار قويىلىپتى. سونداي-اق مەرەكەلىك باسقوسۋدا ل.گۋميلەۆ اتىنداعى ەۋرازيا ۇلتتىق ۋنيۆەرسيتەتىنىڭ ستۋدەنتتەرى سالعان – سوعىس كەزەڭى, باتىر تۇلعالارى بەينەلەنگەن سۋرەتتەر كورمەسىنىڭ تۇساۋكەسەرى بولىپ, وسىندا اكەلىنگەن ۇزدىك 65 جۇمىس ۇلى جەڭىستىڭ 65 جىلدىعى قۇرمەتىنە اۋرۋحاناعا سىيعا تارتىلدى.
بەرىك سادىر.