ەلباسى نۇرسۇلتان نازارباەۆ مۇنايلى اتىراۋدىڭ قارقىندى دامۋىن نازارىنان تىس قالدىرعان ەمەس. سوعان وراي ءوڭىر جۇرتشىلىعىنىڭ تۇڭعىش پرەزيدەنتكە دەگەن ىستىق ىقىلاسى دا ەرەكشە. بۇل ءوڭىر ورتالىعىندا ەلباسىنىڭ «قازاقستان جولى – 2050: ءبىر ماقسات, ءبىر مۇددە, ءبىر بولاشاق» اتتى جولداۋىن تالقىلاعان اكتيۆ جينالىسىندا تاعى ءبىر بايقالدى. اۋەلى وبلىس اكىمى ب.ىزمۇحامبەتوۆ بيىلعى جولداۋدىڭ ماڭىزىن تومەندەگىشە سيپاتتاپ بەردى.
ەلباسى نۇرسۇلتان نازارباەۆ مۇنايلى اتىراۋدىڭ قارقىندى دامۋىن نازارىنان تىس قالدىرعان ەمەس. سوعان وراي ءوڭىر جۇرتشىلىعىنىڭ تۇڭعىش پرەزيدەنتكە دەگەن ىستىق ىقىلاسى دا ەرەكشە. بۇل ءوڭىر ورتالىعىندا ەلباسىنىڭ «قازاقستان جولى – 2050: ءبىر ماقسات, ءبىر مۇددە, ءبىر بولاشاق» اتتى جولداۋىن تالقىلاعان اكتيۆ جينالىسىندا تاعى ءبىر بايقالدى. اۋەلى وبلىس اكىمى ب.ىزمۇحامبەتوۆ بيىلعى جولداۋدىڭ ماڭىزىن تومەندەگىشە سيپاتتاپ بەردى.
– ەلىمىز تاۋەلسىزدىك العالى بەرى وزىندىك دامۋ مودەلىن – قازاقستان جولىن قالىپتاستىردى. تابىستىلىق فورمۋلاسىنىڭ اۆتورى – قازاقستان رەسپۋبليكاسىنىڭ پرەزيدەنتى نۇرسۇلتان نازارباەۆ ءححى عاسىردىڭ ءبىرىنشى جارتىسىنا دەيىنگى باعىت-باعدارىمىزدى ايقىنداپ, ونى جۇزەگە اسىرۋدىڭ ناقتى جولدارىن كورسەتىپ بەردى. «قازاقستان-2050» ستراتەگياسىمەن ەل دامۋىنىڭ جاڭا كەزەڭى باستالدى. سونداي-اق, قوعامدى تولعاندىرىپ جۇرگەن ماسەلەگە دە نۇكتە قويىلدى. بۇل – ۇلتتىق يدەيا ماسەلەسى. ۇلتتى ۇيىستىرىپ, ماڭگى ماقساتتارعا جەتەلەيتىن يدەيا – «ماڭگىلىك ەل» يدەياسى. بۇل يدەيا جايدان-جاي تۋا سالعان جوق. جەرۇيىقتى ارمان ەتكەن كونە زامانعى بابالاردان بۇگىنگى شيرەك عاسىرلىق تاۋەلسىزدىك تاريحىمىزدا تۇزىلگەن, ەلباسى اتاعان جەتى قۇندىلىق نەگىزىندە تەرەڭ تولعانىستان تۋعان كوشەلى وي, – دەدى وبلىس اكىمى.
ءوڭىر باسشىسى جولداۋدا ايتىلعان مىندەتتەردى ىسكە اسىرۋعا بايلانىستى جوسپارلى شارالاردى جۇرتشىلىققا كەڭىنەن تانىستىردى. اكىمنىڭ ءمالىم ەتۋىنشە, قازىر وڭىردە يندۋستريالاندىرۋ كارتاسى شەڭبەرىندە قۇنى 1,4 تريلليون تەڭگەنى قۇرايتىن 35 ينۆەستيتسيالىق جوبا جۇزەگە اسىرىلۋدا. ونىڭ ىشىندە وتكەن جىلى 10,6 ميلليارد تەڭگەلىك 7 جوبا ىسكە قوسىلىپتى. ال بيىل جالپى قۇنى شامامەن 17,7 ميلليارد تەڭگەنىڭ 5 جوباسىن ىسكە قوسۋ جوسپارلانىپ وتىر. سونىمەن بىرگە, ءوڭىر باسشىسى «اتىراۋ» الەۋمەتتىك-كاسىپكەرلىك كورپوراتسياسىنىڭ جانىنان عىلىم جانە يننوۆاتسيالىق ورتالىق قۇرۋدى ۇسىنىپ وتىر. بۇل ورتالىقتىڭ جۇمىسىنا مۇناي ءوندىرۋشى كاسىپورىنداردى كەڭىنەن تارتۋ قاجەت, دەپ ەسەپتەيدى ب.ىزمۇحامبەتوۆ.
وڭىردە «جاسىل ەكونوميكا» جوباسى اياسىندا كۇن مەن جەل قۋاتىن كەڭىنەن پايدالانۋدىڭ باستى نازاردا بولاتىنى ايتىلىپ قالدى. قازىر وسى باعىتتا ءۇش شەتەلدىك ينۆەستور زەرتتەۋ جۇمىستارىن جۇرگىزىپ جاتىر. ءوڭىر ەكونوميكاسىنا ينۆەستيتسيا قۇياتىن جوبالار مۇنىمەن شەكتەلمەيدى. ولاي دەيتىنىمىز, بىلتىر العاش رەت وتكىزىلگەن «Atyrau-inbest» حالىقارالىق فورۋمىندا 50 ميلليارد تەڭگەنىڭ 11 جوباسىنا قول قويىلعان ەدى. مۇنىڭ ءبارى دە ينۆەستيتسيالىق جوبالار بولعاندىقتان, ءوڭىر ەكونوميكاسىنىڭ وركەندەۋىنە تىڭ سەرپىن بەرەتىندىگى داۋسىز. بۇل جوبالاردىڭ اراسىندا فارماتسەۆتيكالىق ءدارى-دارمەك شىعاراتىن زاۋىتتىڭ قۇرىلىسى دا بار.
ال جاقىندا ءبىلىم بەرۋ سالاسىنداعى ءۇش اۋىسىمدىق وقىتۋ ماسەلەسى تۇپكىلىكتى شەشىمىن تاپتى. وسى كەزگە دەيىن بۇل ماسەلە, اسىرەسە, جىلىوي اۋدانىندا كۇردەلەنىپ تۇر ەدى. بۇدان ونشاقتى كۇن بۇرىن اتالعان اۋداندا جاڭا مەكتەپتىڭ تۇساۋى كەسىلىپ, ءۇش اۋىسىمدا ءبىلىم بەرىپ كەلگەن ءبىلىم ۇيالارىنىڭ جۇكتەمەسى ازايدى. بىلتىر اتىراۋدا 5 وقۋ ورنىنا تەحنيكالىق جانە كاسىپتىك ءبىلىم سالاسىندا دۋالدىق وقىتۋ جۇيەسىنىڭ ۇلتتىق يادروسىن قۇرۋ, جاستاردىڭ تەحنيكالىق ءبىلىم الۋىنا مەملەكەتتىك كەپىلدىك بەرۋ ەنگىزىلگەن ەكەن. ەندى بيىل تاعى دا 4 وقۋ ورنىنا ءدال وسىنداي جۇيەنى ەنگىزۋ جوسپارلانىپ وتىر.
وسىنداي يگىلىكتى ىستەر اتقارىلىپ جاتقان ءوڭىر جۇرتشىلىعى «قازاقستان جولى – 2050: ءبىر ماقسات, ءبىر مۇددە, ءبىر بولاشاق» اتتى جولداۋدىڭ ەرەكشە سەرپىن بەرگەنىن تىلگە تيەك ەتتى. ماسەلەن, ح.دوسمۇحامەدوۆ اتىنداعى اتىراۋ مەملەكەتتىك ۋنيۆەرسيتەتىنىڭ رەكتورى بەيبىت مامراەۆ, يندەر اۋداندىق ءماسليحاتىنىڭ دەپۋتاتى ورىنشا دىلمۇحاشەۆا, «ۆوزراجدەنيە» بولگار ەتنومادەني بىرلەستىگىنىڭ جەتەكشىسى يۋري كۋستادينچەۆ, جازۋشى راقىمجان وتارباەۆ, وبلىستىق ءماسليحاتتىڭ دەپۋتاتى ا.دۋملەر ەلىمىز سەرپىندى, ەكپىندى قارقىنمەن وركەندەۋدىڭ جاڭا باعىتىن تاڭدادى دەگەن ويلارىمەن ءبولىستى.
جولداسبەك شوپەعۇل,
«ەگەمەن قازاقستان».
اتىراۋ وبلىسى.