الماتى وبلىسىندا جاڭا مەكتەپ قولدانىسقا بەرىلدى

الماتى وبلىسى اكىمىنىڭ ءباسپاسوز قىزمەتى  حابارلاعانداي, قولدانىستاعى مەكتەپ 2020 جىلدىڭ جەلتوقسان ايىندا اپاتتى دەپ تانىلعان. 120 ورىنعا ارنالعان جاڭا عيمارات قۇرىلىسىن "نۇر-شاپاعات قۇرىلىس" جشس جۇرگىزدى. 2 جىلعا كەپىلدىكپەن سالىنعان ءبىلىم وشاعى بارلىق ماتەريالدىق-تەحنيكالىق جابدىقپەن قامتىلعان. جالپى اۋدانى 2736,84 شارشى مەتردى قۇرايتىن عيماراتتا 126 وقۋشىعا 28 ۇستاز ساباق بەرەدى.

اۋدان اكىمى تالعات ومىراليەۆ جەرلەستەرىن كونستيتۋتسيا كۇنىمەن قۇتتىقتاي وتىرىپ, وڭىردەگى ءبىلىم سالاسىنىڭ دامۋىنا توقتالدى.

«جىل سايىن اۋداندى كەزەك-كەزەگىمەن 2-3 مەكتەپتەن جاڭارتىپ وتىرمىز. بيىلعى جىلى عانا 2 جاڭا مەكتەپ سالىنۋدا. كەيبىر ءبىلىم عيماراتتارىندا كۇردەلى جوندەۋ جۇمىستارى جۇرگىزىلگەن. جاڭا مەكتەپتىڭ كىلتىن تابىستاۋ مەرەيلى مەرەكەمەن تۇسپا-تۇس كەلدى. بۇل - بارلىعىمىز ءۇشىن قۋانىشتى جاڭالىق. جينالعان قاۋىمدى كونستيتۋتسيا كۇنىمەن جانە كەلە جاتقان ءبىلىم كۇنى مەرەكەسىمەن قۇتتىقتايمىن»,  دەپ اتاپ ءوتتى اۋدان باسشىسى.

ايتا كەتەيىك, پانفيلوۆ اۋدانىندا شەت ەلدى مەكەندەردەگى مەكتەپتەر دە جاڭالاۋدان ءوتىپ جاتىر. قازىرگى ۋاقىتتا باسقۇنشى اۋىلىنداعى 300 ورىندى جانە قورعاس اۋىلىنداعى ورتا مەكتەپتەرگە كۇردەلى جوندەۋ باستالدى. سونداي-اق, وبلىس بيۋدجەتىنەن كىشى شىعان اۋىلىنداعى مەكتەپتىڭ جوندەۋ جۇمىستارىنىڭ جوبالىق-سمەتالىق قۇجاتتاماسىنا قاراجات ءبولىنىپ, كونكۋرس جاريالاندى. كەلەسى جىلى ەكى مەكتەپ كۇردەلى جوندەۋدەن وتەدى دەپ جوسپارلانعان. اۋدان مەكتەپتەرىندە 27100 وقۋشى ءبىلىم الادى.

ەسكە سالساق, الماتى وبلىسىندا بيىل 33 مەكتەپ سالىنىپ جاتىر. بيىل ونىڭ توعىزى جانە ءبىر قوسىمشا عيمارات قولدانىسقا بەرىلەدى. ونىڭ ىشىندە 1 قىركۇيەك كۇنى قاراساي, ىلە, ەسكەلدى جانە پانفيلوۆ اۋدانىندا 6 جاڭا مەكتەپتىڭ كىلتى تابىستالادى. ودان بولەك 3 جەكە مەكتەپ قولدانىسقا بەرىلەدى دەپ جوسپارانعان. ونىڭ ەكەۋى ءبىلىم كۇنى ەسىگىن ايقارا اشادى.