قىرعىز ەلىنىڭ استاناسى بىشكەك قالاسىندا حالىقارالىق تۇركى اكادەمياسىنىڭ ۇيىمداستىرۋىمەن جىر الىبى جامبىل جاباەۆتىڭ 175 جىلدىق مەرەيتويىنا جانە قىرعىز رەسپۋبليكاسى تاۋەلسىزدىگىنىڭ 30 جىلدىعىنا وراي عىلىمي كونفەرەنتسيا ءوتتى, دەپ جازادى Egemen.kz.
ماناس جانە ش. ايتماتوۆ ۇلتتىق اكادەمياسىندا سالتانات قۇرعان باسقوسۋعا حالىقارالىق تۇركى اكادەمياسىنىڭ پرەزيدەنتى دارحان قىدىرالى, قىرعىز رەسپۋبليكاسى لەگەندارلى پارلامەنتىنىڭ تۇڭعىش توراعاسى مەدەتكان شەريمكۋلوۆ, قازاقستان رەسپۋبليكاسى مادەنيەت جانە سپورت مينيسترلىگى مادەنيەت كوميتەتىنىڭ توراعاسى اقان ابدۋاليەۆ, قىرعىز رەسپۋبليكاسى ماناس جانە ش.ايتماتوۆ ۇلتتىق اكادەمياسى پرەزيدەنتى توپچۋبەك تۋرگۋناليەۆ, قىرعىز رەسپۋبليكاسىنىڭ ۇلتتىق جازۋشىلار وداعىنىڭ توراعاسى نۇرلانبەك كالىبەكوۆ, قازاقستان جازۋشىلار وداعىنىڭ توراعاسى ۇلىقبەك ەسداۋلەت, م.اۋەزوۆ اتىنداعى ادەبيەت جانە ونەر ينستيتۋتىنىڭ ديرەكتورى كەنجەحان ماتىجانوۆ, جازۋشى جۇماباي شاشتاي ۇلى, جامبىل وبلىستىق ءماسليحاتىنىڭ حاتشىسى ماحمەتقالي سارىبەكوۆ سونىمەن بىرگە تاعى باسقا دا قازاق-قىرعىز زيالى قاۋىم وكىلدەرى مەن قابىرعالى قالامگەرلەر قاتىستى.
«جامبىل – قازاق پەن قىرعىزعا ورتاق تۇلعا. «سۇيەگىم – قازاق, ەتىم – قىرعىز» دەپ ايتاتىن اقىننىڭ قوڭسى قونعان قىرعىز حالقىنا دەگەن رياسىز كوڭىلى انىق اڭعارىلادى. الاتاۋدىڭ ابىزى وسى قىرىنان دا تۇركى بىرلىگىنە قىزمەت ەتكەنى بارشاعا عيبرات», دەدى اكادەميا باسشىسى القالى جيىندا.
وسى تۇستا قىرعىز ەلىنە جامبىل تۋعان توپىراقتىڭ ىستىق سالەمىن جولداي كەلگەن الماتى جانە جامبىل وبلىستىق مادەنيەت باسقارمالارىنىڭ وكىلدەرى مەن ورەلى ونەرپازدار ءىس-شارانىڭ جوعارى دەڭگەيدە وتۋىنە اتسالىسىپ, باۋىرلاس ەلدە بابا رۋحىن اسپانداتقانىن ايرىقشا اتاي كەتكەن ءجون.
كونفەرەنتسيا بارىسىندا جامبىلدىڭ قىرعىز تىلىنە اۋدارىلعان تاڭدامالى شىعارمالارى («جامبىل جاباەۆ. تاندالگان چىگارمالار») كوپشىلىك نازارىنا ۇسىنىلدى. قۇندى ەڭبەكتى قىرعىز تىلىنە بەلگىلى ادەبيەتتانۋشىلار - كەريمبەك كادىراكۋنوۆ پەن تۇگولباي كازاكوۆ تارجىمالاعان.
«جىر الىبى اتانعان جامبىل جىرى - كەيىنگىلەر ءۇشىن ولمەس ونەگە, تاعىلىمدى مۇرا. قىرعىز-قازاقتا ءسۇيىنباي مەن قاتاعاننىڭ, جامبىل مەن توقتوعۇلدىڭ ەسىمى قاتار اتالادى. وسى ءداستۇردى جالعاپ, تۋىسقان ەلدەر اراسىنداعى ادەبي بايلانىستى نىعايتۋ - اتا-بابا الدىنداعى, ۇرپاق الدىنداعى ۇلى بورىش. حالىقارالىق تۇركى اكادەمياسى مۇرىندىق بولىپ وتىرعان بۇگىنگى يگى شارا - وسىنىڭ انىق ايعاعى», دەپ اتاپ ءوتتى القالى جيىندا ءسوز العان مەدەتكان شەريمكۋلوۆ.
«عالامشاردىڭ اسپانىن الاتاۋ قالاي بيىكتەتسە, ادامزاتتىڭ اسپانىن جامبىل اقىن سولاي بيىكتەتكەن. ءبىز باتىرى دا, اقىنى دا بار ەلمىز. قازاق قىرعىزدىڭ مىقتىلىعى سوندا. ەگىز تۋعان ەكى حالىقتىڭ ۇلى پەرزەنتتەرى جامبىل مەن توقتوعۇلدىڭ دوستىعى بۇگىنگە دە, ەرتەڭگە دە ۇلگى», دەگەن قازاقستان جازۋشىلار وداعىنىڭ توراعاسى تۇعىرلى تۇلعانى قىرعىز ەلىمەن بايلانىستىراتىن تاريحي دەرەكتەرگە توقتالدى.
سونىمەن قاتار, ءىس-شارا بارىسىندا كورنەكتى مەملەكەت قايراتكەرى, بەلگىلى جازۋشى كانىبەك يماناليەۆتىڭ «تاگاي بي (مۋحاممەد كىرگىز)» اتتى تاريحي پوۆەسىنىڭ تۇساۋى كەسىلدى. اتالعان ەڭبەك حVI عاسىردا ءومىر سۇرگەن, قىرعىز ەلىنىڭ باسىن بىرىكتىرىپ, ەل بولۋعا نەگىز قالاعان تاعاي ءبيدىڭ ومىرىنە ارنالعان.
تاعىلىمدى شارا قازاق جانە قىرعىز اقىندارىنىڭ قاتىسۋىمەن وتەتىن ءحىV حالىقارالىق الامان ايتىسقا ۇلاستى.