اقش-تا اتوي سالعان

جارىستىڭ العاشقى كۇنى ءانۋار اق­چۋرين امەريكالىق گەۆين روسسپەن بىرگە كانوە-ەكىلىك سايىسىندا سىنعا ءتۇستى. ايتۋلى جۇپ 1 000 مەترلىك قاشىقتىقتا مارە سىزىعىن ەكىنشى بولىپ قيىپ ءوتتى. كەلەسى تاۋلىكتە كانوە-تورتتىك باسەكەلەرى باستالدى. بۇل جو­لى قازاق سپورتشىسى «ۆاشينگتون كانوە كلاب» كلۋبىنىڭ ساپىندا ونەر كورسەتىپ, ءوزىنىڭ كوماندالىق ارىپ­تەستەرىمەن بىرگە ءدال سول مەجەدەن كو­­رىندى. ودان كەيىن اقچۋرين جەكەلەگەن سايىستا جانە كانوە-تورتتىكتە (200 مەتر) تاعى قوس كۇمىس مەدالدى كەۋدەسىندە جار­قىراتتى. جارىستىڭ سوڭعى كۇنى جوعا­رى­دا ەسىمى اتالعان امەريكالىق سپورت­شى­مەن بىرگە ءانۋار التىن تۇعىرعا كو­تە­رىلدى. ولار كانوە-ەكىلىك جارىسىندا ال­­دا­رىنا جان سالمادى. ناتيجەسىندە, جەر­­لەسىمىز اقش-تىڭ اشىق چەمپيونا­تىن ءبىر التىن جانە ءتورت كۇمىس مەدال­مەن قورى­تىندىلاپ, قازاقستاندىق جانكۇيەرلەردى قۋانىش پەن شاتتىققا بولەدى.

الىستاعى امەريكادا ولجاعا كەنەلگەن قانداسىمىز جايىندا ايتار بولساق, ول 2000 جىلى الماتى قالاسىندا دۇنيە­گە كەلدى. 11 جاسىنان باستاپ سپورتتىڭ وسى تۇرىنە مىقتاپ دەن قويدى. «بىردە اكەم ايسۇلتان مەكتەپ تاقتايشاسىنداعى ­جار­نامانى كورىپ, مەنى وسى سپورت تۇرى­مەن اينالىسۋعا ۇگىتتەدى. اكەمنىڭ اقى­لىنا قۇلاق اسىپ, استاناداعى «تول­­قىن» سپورت كەشەنىنە كەلدىم. ول جاقتاعى جات­­تىقتىرۋشىلار مەنەن «قايسىسىن تاڭ­­دايسىڭ: اكادەميالىق ەسۋدى مە, الدە كانوە مەن بايداركانى ما؟» دەپ سۇرادى. قاپەلىمدە نە دەپ جاۋاپ بەرەرىمدى بىل­مەي, قاتتى ساسىپ قالدىم. باعىما وراي, سول كەزدە جانىمىزعا بىلىكتى باپكەرلەر­دىڭ ءبىرى كەلە قالدى. ول مەنى قولىم­نان جەتەكتەدى دە, ءوزى جەتەكشىلىك ەتەتىن ۇيىر­مەگە الىپ باردى. وسىلايشا, مەن كانوە ەسۋدىڭ قىر-سىرىنا قانىعا باستادىم», دەپ ءانۋار ءوزىنىڭ ۇلكەن سپورتتاعى العاشقى قادامى جايىندا اڭگىمەلەپ بەرگەن ەدى.

ۋاقىت وزا جاس ورەن ءوزىنىڭ تابان­دىلىعى مەن ەرەن ەڭبەگىنىڭ ارقاسىندا ءبىراز بەلەستەردى باعىندىردى. اتاپ ايتساق, 2016 جىلى جاسوسپىرىمدەر ارا­سىندا وزبەكستاننىڭ سامارقاند قالا­سىن­دا وتكەن ازيا كۋبوگىندا باس جۇل­دەنى ولجالادى. 2017 جىلعى شانحاي­داعى ازيا چەمپيوناتىندا ءتورتىنشى ورىن­عا تابان تىرەدى. 2008 جىلى كانوە-بىر­لىك­كە (س-1) ابدەن ماشىقتانعان قازاقتىڭ ۇلى ەل بىرىنشىلىگىندە الدىنا جان سالماي, جەڭىس تۇعىرىنىڭ ەڭ بيىك ساتىسىنا كوتەرىلدى. سلوۆاكيانىڭ پيتەشتي قا­لاسىندا وتكەن رەگاتادا ول ءوزىنىڭ وڭ جام­باسىنا كەلە­تىن جاتتىعۋدا التىن السا, 500 مەترلىك ­سايىستا كۇمىسپەن كۇپ­تەلدى. جاستاردىڭ سامارقاندتاعى ازيا بىرىن­شىلىگىندە ەكى رەت دارا شىعىپ, بول­گاريانىڭ پلوۆديۆىن­دە جالاۋى جەل­بىرەگەن الەم بىرىنشىلىگىندە كۇمىس مەدالدى موينىنا ءىلدى.

وسىدان ءبىراز ۋاقىت بۇرىن حالىق­ارا­لىق دارەجەدەگى سپورت شەبەرى اتان­عان قان­داسىمىز ەسكەك ەسۋدە ەلەۋلى تا­بىس­تىرعا قول جەتكىزۋمەن قاتار, بىلىمگە دە مىقتاپ دەپ قويىپ وتىر. 2018 جىلى ول نازارباەۆ زياتكەرلىك مەكتەبىن ويدا­عىداي ءتامامدادى. ودان كەيىن ءبىلىمىن جە­تىلدىرۋ ماقساتىندا مۇحيتتىڭ ارعى بەتى­نە اتتاندى. بۇل كۇندەرى ءانۋار اق­چۋرين اقش-تىڭ مەلبۋرن قالاسىندا ورنا­لاسقان Florida Institute of Technology دەپ اتا­لاتىن ىرگەلى وقۋ ورنىنىڭ 4-كۋرس ستۋدەنتى.